Na Karisito E Cecere Duadua.

Na iTakitaki Ni Ikalima Ni Siga Ni Vula o Tiseba

O Koya e iyaloyalo ni Kalou (Elohim) sa tabogo, ka ulumatua vei ira na veika buli kece sara. Baleta, e na vukuna o Koya, era a buli kina na veika kece e lomalagi, kei na veika kece era tiko e vuravura, laurai se sega ni laurai, se ra itutu vakatui, se o ira era daunivakavulewa, se o ira era daulewa. Na veika kece era a buli e na vukuna, me ra na mai yaga Vua. O Koya, e liu duadua e na veika kece, ka vakataudeitaka na veika kece. O Koya e ulu ni yagona, oya na isoqo­soqo lotu, o koya e ivakatekivu, ka isevu vei ira na vakaturi mai na mate, me rawa ni vakaliuci tikoga o Koya e na veika kece. Baleta ni talei Vua na Tamada me kune taucoko Vua na vuabale ni veika kece, ni sa kauta mai na veisaututaki mai na dra a dave mai na Nona kauveilatai e a qai yaco Vua, na kena vakaduavatataki lesu yani Vua na veika kece, e na Vukuna, veitalia ke ka vakavuravura se ka vakalomalagi. Ia o kemuni, oni a dau tu yawa tu, ka kena meca tu eliu e na uto ni nomuni vakasama e na vuku ni cakacaka ca, e sa mai vakaduavata­taki kemuni tu oqo o Koya, i na lewe ni Yagona, e na Nona mate, me na qai vakacabori kemuni, ni oni sa vakatabui ka tawacala tu, ka sega ni vakamelei rawa e Matana, kevaka oni toso tikoga e na vaka­bauta, moni vakayavutaki ka tudei tu kina, moni kakua ni toso laivi mai na inuinui ni itukutuku vinaka oni sa rogoca oti, ni a vunautaki vei ira na veika buli kece e ruku ni lomalagi, kau sa mai kena italatala tu oqo, o au, o Paula.
-Kolosa 1:15-23


Wilika Talega Ke Rawa
Vakatekivu 1:26; Joni 1:1-18; Roma 5:9-11;
II Korinica 5:17-21; Kolosa 2:9-10; Iperiu 1:1-13.