Na iTakitaki Ni iKatinikalima ni Siga Ni Tiseba
03 Me vakavinavinakataki na Kalou (Elohim) na Tama ni noda Turaga (Master) o Jisu na Karisito (Yahshua the Messiah), o Koya, baleta na ilevu ni Nona loloma, e sa vakatubura oqo vei keda e dua tale na inuinui vou ni bula, mai na Nona a vakaturi Jisu na Karisito (Yahshua the Messiah) mai na mate, 04 ki na dua na ivotavota, e sega ni vakarusai rawa se vakadukadukalitaki rawa, ka na sega tale ga ni seyavu rawa, ka ni sa maroroi tu mai Lomalagi me nomuni; 05 o kemuni, oni sa taqomaki tu e na kaukaua ni Kalou (Yahweh), e na vakabauta ni veivakabulai sa vakarau tu me na vakatakilai e na ivakataotioti ni gauna.06 Na veika oqo, oni na mamarau dina kina, ia wale mada ga oqo, vakalekaleka ga, kevaka e gadrevi, oni na vakararawataki e na vica na ka ni veivakatovolei, 07 e na vuku ni dina ni nomuni vakabauta, ka ni talei cake mai na koula e rawa ni rusa, e dina ga ni dau vakatovolei e na bukawaqa, me na qai rawa kina ni kune ni dodonu me vakacaucautaki, me vakavinavinakataki ka vakarokorokotaki e na gauna sa vakatakilai mai kina o Jisu na Karisito (Yahshua the Messiah); 08 e dua, oni se bera ni raica, ia oni sa dau lomana. E dina beka e na gauna oqo, ni oni sebera ni raici Koya, ia e na nomuni vakabauta ga, oni sa dau marautaki Koya kina e na mataqali reki kei na veivakarokorokotaki e sega na vosa me vakamacalataka rawa, 09 e na nomuni sa rawata na icovi ni nomuni vakabauta - oya na kena sa vueti ni nomuni bula.
10 Na veika me baleta na veivueti oqo, era a vaqaqa ka vaqara vakayalomatua o ira na Parofita, era qai parofisaitaka na kena na tadu mai vei kemuni na ka ni loloma soliwale oqo,11 e na nodra via kila na cava, ka vaka kina e na gauna cava e na yaco kina, me vaka e a dusimaka tiko mai vei ira, na Yalo i Karisito (Spirit of the Messiah) e tiko e lomadra, o Koya e a vakamacalataka taumada vei ira na veika me baleta na veivakararawataki nei Karisito (Messiah) kei na lagilagi e na muria mai.
12 E a vakaraitaki vei ira, ni veiqaravi era vakayacora tiko e sega ni caka me baleti ira ga vakataki ira, ia e na vukuda o keda, era mai qarava tiko kina na veika sa tukuni oti vei kemuni, mai vei ira era sa mai vunautaka oti na itukutuku vinaka e na kaukaua ni Yalo Tabu, e a vakau sobu mai Lomalagi - na veika era dau mateca tu o ira na agilosi, me ra kila.
-I Pita 1:3-12.
Wilika Talega Ke Rawa
Aisea 52:13-53; 12; Sakaraia 13:7-9;
Iperiu 1-2; Jemesa 1
No comments:
Post a Comment