Na iLoloma Vakayalo.

Na iTakitaki Ni iKatolusagavulu Ni Siga Ni Noveba

E na veika me baleta na iloloma vakayalo, kemuni na mataveitacini, au sega ni vinakati kemuni moni lecaika tiko kina. Moni nanuma tiko ni oni a dau kai Veimatanitu tani, ni oni a dau guta na lotutaki matakau galu, e dina beka ni oni a vakayarayarataki vei ira. Ia qo, au vinakata moni kila vinaka tiko, ni na sega ni rawa vua e dua e vosa tiko e na Yalo Tabu ni Kalou (Yahweh) me kacivi Jisu (Yahshua) ni kalouca, ka sega ni dua e rawa ni kaya ni Turaga (Sovereign) o Jisu, vakavo ga e na kaukaua ni Yalo Tabu. E levu toka na veimataqali loloma, ia e dua ga na Yalo. Era duidui na veimataqali veiqaravi, ia e dua tikoga na Turaga (Sovereign). E levu talega na veimataqali cakacaka ia e dua tiko ga na Kalou (Elohim), e cakacakataka tiko na veika kece e na vukuda. Ia na kena vakaraitaki ni Yalo Tabu e soli vei ira na tamata yadudua, me yaga vei keda kece na kena vinaka; baleta vua e dua e solia na Yalo Tabu na vosa ni vuku, ia vua e dua tale, na Yalo Tabu vata ga e solia vua na vosa ni kilaka, vua e dua tale na vakabauta, mai vua na Yalo Tabu vata ga, vua e dua tale na iloloma ni veivakabulai e na Yalo Tabu vata ga; vua e dua tale, na cakacakataki ni mana, vua e dua tale na parofisai, vua e dua tale na kena kilai na veimataqali yalo, vua e dua tale na kilai na dui vosavosa, vua e dua tale na kena vakadewataki na dui vosavosa. Ia e duavata ga na Yalo e cakacakataka na veika kece oqo me veiwaseyaka tiko vei ira yadudua, me vaka ni Nona lewa. Me vaka ni dua ga na yago, ia e levu na veitikina, na veitikini ni yago e duabau oya, e dina ni ra le levu, era dua tikoga na yago, oqori e tautauvata kei Karisito (Messiah). Baleta e na dua ga na Yalo, eda a papitaisotaki kece kina i na dua na yago - se da Jiu, se da kai Kirisi, se da bobula, se da tugalala - eda a caka kece meda gunu mai na dua ga na Yalo.
I Korinica 12:1-13.


Wilika Talega Ke Rawa
Lako Yani 31:1-6; 35:30-36:2; Roma 12:1-8;
I Korinica 13-14; Efeso 4:1-16; Iperiu 2:1-4;
I Pita 4:7-11.

E Duavata E Na Vukui Karisito Na Jiu Kei Na Kaitani.

Na iTakitaki Ni iKaruasagavulukaciwa Ni Siga Ni Noveba

Oya kevaka oni sa bau rogoca oti na ilesilesi ni veiqaravi e a soli mai e na loloma ni Kalou (Elohim), ni a soli vei au e na vukumuni oya e na kena vakatakilai vei au na veika vuni, [me vaka au a vola yani vakalekaleka sara vei kemuni, me rawa kina, ni oni wilika, moni kilakasamataka na veika au sa kila tu me baleta na veika vuni nei Karisito (Messiah)], na veika a sega ni vakarai­taki vei ira na luve ni tamata e na veitaba­gauna tale eso, me vaka e sa mai vakaraitaki tiko oqo mai vua na yalo, vei ira na apositolo kei na parofita tabu: ni o ira na kai Veimatanitu tani, era sa na vakaivotavota vakaitaukei e na yago vata ga, me ra vakaiwasewase e na Nona yalayala, e na vuku i Karisito (Messiah), me vaka e kune e na itukutuku vinaka, kau sa mai dua tu oqo na kena italatala o au, e na isolisoli ni loloma cecekia ni Kalou (Elohim) e a soli vei au, e na cakacaka yaco ni Nona kaukaua. Vei au, o au, au lolovira duadua vei ira na digitaki, na iloloma oqo sa mai soli vei au, meu vunautaka e na kedra maliwa na kai Veimatanitu tani, na itukutuku me baleta na iyau kunekune dredre nei Karisito (Messiah), meu vakatakila vei ira na tamata kece me ra raica se cava na veiqaravi ni veika vuni, e a dau vunitaki tu Vua na Kalou (Elohim), o Koya e a bulia na veika kecekece; ka kena inaki oqo, me vakaraitaki na vuku cecekia ni Kalou (Elohim) vei ira na isoqosoqo lotu, vei ira na daunivakavulewa, kei ira na kaukaua e na vei itikotiko vakalomalagi, me vaka na inakinaki tawamudu, e nakiti me kune vei Karisito Jisu (Yahshua Messiah) na Noda Turaga (Master); o Koya e vu mai Vua na noda yalodoudou, kei na sala, ni da sa vakabauti Koya.
Efeso 3:2-12.

Wilika Talega Ke Rawa
Aisea 49:1-6; Cakacaka 15; Kalatia 3:25-29;
Efeso 2:11-22.

Laiva na Veika Kecekece Me Ra Vakavinavinakataka na Kalou.

Na iTakitaki ni iKaruasagavulukawalu ni Siga ni Noveba

Aleluya.
Vakavinavinakataka na TURAGA (El) e na loma ni nona valetabu:
vakavinavinakataki Koya e na loma ni Nona lomalagi vakaitamera.
Vakavinavinakataki Koya e na vuku ni nona cakacaka kaukaua;
vakavinavinakataki Koya ni sa levu dina ga.
Vakavinavinakataki Koya e na kena uvu na Davui; vakavinavinakataki Koya e na soliteri kei na api.
Vakavinavinakataki Koya e na tibereli kei na veimeketi; vakavinavinakataki Koya e na ivakatagi vakawa kei na bitunivakatagi.
Vakavinavinakataki Koya e na sibali rogo bi:
Vakavinavinakataki Koya e na sibali e tatamelamela.
Laiva na veika kecekece vakaicegu me vakavinavinakataka na TURAGA (Yah)
Aleluya.
-Same 150: 1-6


Moni kakua ni daumateni e na waini, baleta e na kune kina na itovo lialia; ia dau vakasinaiti ga e na Yalo, ka me dau wewe ni nomuni veitalanoa na same, na sere ni lotu, na sere vakayalo, moni dau lagalaga sere me memela i vuniyalomuni, ka vaka kina Vua na Turaga (Sovereign). Dau vakavinavinaka e na veiveigauna kece e na vukuni veika kecekece Vua na Kalou (Elohim) na Tamada, e na yaca ni Turaga (Master) o Jisu Karisito (Yahshua Messiah),
Efeso 5:18-20.





Wilika Talega Ke Rawa
Aisea 49:1-6; Cakacaka 15; Kalatia 3:25-29;
Efeso 2:11-22

Vakavinavinakataka na Kalou Mai Lomalagi.

Na iTakitaki Ni iKaruasagavulukavitu Ni Siga Ni Noveba

E na gauna vata oqori, Au sa tiko tale kina vakayalo; au qai raica e dua na idabedabe vakatui ni toka mai lomalagi, qai Dua e dabe toka e na idabedabe-vakatui oqo. O koya e dabe toka kina, e laurai ni vaka e dua na vatu Jasipa kei na Satiusa na kena irairai; qai rama vakavolivolita tu na idabedabe-vakatui e dua na drodrolagi na kena irairai e vaka na emarali. Wavokita na idabedabe-vakatui, era tuvani tu e ruasagavulukava na idabedabe, ia e na idabedabe oqo au raica ni ra dabeca toka e ruasagavulukava na kena qase, era vakaisulu kece tu e na kote vulavula, ka ra tokara kece tu e uludra na isalavakatui buli e na koula. Ia mai na idabedabe-vakatui, e lidi tiko mai kina na yaseyase, lutu tiko na kurukuru, ka rorogo tiko na domo; e duri tu e vitu na icina bukawaqa era caudre tiko e na mata ni idabedabe-vakatui; oqori na Yalo ni Kalou (Elohim) e vitu. E na mata ni idabedabe-vakatui e toka e dua na wasawasa iloilo me vaka na kirisitali. Ia e na kedra maliwa na idabedabe-vakatui ka vaka kina e na veiyasana, eratou toka e va na ibulibuli bula, eratou roboti vakadua tu e na vuqa vakavuqa na yalokanimata, mai matadratou ka vaka kina mai dakudratou. Na imatai ni ibulibuli bula e vaka na laione, na ikarua ni ibulibuli bula e vaka na luveni bulumakau, na ikatolu ni ibulibuli bula e tiko na matana me vaka na tamata, kei na ikava ni ibulibuli bula e vaka na ikeli e vuka tiko.
-Vakatakila 4:2-8.

E sega ni cegu, siga kei na bogi, na nodratou kaya tiko;

“E cecere, e cecere, e cecere,
Na Turaga (Yahweh), na Kalou Kaukaua (El Shaddai),
O Koya e a bula mai liu, e bula tiko edai ka sa vakarau tu me lako mai.”

Ni ratou solia na ibulibuli bula, na nodratou veivakalagilagitaki, veivakarokorokotaki kei na eivakavinavinakataki vei Koya e dabe toka e na idabedabe-vakatui, o Koya e bula tawamudu me sega ni mudu, o ratou talega na kena qase le ruasagavulukava, eratou na lutu sobu I rukuna o koya e dabe toka e na idabedabe vakatui me ratou vakarokoroko Vua e bula tawamudu ka sega ni mudu, me ratou vakacabora na nodratou dui isalavakatui e na mata ni idabedabe-vakatui ni ratou kaya;

“E sa yaga dina ga,
Kemuni na Turaga (Sovereign), na neimami Kalou (Elohim)
Moni ciqoma na lagilagi, na vakarokoroko kei na kaukaua;
Baleta Oni a bulia na veika kece,

Ia e na vuku ga ni Nomuni reki era sa mai tu kina oqo, ka ra buli talega kina.
-Vakatakila 4: 8b-11.


Wilika Talega Ke Rawa
Lako Yani 24:1-11; Aisea 6; Same 103:20-22;
Same 148; Marika 10:17-18

Ciqoma na iLoloma Soliwale Ni Kalou E Na Vakavinavinakataka.

Na iTakitaki Ni iKaruasagavulukaono Ni Siga Ni Noveba

Na Yalo e kaya vakamatata, ni na yaco e na dua na gauna mai muri, ni so era na lutu laivi mai na vaka­bauta, me ra vakarorogo vei ira na yalo dauveivakacalai kei na nodra ivakavuvuli vakajimoni, e na nodra ivakasala lasulasu o ira e sa sei tu na nodra lewa-e-loma e na kaukaumea katakata vakaoti, ni ra vakatabuya na vakawati, ka vaka kina na nodra vakarota me kakua ni laukana na kakana sa bulia tu na Kalou (Elohim) me vakayaga­taki e na vakavinavinaka vei ira era vakabauta ka kila na dina. Na veika buli kece ni Kalou (Yahweh) era vinaka, e sega ni dodonu me vakatabui, ke ciqomi e na vakavinavinaka, baleta era sa vakalougatataki oti tu e na vosa ni Kalou (Yahweh), kei na kena masulaki. Kevaka mo vakasalataki ira tiko na mataveitacini e na veika oqo, o sa na wili mo italatala vinaka nei Karisito Jisu (Messiah Yahshua), baleta o sa vakabulabulataki oti tu e na vosa ni dina, kei na ivakavuvuli vivinaka, o sa vakamuria tiko vakamaqosa. Ia mo biliga tani na veika e macawa wale, vata kei na nodra itukuni na buinigone, ia mo vakaukauataki iko cake tikoga e na veika vakalou. Na vakaukaua yago e yaga vakalailai ga; ia na veika vakalou e yaga e na veitabana kece, ka ni kune kina na inuinui ni bula, e na gauna oqo kei na gauna e sebera mai. Qo e dua na vosa dina, e dodonu me ciqomi taucoko. Oqo talega na vuna eda mai cakacaka ka vosota tu kina na veivakalialiai, baleta eda sa vakararavi tu Vua na Kalou (Yahweh) Bula, o Koya e iVakabula (Saviour) ni tamata kecekece, vakabibi vei ira era vakabauta. Na veika oqo mo vakarota ka vakatavulica.
-I Timoci 4:1-11.


Wilika Talega Ke Rawa
I Veigauna 16:4-14; Roma 8:18-28; 14;
I Korinica 10

Vakavinavinakataka Na Kalou E Na Nona Loloma Tawa Yalani.

Na iTakitaki Ni iKaruasagavulukalima ni Siga Ni Noveba

Vakavinavinaka Vua na TURAGA (Yahweh); baleta ni yalovinaka o Koya:
Ka tawa yalani na Nona loloma.
Vakavinavinaka Vua na nodra Kalou (Elohim) na veikalou (elohim);
Ka ni tawa yalani na Nona loloma...
Vakavinavinaka vua na nodra Turaga (Sovereign) na veituraga (adonim);
Ka ni tawa yalani na Nona loloma.
Same 136:1-3.

Keirau dau vakavinavinaka Vua na Kalou (Elohim), na Tama i Jisu Karisito (Yahshua Messiah), ka keirau sa dau masulaki kemuni tiko yani e veiveigauna kece, mai na gauna keirau a rogoca kina na nomuni vakabauti Jisu Karisito (Yahshua Messiah), kei na nomuni yalololoma vei ira na digitaki; e na vuku ni inuinui sa maroroi tu mai lomalagi me na nomuni, me vaka oni sa rogoca oti mai liu e na vosa dina ni itukutuku vinaka, e a kaburaki yani vei kemuni, me vaka ni a kaburaki i vuravura raraba, ka sa vuavuai vinaka tiko e na kemuni maliwa mai na siga sara oni a rogoca ka kila kina na kena dina na yalololoma ni Kalou (Elohim), me vaka oni a vulica talega maivei Epafiro, na neirau itokani dauniveiqaravi lomani; e dua e italatala yalodina nei Karisito (Messiah) e sa mai matataki kemuni tiko,
-Kolosa 1: 3-6.

Au vakavinavinakataka na noqu Kalou (Elohim), kau dau cavuti iko e veigauna kece ni noqu masumasu, niu mai rogoca na nomu loloma kei na vakabauta sa tiko vei iko e na vukuni Turaga o Jisu (Master Yahshua) vata kei ira kece na digitaki, me rawa ni vakavatukana na nodra wasea tiko kei iko na nomu vakabauta, e na kena kilai raraba na veika vinaka sa noda tu, e na vuku i Karisito (Messiah). Sa mai vuable na neimami reki kei na vakacegu e na vukuni nomu loloma, baleta na nodra yalololoma na digitaki, o sa vakabulabulataka tiko o iko, taciqu.
Filimoni 1:4-7.



Wilika Talega Ke Rawa
I Veigauna 16:34-36; II Veigauna 5-7;
Same 118:1-4; 136:4-26; II Korinica 9:10-15.

Vakavinavinakataka Na Kalou.

Na iTakitaki Ni iKaruasagavulukava Ni Siga Ni Noveba

E Dua Na Same: Me Ka Ni Veivakavinavinakataki

Kaila e na mamarau Vua na TURAGA (Yahweh), vuravura raraba.
Sokalou Vua na TURAGA (Yahweh) e na yalomamarau;
toro maivua e na sere ni reki.
Kila ni Kalou (Elohim) o koya na TURAGA (Yahweh);
Ni o koya sara ga e a buli i keda, o keda eda Nona:
o keda eda nona tamata, na sipi ni nona ba ni veiqaravi.
Curu i na nona matamata e na vakamolimoli,
kei na nona lomanibai e na vakavina­vinaka:
vakamolimoli vua, ka vakacaucautaki na yacana.
Baleta e yalovinaka na TURAGA (Yahweh); ka tawamudu na nona yalololoma;
Na Nona yalodina e na yacova na itabatamata kecega.
-Same 100:1-5


Moni kakua ni daumateni e na waini, baleta e na kune kina na itovo lialia; ia dau vakasinaiti ga e na Yalo, ka me dau wewe ni nomuni veitalanoa na same, na sere ni lotu, na sere vakayalo, moni dau lagalaga sere me memela i vuniyalomuni, ka vaka kina Vua na Turaga (Sovereign), Dau vakavinavinaka e na veiveigauna kece e na vukuni veika kecekece Vua na Kalou (Elohim) na Tamada, e na yaca ni Turaga (Master) o Jisu Karisito (Yahshua Messiah),
-Efeso 5:18-20


Wilika Talega Ke Rawa
II Veigauna 6:41; Same 65; 84; 96; III Joni 11.

Vakavinavinakataka Na Veika E Solia Tiko Na Kalou.

Na iTakitaki Ni iKaruasagavulukatolu ni Siga ni Noveba
Vakavinavinakataka na TURAGA (Yahweh), baleta ni yalovinaka o koya:
ka na sega ni yalani na nona loloma me tawamudu
Laiva me ra kaya vakakina, o ira era sa vaka­bulai oti
maivua na TURAGA (Yahweh),
o ira e vakabula ira o koya mai na liga ni meca;
O ira era e a soqoni ira vata mai na veivanua,
mai Vuaicake, kei na Vuaira, mai na Tokalau, kei na Ceva talega.
Era a lako sese voli e na lekutu kei na veivanua dravuisiga;
era a sega ni kunea e dua na sala ki korolevu me ra lai tauyavu kina.
Era a viakana ka viagunu,
ka sa takali tiko yani vakamalua na nodra bula.
Era qai tagi yani Vua na TURAGA (Yahweh), e na dela ni nodra leqa,
a qai vakabulai ira o Koya mai na nodra rarawa.
E a liutaki ira e na sala dodonu,
i na dua na korolevu, e na vanua era rawa ni tauyavu kina.
Laivi ira mera vakavinavinaka Vua na TURAGA (Yahweh)
baleta na Nona loloma tawacala rawa
kei na nona cakacaka mana e na vukudra na tamata!
Ka ni vakacegui ira era karamaca
ka vakasinaiti ira era viakana e na veika vivinaka.
-Same 107: 1-9


Laivi ira me ra vakavinavinakataka na TURAGA (Yahweh)
e na vuku ni nona loloma, kei na nona cakacaka mana
e vukudra na tamata!
Laiva me ra vakacabora na imadrali ni vakamolimoli,
ka tusanaka na nona cakacaka e na sere ni marau.
-Same 107:21-22




Wilika Talega Ke Rawa
II Veigauna 20:14-26; Same 104; 118; 145;
Maciu 6:25-34

E na Veika Kece Dau Vakavinavinaka.

Na iTakitaki ni iKarusagavulukarua ni Siga ni Noveba

Vakavinavinakataka na TURAGA (Yahweh), kaciva na Yacana;
Tusanaka na veika sa cakava e na maliwa ni veimatatamata
Lagasere Vua, seretaka na Same ni veivakacaucautaki Vua
tukuna wavoki na nona cakacaka mana kece sara.
-I Veigauna 16: 8-9


Ni Lako mai, meda mai lagasere ni marau Vua na TURAGA (Yahweh);
meda mai kaikaila e na domo levu Vua na Uluvatu ni bula.
Mai meda mai lako Vua e na vakavina­vinaka,
Ka vakacaucautaka e na ivakatagi kei na seresere.
Baleta na TURAGA (Yahweh) o Koya na Kalou (El) levu,
na Tui cecere vei ira na kalou (elohim) kecekece.
E toka e ligana na vanua titobu kei vuravura
ka taukena na delavuvu ni veiulunivanua
Na wasawasa e Nona, baleta ni a bulia o koya:
Na ligana a bulia na vanua mamaca.
Lako mai, mai cuva e na sokalou:
laiva meda tekiduru e na mata ni TURAGA (Yahweh),
o koya e a buli i keda; baleta ni noda Kalou (Elohim) o koya,
o keda eda tamata ni nona ba ni veiqaravi,
eda qelenisipi ni Nona veikaroni.
-Same 95:1-7(a);

Dau yalomamarau e veiveigauna kece. Dau masumasu tabucegu.
Ia e na veika kece, dau vakavinavinaka; baleta oqori na gagadre ni Kalou (Yahweh) e na vuku i Karisito Jisu (Messiah Yahshua), me baleti kemuni.
I Cesalonaika 5:16-18




Wilika Talega Ke Rawa
Niemaia 12:27-43; Same 77; 135:1-7; 148;
Luke 22:14-19

O Paula Kei Panapasa E Na Kedra Maliwa na Kaitani.

Na iTakitaki ni iKaruasagavulukadua ni Siga ni Noveba

Mai Lisitira, e a tiko kina, ka sa dau dabe tu ga, e dua na kena tagane, ka ni sega tu na kaukaua e yavana, baleta ni a sucu lokiloki mai ketei tinana ka se bera vakadua ni taubale. Na tamata qo a qai rogoci Paula ni vosa. Ia o Paula a vaka­raici koya toka ga vakamalua, qai raica rawa ni levu vua na vakabauta ka na rawa ni vakabulai, sa mani kaya e na domo levu, “Tucake vakadodonu e yavamu!” E lade cake sara qai taubale o koya.
-Cakacaka 14: 8-10


Oti era qai lako yani i keya o ira na Jiu mai Anitioki-i-Pisidia kei Aikoniema; ia ni ra sa vakayarayarataki ira rawa na le vuqa, era qai virilaki Paula e na vatu, oti era qai yarataki koya laivi i na taudaku ni korolevu baleta era nanuma ga ni sa mate o koya. Ia, ni ra sa toso wavokiti koya yani na tisaipeli, a qai tucake tale o koya, ka curu lesu tale i loma ni korolevu. E na siga tarava, rau sa qai biubiu vata kei Panapasa, me rau lako i Derebe.
Ia ni rau sa vunautaka oti na ituku­tuku vinaka e na korolevu oya, ka rau sa rawata e levu tale na tisaipeli, rau sa qai lesu i Lisitira, i Aikoniema kei Anitioki-i-Pisidia, me rau lai vakayaloqaqataki ira na tisaipeli, ka vakauqeti ira me ra tudei tikoga e na vakabauta, e na nodrau kaya, “E dodonu meda na curu i na matanitu ni Kalou (Elohim), ni da sa rawata mai e levu na ka rarawa.” Ia ni rau sa qai lesi i ira na qasenilotu e na vei soqosoqo lotu kece, oya ni sa oti na masumasu kei na lolo, rau sa qai vakatabui ira Vua na Turaga (Master), o koya era vakabauta.
- Cakacaka 14:19-23

Mai keya rau qai soko i Anitioki-i­-Siria, na vanua rau a vakatabui kina e na loloma ni Kalou (Elohim), e na vukuni cakacaka rau se qai vakaotia ga mai. Ni rau sa yaco yani, rau qai soqoni ira vata na lewenilotu, rau qai soli itukutuku me baleta na veika sa vakayagataki rau kina na Kalou (Elohim), bau kina na Nona sa dolava na katuba ni vakabauta vei ira na kai Veimatanitu tani. Oti rau qai tiko e keya vakabalavu vata kei ira na tisaipeli.
-Cakacaka 14: 26-28

Wilika Talega Ke Rawa
Lako Yani 17:1-4; Lekutu 14:1-10; Roma 1:1-17;
I Samuela 30:6; Joni 8:31-59; Efeso 2:11-22;

Cakacaka 7:52-60; 14:1-7.

Na iMatai Ni Nona iLakolako Vaka iTalatala.

Na iTakitaki Ni iKaruasagavulu Ni Siga Ni Noveba

Ia e na isoqosoqo lotu mai Anitioki e na gauna oya, era a lewena tiko e vica na parofita kei na ivaka­vuvuli: o Panapasa, o Simioni dau vakatokai o Niqa, o Lusio na kai Sairini, o Manaini e dua rau a susu vata kei Eroti na Rokotui, vata kei Saula. Ni ra sa veiqaravi tiko vua na Turaga (Master), ka lolo tiko, sa qai kaya mai na Yalo Tabu, “Wasei rau tani mai vei Au, o Panapasa kei Saula, e na vuku ni cakacaka Au sa kacivi rau kina.” Ni sa oti na lolo vata kei na masumasu, rau sa qai tabaki e na ligadra, oti era sa qai talaci rau yani.
E na veitalai ni Yalo Tabu, rau a lako kina i Selusia, ia mai keya, rau qai lai soko i Saipurusi. Ia ni rau sa yaco i Salamisa, rau qai lai vunautaka na vosa ni Kalou (Elohim) e na nodra valenisoro na Jiu. A tomani rau tiko o Joni, me veivukei vei rau. Ia ni ratou sa wavokita vakadua na yanuyanu taucoko me yaco i Pafosi, eratou qai donuya e dua na dau cakaisausau ka parofita lasu, e dua na Jiu na yacana o Parajisu, ni rau tiko vata kei na Talai-veivuke o Seuta Pauliasi, e dua na turaga yalomatua. Na tamata qo a qai kacivi rau o Panapasa kei Saula, qai kerea me rogoca na vosa ni Kalou (Elohim). Ia o Elima na dau ni cakaisausau (baleta qori na ibabebale ni yacana) a qai via tarovi rau, e na nona segata me vukica laivi na Talai-veivuke mai na vaka­bauta. Ia o Saula, sa kilai talega e na yaca Paula, sa vakasinaiti tu e na Yalo Tabu, e a qai wanonovi koya vaka­dodonu qai kaya, “O iko, o sinai tu e na lawaki ca kei na veivakaisini, baleta o luve ni tevero, ka meca ni veika kece e dodonu. O na sega beka ni tarova na nomu vakavevea tiko na sala dodonu ni Turaga (Yahweh)? “Ia qo, e sa na yaco, na liga ni Turaga (Yahweh) sa na bikai iko; o na qai mataboko, mo kakua ni raica na matanisiga e na dua na gauna.” E na gauna vata oya, e a kovuti koya kina e dua na kabu loaloa, sa mani veilakoyaki o koya me vaqara e dua me tuberi koya tiko e ligana. Ia na talai-veivuke, a qai vakabauta ni sa raica na ka a yaco, ka kurabui talega e na ivakavuvuli ni Turaga (Master).
-Cakacaka 13:1-12

Wilika Talega Ke Rawa
Lekutu 27:22-23; Vakarua 34:9; Maciu 19:13-15;
Luke 4:40; Cakacaka 6:1-6; 8:5-25;
I Timoci 4:11-14.

Tekivu Me Vunautaki Jisu o Saula.

Na iTakitaki Ni iKatinikaciwa ni Noveba

Ia e dua na tisaipeli e tiko mai Tamasiko, na yacana o Hananaia; na Turaga (Master) a qai vosa vua e na dua na raivotu, “Hananaia”. Kaya o koya, “O au saka qo, Turaga (Master)”. Sa qai kaya na turaga vua, “Tu, lako i na gaunisala e vakatokai o Dodonu, qai lai taro e na vale nei Jiutasa, mo raica e dua na turaga ni Tasusu, na yacana o Saula. Raica ni o na kunei koya ni masu tiko o. “Ia e na dua na raivotu e sa na raica oti o koya e dua na tamata na yacana o Hananaia, ni lako tiko yani me lai tabaka na ligana vua, me rawa ni rai rawa tale o koya.” E sauma o Hananaia, “Turaga (Master) au sa rogoca oti mai vei ira na le vuqa na kena itukutuku na tamata oqori, na ilevu ni veivakacacani e dau cakava vei ira na Nomuni digitaki, mai Jerusalemi. Ia eke e sa tiko vua na veivakadonui maivei ira na bete levu, me vesuki ira, o ira kece era kaciva na Yacamuni.” Ia qai kaya vua na Turaga (Master), “Lako! O koya e Noqu tamata digitaki, sa lesi oti tu me na vakateteya na Yacaqu e na kedra maliwa na kai Vei­matanitu tani, vei ira na tui, vata kei ira na lewe ni yavusa Isireli.
-Cakacaka 9:10-15


Sa mani lako o Hananaia, lai curu i lomanivale, tabaki koya e na ligana, qai kaya, “Taciqu Saula, na Turaga (Master) o Jisu (Yahshua) o Koya e a rairai vei iko e gaunisala ni o lako tiko mai, e talai au mai, me rawa ni o rai tale, mo qai vakasinaiti e na Yalo Tabu.” E na gauna vata oqori, e a lutu kina mai matana e dua na ka, me vaka na varini ika, oti qai soli vua me rai tale; sa qai matacake o koya ka papitaiso sara. Ia ni sa kana oti o koya, sa qai vakaukauataki. Oti sa qai tiko o Saula me vica tale na siga vata kei ira na tisaipeli mai Tamasiko. Ni oti oqori, sa tekivu sara me vunautaka o koya na Karisito (Messiah) e loma ni valenisoro, ni o Koya na Luve ni Kalou (Elohim).
-Cakacaka 9:17-20


Wilika Talega Ke Rawa
Vakatekivu 20; Lekutu 12; I Korinica 15:1-11;
Kalatia 1:11-24.

Sota Kei Jisu O Saula.

Na iTakitaki Ni iKatinikawalu ni Siga ni Noveba

Ia o Saula e a dodonu tu vua na nona vakamatei. E na gauna vata oqori e a tubu kaukaua tiko kina na vakacacani ni isoqosoqo lotu e tiko mai Jerusalemi; era sa mani veidroyaki kina i na veiyasa i Jiutia kei Samaria, eratou sa qai vo tu ga o ratou na apositolo. O ira era yalodina, era a qai colati Sitiveni i na nona veibulu, era qai vakayacora e dua na somate levu dina e na vukuna. Ia o Saula, a qai vakacacana tiko vakaca na isoqo­soqo lotu, e na nona curu vale tiko, yarataki ira laivi mai na turaga kei na marama, qai vakavuna na nodra bala tiko i valeniveivesu. Ia o ira era veidroyaki tiko, era a lako i na veivanua kece, ka vakateteya yani kina na vosa. O Filipe a lako i na korolevu o Samaria qai lai vunautaki Karisito (Messiah) vei ira.
-Cakacaka 8:1-4


Ia o Saula, ni se curumi koya tu na yalo me vakarerei ira ka vakamatei ira na tisaipeli ni Turaga (Master), e a qai lako vua na bete levu, me lai kerea maivua, na ivolatara eso me kauta tiko i na veivalenisoro mai Tamasiko, baleta ke mani kunea e dua ni muria tiko na sala oqo, tagane se yalewa, me na rawa vua me vesuki ira qai kauti ira mai i Jerusalemi. Ia ni toso tiko na nona ilakolako, me sa yaco voleka yani i Tamasiko, qai vakasauri ni rama wavolivoliti koya e dua na rarama kaukaua mai lomalagi. A qai caroba i na qele o koya, oti qai rogoca e dua na domo ni kaya, “Saula, Saula, na cava o vaka­cacani Au tiko kina?” E kaya sara o koya, “O cei beka o kemuni, Turaga (Master)?” E kaya mai na Turaga (Master), “O Au o Jisu (Yahshua), o Koya o vakacacana tiko. E ka dredre vei iko mo caqe saqata tiko na iwaro vakavotana.” Ia o koya, e na sautaninini kei na kidroa levu, a baci taro tale, “Turaga (Master), na cava oni vinakata meu cakava?” E kaya mai vua na Turaga, “Tu, curu i loma ni korolevu, e na qai tukuni vei iko na ka mo cakava.” O ira na tagane era sala vata tiko mai kei koya, era sa sega ni vosa rawa, baleta ni ra rogoca tiko e dua na domo, ia era sega ga ni raica e dua. Sa qai tucake mai na qele o Saula, ia ni qai tadola na matana, sa sega ni raica rawa e dua na tamata o koya: era sa mani tuberi koya e ligadra, ka kauti koya i loma i Tamasiko. E a tolu na siga na nona mataboko tu, ka sega talega ni kana se gunu.
-Cakacaka 9:1-9


Wilika Talega Ke Rawa
Taniela 8:26-27; Cakacaka 22:1-21; 26:1-29;
Luke 1:18-20.

Vakamatei O Sitiveni Baleta Na Nona Vakatutusa.

Na iTakitaki ni iKatinikavitu ni Siga ni Noveba

Ni sa tete na vosa ni Kalou (Elohim), ka sa vakalevutaki cake tikoga na kedra iwiliwili na tisaipeli e Jerusalemi; e a levu talega vei ira na bete era a qai tavuki me ra sa talairawarawa i na vaka­bauta.
Ia o Sitiveni, e na levu ni loloma kei na kaukaua e tu vua, a cakava e levu na cakacaka mana kei na ivakatakila­kila e na kedra maliwa na tamata. Era qai lako mai eso mai na iwasewase ni lotu e vakatokai na Lotu ni Tamata Tugalala, (qo o ira mai Sairini, mai Alekisadaria, mai Silisia vata kei ira mai Esia), era qai mai vakatubu veiba kei Sitiveni. Ia era a sega ni vosota rawa na vuku kei na Yalo, a vakayavutaki tiko kina na ile ni veika e kaya tiko. Era mani lai vakauqeti ira lo na tamata, me ra mai kaya “Keimami a rogoci koya ni vosa vakacacataki Mosese vata kei na Kalou (Elohim).” Era qai vakayavalati ira na tamata, na qase ni lotu, kei ira na vunivola; era mani lakovi koya, vesuki koya, era qai kauti koya i na matabose cokovata.
-Cakacaka 6:7-12

Ia o koya, baleta ni sa vakasinaiti tu e na Yalo Tabu, e a matacake i lomalagi qai raica na lagilagi ni Kalou (Yahweh) vata kei Jisu (Yahshua) ni duri tu e na liga imatau ni Kalou (Elohim); qai kaya, “Raica! Au raica tu yani qo ni sa dola tu mai na lomalagi vata kei na Luve ni Tamata ni duri tu e na liga imatau ni Kalou (Elohim).” Era qai kaikaila e na domo levu, era sogota na qara ni daligadra, era qai cicivi koya e na yalodua, era qai yarataki koya i na taudaku ni korolevu, ka vakavirilaki koya e na vatu. O ira na ivakadinadina era a qai luvata na nodra isulu era qai binia no e na yava ni dua na cauravou, na yacana o Saula. Era a virilaki Sitiveni tiko e na gauna vata a kaciva tiko kina na Kalou (Elohim), ni kaya tiko, “Turaga Jisu, (Sovereign Yahshua) ni ciqoma na yaloqu.” Oti sa qai tekiduru ka vosa tagitagi e na domo levu, “Turaga (Master), me kakua ni sauti ira na ivalavala ca oqo!” Ni cavuta oti ga oqori, a qai caroba sobu i ra, ni sa lutu na nona moce.
-Cakacaka 7:55-60


Wilika Talega Ke Rawa
Vakarua 24:10-16; Marika 13:9-13; Joni 16:1-4;
Cakacaka 7:1-54; 8:1-4.

Vakamuria Mada E Liu Na Kalou.

Na iTakitaki Ni iKatinikaono ni Siga ni Noveba

Ia ni ra sa raica rawa na nodrau doudou o Pita kei Joni, ka vakasama­taka ni rau a sega ni vuli se vakarautaki vakavuli era sa qoroqoro ga. Era qai kilakasamataka ni rau a dau ilala tu vata kei Jisu (Yahshua). Ia ni ra raica ni sa duri tu e yasadrau na tamata e a vakabulai, era sa sega ga ni kaya rawa e dua na vosa ni veivakacacani. Oti era qai vakarota me ratou vagalala mai loma ni valenibose, me ra veivosaki mada vakataki ira; era qai kaya “Na cava mada meda cakava vei rau na tamata qo? E dina ni sa vakayacori oti e dua na cakacaka mana vakasakiti e na vukudrau, qori e sa matata vinaka tu vei ira kece era vakaitikotiko mai Jerusalemi, ka da na sega ni cakitaka rawa. “Ia ke vinakati me kakua ni tete tale na itukutuku qo e na kedra maliwa na tamata, laiva me da vakarerei rau vakabibi, me rau kakua ni vosa tale vua e dua e na yaca qo, me tekivu qo.” Era sa qai kacivi rau, era qai vakaroti rau me rau kakua ni vosa tale vakadua se veivakatavulici tale e na yaca i Jisu (Yahshua). Ia o Pita kei Joni, rau qai sauma ni rau taroga vei ira, “E na dodonu beka e na mata ni Kalou (Elohim), ke keirau vakarogoci kemuni cake mai vua na Kalou (Elohim), qori moni vakasamataka taumada. “Baleta keirau na sega ni vosa rawa, vakavo e na veika keirau sa raica ka rogoca oti.” Ia, ni ra sa vakarerei rau tale, era qai sereki rau, baleta era a sega ga ni kunea e dua na sala me ra totogitaki rau kina; ia qori e vu ga mai vei ira na tamata; ni ra sa vakalagilagitaka tiko na Kalou (Elohim) e na vuku ni ka a yaco oqo. Baleta a sa sivia tiko na vasagavulu na yabaki na nona bula na tamata a vakayacori vua na caka­caka mana ni veivakabulai oqo. Ni rau sa sereki mai, rau a lako sara vei ira na nodrau itokani, rau qai lai vakasavuya vei ira na veika kece a tukuna vei rau o ira na bete levu kei ira na qase ni lotu.
Cakacaka 4:13-23


Wilika Talega Ke Rawa
Jeremaia 20:9; Maciu 5:10-12; Cakacaka 5:17-42

Vakabula E Dua Na Lokiloki O Pita.

Na iTakitaki Ni iKatinikalima ni Siga ni Noveba

O Pita vata kei Joni rau a qai lako vata i valenisoro e na gauna ni masumasu oya e na tolu na kaloko. Ia e dua na tagane a se lokiloki mai ketei tinana, e a colati tiko yani, ka ni dau lai vakotori no e veiveisiga e na matamata ni valenisoro, e vakatokai o Totoka, me dau lai vakatakekere tiko kina vei ira era curu tiko i Valenisoro. O koya, ni sa raici rau o Pita kei Joni, ni rau sa vakarau curu i valenisoro, a qai kere ka ni loloma yani vei rau. Ia o Pita ni wanonovi koya sara tu ga vakadodonu, ka vaka kina o Joni, qai kaya, “Raici keirau mai.” Sa galele sara vei rau o koya baleta na nona nui, ni na ciqoma e dua na ka mai vei rau. E kaya sara o Pita, “Na koula kei na siliva e sega vei au, ia na ka e tu vei au, au na solia vei iko: E na yaca i Jisu na Karisito (Yahshua the Messiah) na kai Nasareci, tucake, lako!” Sa tuberi koya cake sara e ligana imatau, me laveti koya cake; qai yaco vakasauri ni sa vakaukauataki na sui ni yavana kei na nona qurulasawa. Sa mani lade cake o koya, me tucake ka taubale, qai curu i loma ni Valenisoro vata kei rau - ia ni taubale tiko e a ladelade tale tikoga ka vakavinavinakataka tiko yani na Kalou (Elohim). O ira kece na tamata era a raici koya ni taubale tiko, ka vaka­vinavinakataka tiko na Kalou. (Elohim). Oti era sa qai kila ni o koya ga a dau dadabe voli e na matamata Totoka ni valenisoro, me dau kere veivuke voli kina; era a luvuci e na qoroqoro kei na lomatarotaro se cava beka a yaco vua.
-Cakacaka 3:1-10.

Ia, ni rau se vosa tikoga vei ira na tamata era sa lakovi rau mai, o ira na Bete, na tuirara ni valenisoro, kei na Satiusi, era a yalokatakatataka ni rau vakatavulici ira tiko na tamata, rau qai vunautaka tiko ni a kune votu vei Jisu (Yahshua) na veivakaturi mai na mate. Era mani vesuki rau, me rau lai sogo tiko me yacova na siga tarava, baleta sa yakavi sobu oti na vanua. Ia, a levu ga vei ira era rogoca na itukutuku era a vakabauta, a qai toso cake kina na kedra iwiliwili na tagane me rauta na limanaudolu.
-Cakacaka 4:1-4.



Wilika Talega Ke Rawa
Jeremaia 37:15; 38:6; Maciu 15:29-31; 21:1-16
Joni 5; 14:12-14.

Na iMatai ni Vunau Nei Pita.

Na iTakitaki ni iKatinikava ni Siga ni Noveba

Ia o Pita, ni tu cake mai vata kei iratou na le tinikadua, a qai laveta cake na domona qai kaya vei ira, “Kemuni na turaga ni Jiutia kei kemuni kece oni vakaitikotiko e Jerusalemi, laiva me kilai oqo vei kemuni, ka moni rogoca vinaka sara na noqu vosa. “O ira qo era sega ni mateni, me vaka na nomuni nanuma, baleta e se qai walu tiko ga na kaloko e na mataka ni siga oqo. Ia qo na ka a kaya na Parofita o Joeli;

‘E na qai yaco dina ga e na ivakataotioti ni gauna, e kaya na Kalou (Elohim),
Niu na sovaraka mai na Noqu Yalo Tabu, vei ira kece sara era vakalewe;
O ira na luvemuni tagane kei ira na luve­muni yalewa, era na parofisai,
O ira na nomuni cauravou, era na raica na raivotu
Kei ira na nomuni turaga qase era na tatadrataki tadra.
Vei ira na Noqu dauniveiqaravi tagane, vata kei ira
na Noqu dauniveiqaravi yalewa
Au na sovaraka na Noqu Yalo Tabu, e na veisiga oya,
era na qai dui parofisai.
Cakacaka 2:14-18

E na qai yaco dina ga mai ni o koya ga e kaciva
na yaca ni TURAGA (Yahweh)
e na vueti me vakabulai.’

“Kemuni na tagane ni Isireli, ni rogoca na vosa oqo: o Jisu (Yahshua) na kai Nasareci, e dua na Turaga a mai vakadinadinataki koya vei kemuni na Kalou (Elohim), e na cakacaka mana, na cakacaka veivakurabuitaki kei na ivakatakilakila a mai vakayacora e na Vukuna, na Kalou (Elohim), e na kemuni maliwa, me vaka oni dui kila vinaka tu o Koya, e a soli mai me vaka na inakinaki dei a se navuca makawa tu mai na Kalou (Elohim), ia o kemuni oni a qai vesuka, e na ligadra na tamata talaidredre, oni qai rubeca ka vakamatea; ia na Kalou (Elohim) a qai vakaturi i Koya, ni sa sereka oti na ivau mosimosi ni mate, baleta ni na sega vakadua ni rawa me na vesu tu ga kina o Koya.
Cakacaka 2: 21-24.


Sa qai kaya vei ira o Pita, “Moni veivutuni ka papitaisotaki kece sara e na yaca i Jisu na Karisito (Yahshua the Messiah), me bokoci na ivalavala ca; oni na qai ciqoma na iloloma soliwale ni Yalo Tabu.
Cakacaka 2: 38.

Wilika Talega Ke Rawa
Isikeli 36:16-28; 39: 21-29; Joeli 2:28-32;
Roma 10:1-13.

Na iLoloma Soliwale: Na Yalo Tabu.

Na iTakitaki Ni iKatinikatolu ni Siga ni Noveba

Ni sa yaco taucoko mai na siga ni Penitiko, eratou a sa soqo yalovata kece toka e na dua na vanua. A qai vakasauri na kena rogo mai e dua na rorogo mai lomalagi, ni vaka e liwa tiko e dua na bati ni cagi kaukaua, qai vakasinaita mai vakadua na loma ni vale eratou a dabe tiko kina. Oti qai laurai vei iratou na yameyame, me vaka na bukawaqa veisebayaki, ni mai no yadudua toka e dui uludratou. Eratou qai vakasinaiti e na Yalo Tabu, ka ratou dui tekivu vosa, e na veimataqali dui vosavosa, ni sa solia vei iratou na Yalo na kaukaua ni vosa. E na gauna vata oqori, era a vakaitikotiko tu kina mai Jerusalemi o ira na Jiu era turaga lotu kaukaua, mai na veimatanitu kece e kune e ruku ni lomalagi. E na gauna sa tete yani kina na itukutuku ni ka oqo, era a qai toso vata yani na le vuqa, qai tuburi ira na veilecayaki baleta o ira yaduadua era sa rogoci ira tiko, ni ra vosa tiko e na nodra duivosavosa. Oti era sa qai kurabui ka qoroqoro, ka ra veitarotarogi ni ra kaya, “Raica, e sega beka ni ra kai Kaleli kece o ira era vosa tiko qo? “Ia e rawa vakacava meda dui rogoci ira e na noda dui vosa eda a dui sucu kaya vata mai? Mai Pationi kei Mitisi kei Elamaiti, o ira era tiko mai Mesapotemia, mai Jiutia, kei Kavadosia, mai Ponito vata kei Esia, mai Viriqia, Vainavilia, Ijipita kei na yasayasa vaka Lipia qali vaka Sairini, kei ira era veisiko tiko mai Roma, o ira era Jiu kei ira era lotu ga vaka Jiu mai Kiriti kei ira mai Arapea -- eda rogoci ira ni ra vakayatuyatutaka tiko e na noda vosa, na cakacaka veivakauqeti ni Kalou (Elohim).” Era sa mani kurabui kecekece tu ka kidroa, era qai veitarotarogi vakataki ira, “Na cava beka na ibalebale na veika oqo?” Eso era veiwali ni ra kaya “Qori era sa vakasinaiti tu e na waini vou.”
- Cakacaka 2:1-13.


Wilika Talega Ke Rawa
Vunau ni Soro 23:4-16; Maciu 3:1-12;
Joni 14:15-26; 15: 26-27; 16:12-15.

Lesu Vua Na Kalou Na Tamada

Na iTalkitaki Ni iKatinikarua ni Siga ni Noveba

E na ivakamacala au a cakava taumada yani e liu, i Teofalusi, au a tuvana tu kina na veika e a mai tekivu me cakava ka vakatavulica o Jisu (Yahshua), me yacova sara na siga a mai kau cake kina, ni oti na Nona soli ivakaro e na Yalo Tabu, vei iratou na apositolo a digitaki ratou, oya o iratou e a vakaraitaki Koya vakataki Koya vei iratou, me vakadinadinataka kina vei iratou, ni sa bula tale, oya ni oti na veika rarawa a sotava, ka ni a rairai tiko vei iratou e na loma ni vasagavulu na siga, ka dau vakamacala voli kina vei iratou e na veika me baleta na Matanitu ni Kalou (Elohim).
E na Nona dau soqosoqo tiko vata kei iratou, e a vakaroti ratou kina me ratou kakua mada ni biuti Jerusalemi, ia me ratou waraka tiko na Nona yalayala na Tamada, me vaka, a kaya o Koya, “Oni sa rogoca oti mai vei Au; baleta o Joni e a veipapitaisotaki dina e na wai; ia o kemudou dou na papitaisotaki sara ga e na Yalo Tabu, e na loma ni vica tale na siga mai oqo.” Ia ni ratou sa soqo vata tale tiko, ratou a qai tarogi Koya “Turaga (Master), Oni na vakaduria tale beka, e na gauna oqo, na matanitu o Isireli?”
E kaya sara vei ratou o Koya “E sega ni nomudou itavi mo dou kila na gauna se na iwase ni gauna sa biuta vakatabakidua tu na Tamada i na Nona lewa o Koya vakataki Koya. “Ia dou na ciqoma na kaukaua, ni sa sobuti kemudou oti na Yalo Tabu; dou na qai Noqu ivaka­dinadina e Jerusalemi, e Jiutia raraba vata kei Samaria me yaco sara i na mua ni vuravura.”
Ni cavuta oti na vosa oqori, ni ratou se rai tu ga, e a qai tekivu me kau cake ni sa ciqomi Koya e dua na o, ka yali sara yani mai matadratou. Ia ni ratou se wanono cake tu i lomalagi, ni lako cake tiko o Koya, raica ni rau mai duri tu e yasadratou e rua na tagane sulu vulavula, rau qai kaya, “Kemuni na kai Kaleli, na cava beka oni mai duri tu kina moni qai wanono cake tu i lomalagi? O Jisu (Yahshua) vata ga e kau cake tiko oqori i Lomalagi mai vei kemuni, e na lako tale mai, e na kena ivalavala ga oni raici Koya ni lako tiko kina i lomalagi.
Cakacaka 1:1-11.


Wilika Talega Ke Rawa
I Veigauna 16:8; 23-31; Same 67; 72;
Aisea 45:22-23; 49:6; Luke 24:50-53.

Bula Tiko Vei Karisito Jisu.

Na iTakitaki ni iKatinikadua ni Siga ni Noveba

Qaqarauni matua me kakua ni dua e lawakitaki kemuni e na vakasama vakavuku se e na ile lasulasu tawayaga, e vu mai na ivakarau vakatamata e vakayavutaki e na vakasama vakavuravura, ka sega ni veiyaloni kei Karisito (Messiah). Vua, e sinai vutuvutu tu na veika taucoko e va Kalou (Supreme Being); ia o kemuni oni na vakataucokotaki mai Vua, baleta o Koya e imadamada ni vakavulewa vata kei na kaukaua. Vua talega oni a teve kina e na kena ivalavala e sega ni cakacaka ni liga, oya e na nomuni luvata laivi na yagomuni e na vuku ni ivalavala ni lewemuni, e na veiteve e caka e na vukui Karisito (Messiah), oya e na nomuni a bulu kei Koya e na veipapitaisotaki, oti moni qai vaka­turi vata kei Koya, ni oni sa vakabauta na cakacaka ni Kalou (Elohim), o Koya e a vakaturi Koya mai na mate. Ia o kemuni, o kemuni oni a dau mate tu eliu e na vuku ni nomuni ivalavala ca, kei na nomuni sega ni teve vakayago, a qai vakabulai kemuni vata kei Koya, ni sa vosota e na vukumuni na ivalavala ca taucoko, ka bokoca laivi vakadua na ivola ni veibeitaki eda dau beitaki tiko kina. Qori e sa kauta laivi mai na noda gaunisala, e na Nona a vakota ki na kauveilatai, ni sa vakamalumalumutaki ira na daunivakavulewa kei ira na kaukaua eso, a qai vakaraitaki ira i vuravura raraba, oti qai vakadrukai ira vakadua. O koya qori, moni kakua kina ni vakatara vua e dua me vakalewai kemuni e na kemuni kakana se memuni gunu, se na vakatatabutaki ni solevu se vula vou se na veisiga ni vakacecegu, na itovo eso e vakaraitayaloyalotaki tiko kina na veika e se tu mai muri, na kena dina taucoko e kune ga e na yago i Karisito (Messiah).
-Kolosa 2: 8-17.



Wilika Talega Ke Rawa
Aisea 1:11-14; Cakacaka 2:22-36; Roma 6:1-11;
I Korinica 15:12-58.

Vakaturi Mai Na Mate O Jisu.

Na iTakitaki ni iKatini ni Siga ni Noveba

E na imatai ni siga ni macawa, e a lako mai i na ibulubulu o Meri Makitalena, e na mataka lailai ni se butobuto, qai raica na vatu ni sa kau laivi tu mai na ibulubulu. A qai cici o koya me lako vei Saimoni Pita vata kei na tisaipeli kadua e dau lomana o Jisu (Yahshua), qai kaya vei rau, “Era sa kauta laivi na Turaga (Master) mai na ibulubulu; qo tou sa na sega ni kila na vanua era sa lai vakotori Koya kina.” Sa mani curu i tuba o Pita, vata kei na tisaipeli kadua, me rau lako i na ibulubulu. Rau a cici vata toka ga, ia na tisaipeli kadua a qai totolo cake vei Pita na nona cici, qai mani liu kina i na ibulubulu. Ia o koya, ni roso sobu me iro i loma, a qai raica ga na tikitiki ni isulu lineni ni ra sa davo tu vaka; ia a mani sega ga ni curu sara i loma. Ni yaco yani o Saimoni Pita, ka ni muri yani vei koya, qai lai curu sara i loma ni ibulubulu; qai raica o koya na tikitiki ni isulu lineni ni ra sa davo tu vaka, vata kei na itavoi a ubi tu kina na Uluna, ni sa sega ni toka vata kei na tikitiki ni lineni, ia a sa lobi vata tu ka no tani toka ga. Sa qai curu talega na tisaipeli kadua, o koya e a liu yani i na ibulubulu; qai raica talega o koya ka vakadinata. E na gauna oqo, rau a se bera tiko kina ni kila na ka e volai tu e na ivola Tabu, ni dodonu me na vakaturi mai na mate, o Koya.
-Joni 20:1-9.

Ia, e na yakavi tikoga ni siga oya, e na imatai ni siga ni macawa ni ratou se sogobutu tiko na tisaipeli e na vanua ratou a soqo tiko kina, e na ilevu ni nodratou ravataki ira na Jiu; a qai curu yani o Jisu (Yahshua) ka lai duri tu e na kedratou maliwa, qai kaya vei iratou “Me tiko kei kemudou na vakacegu.” Ni sa kaya oti oqori, sa qai vakaraitaka vei iratou na Ligana vata kei na Serena. E a tuburi ratou na tisaipeli na marau ni ratou sa raica na Turaga (Master).
-Joni 20:19-20.


Wilika Talega Ke Rawa
Same 16:9-11; Aisea 53:9-12; Maciu 28;
Marika 16; Luke 24; Joni 20-21.

Rube E Na Kauveilatai O Jisu

Na iTakitaki ni iKaciwa ni Siga ni Noveba

Ia ni ra sa yaco mai i na vanua e vakatokai o Kalivari, e keya era qai rubeci Koya kina e na kauveilatai, vata kei rau na tamata ca, me dua e na Ligana imatau, kei koya kadua e na imawi. Sa qai kaya o Jisu (Yahshua), “Tamaqu, vosoti ira qo, baleta era sega ni kila na ka era cakava.” Era qai vota na Nona isulu ka vakawiri­madigitaka. Na tamata era sa duri tu ga ka wanono tu. Ia o ira na daunivakavulewa era tu e na kedra maliwa, era a vaka­lialiai koya tiko, ni ra kaya, “E a vakabulai ira na tani; laiva me vakabulai Koya mada kevaka e Karisito (Messiah) o Koya na digitaki ni Kalou (Elohim).”
- Luke 23:33-35.


E dua vei rau na tamata ca ratou a rube vata tu a qai vosa vakacacataki Koya ni kaya, "Kevaka o iko na Karisito (Messiah), ia vakabulai iko vata kei keirau talega!" O koya kadua, a qai sauma me vosataki koya ni kaya, “O sega beka ni bau rerevaka na Kalou (Elohim), mo raica ni sa mai tautauvata tu kei Koya na kemu itotogi? O kedaru, sa dodonu ga, baleta daru ciqoma tiko ga na itotogi ni nodaru itovo; ia na Tamata oqo e a sega ni cakava e dua na cala!” Sa qai kaya o koya vei Jisu (Yahshua), “Turaga (Master), nanumi au mai ni Oni sa lai curuma na Nomuni matanitu.” Sa qai kaya o Jisu (Yahshua) vua, “Na ka dina Au kaya vei iko nikua o iko o na lai tiko vata kei Au mai Parataisi.” A sa rauta toka na tinikarua na kaloko, ni sa butobuto tu vakadua na vuravura, me yacova yani na tolu na kaloko. Na matanisiga e a vakabutobutotaki; na ilati ni valenisoro a qai kasei rua. Ia ni sa qai kaila e na domo levu o Jisu (Yahshua), a qai kaya o Koya “Tamaqu, ki na Ligamuni Au sa solia yani na Yaloqu!’ Ni sa kaya oti qo, sa qai cagutu na iotioti ni Nona icegu. Ia na Turaganiyadrau, ni sa raica na ka a yaco, a qai vakalagilagitaka na Kalou (Elohim) o koya ni kaya, “Sa dina ga, o koya qo sa dua dina ga na Tamata yalododonu!”
-Luke 23:39-47



Wilika Talega Ke Rawa
Same 22; Maciu 27; Marika 15; Luke 23;
Joni 18:28-19:42.

Totogimate O Jisu (Yahshua)

Na iTakitaki ni iKawalu ni Siga ni Noveba

Ia o ira na bete levu, kei ira na lewe ni matabose era a vaqara tiko eso na ivakadinadina me beitaki kina o Jisu (Yahshua), oya me rawa ni na vakamatei kina o Koya, ia era qai sega ni kunea e dua. E levu era a mai beitaki koya tiko vakailasu, ia na nodra ivakadinadina a sega ga ni veidutaitaki rawa. Oti sa qai tu eso, me ra beitaki Koya vakailasu ni ra kaya “Keimami a rogoci Koya, ni kaya, ‘Au na vakarusa na valenisoro oqo e bulia na liga, ia e na loma ni tolu na siga Au na tara e dua tale e sega ni bulia na liga!”’ Ia ekeri mada ga, na nodra ivakadinadina a se sega tikoga ni veidutaitaki vata rawa. Sa mani tucake na bete levu-liu e na kedra maliwa, qai tarogi Jisu (Yahshua), “E vakaevei o sa sega ni sauma rawa beka? Na cava mada era beitaki iko tiko kina o ira na tamata oqo?” E tu vakanomodi tu ga o Koya, ka sega ni kaya e dua na ka. E baci tarogi Koya tale na bete levu-liu “O iko beka na Karisito (Messiah), na Luvena o Koya e dau Rokovi?” Sauma o Jisu (Yahshua), “O Au ga. Oni vakarau raica na Luve ni Tamata ni sa na dabe toka e na ligana imatau o Koya na Kaukaua; oti qai lako mai e na dela ni o ni lomalagi.” E a basuraka na nona isulu na bete levu-liu qai kailavaka, “Na ivakadinadina cava tale eda vinakata tiko? “Oni sa rogoca na veivakacacani! Na cava oni sa lewa?” Era qai lewa kece ni cala o Koya, ka sa dodonu me vaka­matei. Eso era qai tekivu me ra kasiviti Koya, era qai vesuka na Matana me tabonaka na Nona rai, ka mokulaki Koya, era qai kaya Vua, “Parofisai!” O ira na ovisa era a qai sabasabalaki Koya e na qeteqete ni ligadra.
-Marika 14: 55-65



Wilika Talega Ke Rawa
Lako Yani 20:16; Taniela 7:13-14;
Maciu 26:59-67; Luke 23:63-71; Joni 18:19-24.

Cakitaki O Jisu.

Na iTakitaki ni iKavitu ni Siga ni Noveba

Ia ni se vosa tikoga o Koya, raica, era sa tu e dua na ibinibini tamata levu; o koya e vakatokai o Jiutasa, e dua vei iratou na le tinikarua e a liutaki ira tiko mai. E a toso volekati Jisu (Yahshua) sara yani, qai reguci Koya. Oti qai kaya vua o Jisu (Yahshua), “Jiutasa, o mai solia laivi tiko na Luve ni Tamata e na dua na iregu?”
-Luke 22:47-48


Ia, ni ra sa vesuki Koya oti, era sa qai tuiraki Koya me ra kauti Koya i nona vale na bete levu-liu. O Pita e a muri tiko ga, me vica toka na ikalawa mai muri. Ni ra sa vakatubura oti e dua na matadravu bukawaqa e na lomadonu ni rara ni matanivale, era sa qai dabe vata kece toka; o Pita talega a lai dabe toka e na kedra maliwa. Ia e dua na yalewa vada, ni raici koya ni dabe toka e yasa ni matadravu bukawaqa, e a tu sara me dikevi koya matua, oti qai kaya, “Na tamata qo a dau tiko talega vata kei Koya.”

Ia qai cakitaki Koya o koya ni kaya, “Yalewa, Au sega ni kilai Koya.”

Ni oti tale vakalailai, e a raici koya yani e dua tale qai kaya, “O iko talega o dua vei ira!”

Ia qai kaya o Pita, “Tagane, au sega ni dua vei ira.”

Ni sa sivi oti e dua na aua, e dua tale a qai vosa mai vakadoudou me vakadinadinataka, ni kaya, “E dina ga, o koya qo e dua talega vei ira, baleta o koya e kai Kaleli!”

Ia qai kaya o Pita, “Tagane, au sega ni kila na ka o kaya tiko!”

Ia e na gauna vata oqori, ni se vosa tikoga o koya, e a tagi kina na tamatama ni toa. E vuki sara na Turaga (Master) me raici Pita. Ia o Pita a qai nanuma na vosa ni Turaga (Master) ni a kaya vua o Koya, “Ni se bera ni tagi na tamatama ni toa, o sa na cakitaki Au oti vakatolu.” Sa biubiu sara ga mai keya o Pita, qai lai rubica na tagi ni vutugu vakaciriloloma.
- Luke 22:54-62




Wilika Talega Ke Rawa
Same 42; Maciu 26:47-56, 69-75; Marika 14:43-53,
Marika 14: 66-72; Joni 18:2-12, 25-27.

Na iCaba Tawa Vakabauta.

Na iTakitaki Ni iKaono ni Siga ni Noveba

Sa qai kaya vei iratou o Jisu (Yahshua) “O kemudou kece dou na vakatarabetaki e na Vukuqu e na bogi nikua, baleta ni volai tu,

‘Au na mokuta na i vakatawa ni sipi,
O ira na sipi era na qai dui
veidroyaki.’

“Ia ni sa yaco oti na Noqu vakaturi, Au na liu sara vei kemudou i Kaleli . Ia qai kaya Vua o Pita, “Kevaka me ra vakatarabetaki kece o ira qo, o au ga, au na sega ni tarabe.” E mani kaya vua o Jisu (Yahshua), “Na ka dina Au kaya vei iko, nikua, e na bogi ga oqo, ni se bera ni tagi vakarua na tamanitoa, o sa na cakitaki Au oti tale vakatolu.” Ia sa qai ba ga vakaukaua o koya, ni kaya, “Kevaka mada ga meu vaka­matei vata kei Kemuni, au na sega ga ni cakitaki Kemuni!” O ratou kece a tautauvata, na vosa eratou dui kaya. Oti eratou qai yaco i na vanua e vakatokai o Kecisimani, sa qai kaya o Koya vei iratou na Nona tisaipeli, “Dou toka eke Meu lai masu!” Sa qai kauti ratou o Pita, o Jekope vata kei Joni me ratou lako vata kei Koya, oti sa qai tekivu me tuburi Koya na lomabibi levu vata kei na yaluma. Sa kaya sara vei iratou o Koya, “Na vuniyaloqu sa lomabibi dina vakalevu e na yaluma, kau sa rawa ni mate kina. Toka eke ka vakatawa toka.” Sa qai toso tale vakalailai i liu o Koya, lutu sobu e na dela ni qele, qai masulaka kevaka e rawa, me kau laivi mai Vua na tikinigauna sa tadu tiko mai. A qai kaya o Koya, “I Tamaqu, na ka kece e rawa vei Kemuni. Kauta laivi na bilo oqo mai vei Au ; ia me veitalia ga na ka Au gadreva, me yaco ga na Nomuni lewa.” Sa qai lako mai o Koya, qai raici iratou ni ratou sa dui moce no, qai kaya vei Pita, “Saimoni, o sa moce talega? O sega beka ni vakatawa rawa toka me dua na aua? Vakatawa ka masumasu tiko, de dou qai curu i na veitemaki. Na yalo sa vakarau dina tu, ia na yago ga sa gogo.”
-Marika 14:27-38



Wilika Talega Ke Rawa
Sakaraia 13:7; Marika 14:26-42; Luke 22:31-46; Joni 13:36-38

Na iVakayakavi Ni Turaga.

Na iTakitaki Ni iKalima Ni Siga Ni Noveba

Ni oti oqori, e dua vei iratou na tinikarua, o Jiutasa Isikarioti, a qai lako vei ira na bete levu, qai kaya, “Na cava oni na solia vei au kevaka meu soli i Koya vei kemuni?” Era wilika tani sara vua e tolusaga­vulu na tikitikini siliva. Me tekivu mai na gauna oya, sa tekivu vaqara tiko e dua na sala o koya, e na rawa kina ni soli i Koya laivi. Ia e na imatai ni siga ni Solevu ni Madrai Sega ni Vakaleveni, e ratou a lako mai vei Jisu (Yahshua) na tisaipeli, eratou qai kaya Vua “Evei beka Oni vinakata me keitou lai vakarautaka­, Moni na lai kania kina na Lakosivia.” E kaya sara o koya, “Lako i na korolevu, vua e dua na turaga, qai kaya vua, ‘Na iVakavuvuli e kaya, “Na noqu gauna sa roro mai, Au na mai vakananuma na Lakosivia e na nomu vale, vata kei ratou na Noqu tisaipeli ”’” Rau mani vakayacora na tisaipeli na ka e vakarota vei rau o Jisu (Yahshua), rau qai vakarautaka na Lakosivia. Ia ni sa yaco mai na yakavi, sa dabe sara o Koya vata kei iratou na le tinikarua. Ni ratou sa kana tiko sa qai kaya, “Na ka dina Au kaya vei kemudou, e dua ga vei kemudou e na soli i Au laivi.” Eratou a rarawataka vakalevu oqori, ka ratou mani tekivu tarogi Koya yadu­dua, “Turaga, o au beka?” Sa qai sauma o Koya ni kaya, “O koya e a tonia vata kei Au na ligana e loma ni dari e na soli i Au laivi. “Na Luve ni Tamata, e na lako ga, me vaka sa volai tu me baleti Koya, ia na leqa levu e na colata na tamata, e na solia laivi na Luve ni Tamata. E vinaka cake vua na tamata oqori, me a kua ga ni sucu.” Ia o Jiutasa, oya o koya e na qai soli i Koya laivi, a qai sauma ni kaya “Rapai, o au beka?” E mani tukuna yani vua o Koya, “O iko o sa kaya mai.”
Maciu 26:14-25



Wilika Talega Ke Rawa
Same 41:9; Vakaibalebale 11:13; Marika 14:10-25; Luke 22:3-23; Joni 13-17.

Na Vosa Vakatautauvata Me Baleta Na Veivaini.

Na iTakitaki ni iKava ni Siga ni Noveba

Oti sa qai tekivu o Koya me cavuta vei ira na tamata, na vosa vakatautauvata oqo: “E dua na tamata a tea e dua na loganivaini, lisitaka vei ira na dauqaravivaini, qai lako i na dua na vanua yawa, me dua na gauna balavu. “Ia e na gauna ni tata­musuki, a qai tala e dua na nona dauniveiqaravi vei ira na dauqaravivaini, me rawa ni ra solia mai vua eso na vuata mai na loganivaini. Ia o ira na dauqaravivaini era a qai mokulaki koya, era qai vakatalai koya me lesu lala. Oti a baci tala e dua tale na daunivei­qaravi; ia era qai mokulaki koya talega, vakamadualaki koya, era qai vakatalai koya me lesu lala. E baci tala tale yani e dua tale me kena ikatolu; ia era qai vakamavoataki koya talega, era qai talaci koya laivi. Sa qai kaya na itaukei ni vei­vaini, ‘Na cava beka meu cakava? Au sa na tala na luvequtagane daulomani. De dua era na dokai koya ni ra raici koya.’ Ia ni ra sa raici koya o ira na dauqaravivaini, era qai veinaki vakataki ira, ni ra kaya, ‘O koya oqo e na qai nona iwasewase vakataukei na were. Lako mai, laiva meda vakamatei koya, me rawa ni noda na nona iwasewase vakaitaukei.’ Era sa qai talaci koya laivi mai na loganivaini, ka vakamatei koya. Na cava beka sa na cakava na itaukei ni loganivaini vei ira oqo? E na lako mai o koya vakataki koya, me mai vakamatei ira na dauqaravivaini, qai veisoliyaka na vei logavaini vei ira tale eso”. Ia ni ra sa rogoca oti oqori, era qai kaya vata kece, “E na sega vakadua! Sa qai wanonovi ira o Koya, qai kaya, “Ia na cava ga oqo e volai tu:

‘Na vatu era a besetaka na dautara
vale,
Sa yaco me ulu ni ivakadei e na tutu ni
vale’?

O koya ga e lutu i na dela ni vatu oqori, e na kavoro, ia o koya e lutuki koya na vatu oqori, e na vuruqaqi i koya me pauta. O ira na bete levu kei ira na vunivola, e na gauna vata oqori era sa vaqara tiko e dua na sala me ra vesuki Koya kina, ia era a ravataki ira tiko na tamata - baleta era kila ni a cavuta na vosa vakatautauvata oqo me baleti ira.
Luke 20:9-19



Wilika Talega Ke Rawa
Same 118; Maciu 21:33-46; Marika 12:1-12

Curu Vakatui O Jisu.

Na iTakitaki ni iKatolu Ni Siga ni Noveba

A qai yaco, ni toso volekata yani na koro e rua o Pecivaiqi kei Pecani e na yasa ni ulunivanua e vakatokai na Veiolive, ni a qai tala o Koya e rua vei iratou na Nona tisaipeli, ni kaya, “Lako i na koro e tu donui kemudrau tu mai oya, e na vanua, ni drau sa curu yani, e vesu tu kina e dua na luveni asa, e se bera ni dua e bau vodoka vakadua. Drau sereka, drau tuiya mai i ke. “Ia ke dua e tarogi kemudrau, ‘Na cava drau sereki koya tiko kina?’ drau qai kaya ga vaka oqo, ‘Baleta na Turaga (Sovereign) e gadreva me vakayagataki koya’.” Rau sa mani lako o rau na talai, rau qai raica na ka kece, me vaka sara ga a tukuni vei rau. Ia e na gauna rau se sereka tiko kina na luveni asa, a qai tarogi rau na kena itaukei, “Na cava drau sereka tiko kina na luveni asa?” Rau kaya sara, “Na neirau Turaga (Sovereign) e gadreva me vakayagataki koya.” Rau qai kauti koya mai vei Jisu (Yahshua). Oti rau qai kolo na nodrau isulu e na dakuni luveni asa, rau qai vakavodoki Jisu (Yahshua) kina. Ia ni sa toso tiko o Koya, era qai tevuka tiko na nodra isulu e na dela ni gaunisala. E na gauna eratou sa volekata kina na baba ni Ulunivanua ni Veiolive, o ira kece na ibinibini tisaipeli era sa qai kaila e na mamarau kei na vakavinavinaka Vua na Kalou (Elohim), e na domo levu, e na vuku ni cakacaka lelevu era sa raica,
ni ra kaya,

“‘Me kalougata na Tui e lako mai
e na yaca ni TURAGA (Yahweh)!’
Na veiyaloni me yaco mai Lomalagi,
ka me lagilagi na veivanua sa cecere sara.”

Eso na Farisi era qai kaila yani Vua, mai na kedra maliwa na le vuqa, “Rapai (Rabbi), vosataki ira na Nomu tisai­peli.”
Ia qai sauma o Koya ni kaya vei ira “Au kaya vei kemuni, kevaka me ra vagalui o ira qo, na veivatu era na kaila cake mai.”
- Luke 19:29-40



Wilika Talega Ke Rawa
Same 118; Maciu 21:1-9; Marika 11:1-10

Lumuti O Jisu Ni Voleka Na Nona Veibulu.

Na iTakitaki ni iKarua ni Siga ni Noveba

Ni vo tiko e ono na siga me yaco na Lakosivia, a qai lako mai o Jisu (Yahshua) i Pecani, i na korolevu nei Lasarusa, na turaga a sa mate oti, ia qai vakatura o Koya mai na mate. E keya e a vakayacori Vua e dua na ivakayakavi; ka vakarau kakana kina o Maca, ia o Lasarusa a bau dua vei ira na kana tiko e na teveli vata kei Koya. Oti sa qai taura o Meri (Miriam), e rua na kilo na waiwai narita sau levu dina, qai lumuta kina na yava i Jisu (Yahshua), qai qua e na drauniuluna. E a qai kuvuraki tu e lomanivale taucoko, na iboi totoka ni waiwai oqo. Ia qai vosa e dua vei iratou na tisaipeli, o Jiutasa Isikarioti, na luvei Saimoni, o koya vei iratou e na qai soli i Jisu (Yahshua) laivi, ni kaya, “Na cava a sega ni volitaki ga kina na waiwai boi totoka oqo, e na isau e vitusagavulukalima na dola, me qai soli vei ira na dravu­dravua?” Qori a kaya o koya, sega baleta ni galeleti ira na dravudravua, ia baleta ga ni tamata butabutako, ka dau tiko vua na kato ni ilavo; ka sa vakawasoma na nona dau taura na ilavo e biu yani kina. E kaya sara o Jisu (Yahshua), “Laivi koya tiko; e a maroroya tiko mai oqori o koya, me baleta na Noqu veibulu. “O ira na dravudravua era na dau tiko kei kemuni e veiveigauna, ia o Au, oni na sega ni tiko vata kei Au e veiveigauna.”
Ia e levu vei ira na Jiu era kila ni sa tiko e keya o Koya, ia era dau lako mai, sega walega e na vuku i Jisu (Yahshua), ia me rawa talega ni ra raici Lasarusa, o koya e a vakatura o Koya mai na mate. Ia o ira na bete levu era sa bosea oti, me na vakamatei talega o Lasarusa baleta e na vukuna sara ga, e levu na Jiu era sa toso tiko yani kina me ra vakabauti Jisu (Yahshua).
-Joni 12:1-11



Wilika Talega Ke Rawa
Same 16:9-11; Maciu 26:6-13; Marika 14:3-9; Luke 7:36-50;

Joni 11

Sikova Na Tamata iValavala Ca O Jisu.

Na iTakitaki ni iMatai ni Siga ni Noveba

E curu sara i Jeriko o Jisu (Yahshua), qai lai takosova na lomanikoro. A bula voli mai kea e dua na turagautuniyau, na nodra iliuliu na dau kumuni ivakacavacava, na yacana o Sakiusa. Sa dua na ka na nona via raici Jisu, me kila se tamata sara mada vakacava o Koya, ia qai sega ni raici Koya rawa, baleta era sa osodrigi tu mai na tamata, qai rui bulicaki lailai o koya vakataki koya. Sa mani cici i liu, me lai kaba toka ena dua na vunilolo, taudonuya na sala e muria tiko yani o Koya.
Ia ni sa donuya yani na vanua oya o Jisu, sa rai cake sara me raici koya, qai kaya vua, “Sakiusa, vakatotolo sara, sobu mai, baleta au na tiko e nomu vale nikua.” E totolo na nona siro i ra, qai kidavaki Koya ena yalomarau.
Ia nira raica qori, era qai vosa kudru­kudru, “Sa lako me lai nona vulagi e dua na tamata ivalavala ca o Koya.”
Oti sa tu sara o Sakiusa qai kaya Vua na Turaga (Master), “Raica qo, noqu Turaga (Master), au sa solia na veimama ni noqu iyau vei ira na dravudravua, ia na ka kece au a taura vakailowa, au na vakalevutaka vaka va, meu qai vakasuka vei ira au a kauta mai vei ira.” E sauma vua o Jisu (Yahshua), “E na siga nikua sa yaco na bula ena vale oqo, ni luvei Eparayama tale ga o koya oqo; baleta a lako mai na Luve ni Tamata, me mai vaqarai ira era sa yali tu, me vueti ira i na bula.”
- Luke 19:1-10


Me vaka ga na kena inaki, me na mate mada vakadua na tamata, sa qai muri mai na siga ni lewa, o Karisito (Messiah) talega, ni sa oti na Nona vakacabori, me colata kina na ivalavala ca ni le vuqa, ena qai lesu mai ena ikarua ni gauna me mai vakabulai ira kece era waraka tiko na Nona lesu mai, ka na sega ni mai galeleta tale na ivalavala ca.
-Iperiu 9:27-28




Wilika Talega Ke Rawa
Isikeli 34:7-16; Marika 2:14-17; Luke 7:36-47