Na iYau Mai Lomalagi

Na iTaki9taki ni iKatolusagavulukadua ni Siga ni Okotopa

Ia, e dua na daunivakavulewa a qai tarogi Koya ni kaya, “Vakavuvuli vinaka, na cava beka meu cakava, meu rawata kina vakaitaukei na bula tawamudu?” Sauma o Jisu (Yahshua) ni kaya vua, “Na cava mo vakatokai Au kina Niu vinaka? E sega ni dua e vinaka, vakavo ga e Dua, oya na Kalou (Elohim)!” O iko o kila vinaka na ivakaro; ‘Kakua ni veidauci’, ‘ Kakua ni laba’, ‘Kakua ni butako’, ‘Kakua ni veibeitaki vakailasu’, ‘Dokai rau o tamamu kei tinamu?’ Oti qai kaya o koya, “Na ka kece oqori au a dau vakamuria tu, mai na gauna au se gone lailai sara kina.” Ia o Jisu (Yahshua) ni rogoca na veika oqori, a qai kaya vua, “E se leqa tiko vei iko e dua na ka. Volitaka na kece e nomu, veivotayaka vei ira na dravu­dravua me tu na nomu iyau mai lomalagi; oti qai lako mai, mo mai muri i Au. Ni rogoca oqori o koya, e a rarawa sara kina vakalevu, baleta o koya e tamata vutuniyau. E na gauna sa raica kina o Jisu (Yahshua) ni sa bikai koya na rarawa levu, e kaya sara o Koya “Sa bau dredre dina ga vei ira e tu vei ira na iyau, me ra na curu i na matanitu ni Kalou (Elohim)! “Baleta e na rawarawa cake vua e dua na kameli me curu basikata na mata ni icula, e na dredre ga vua e dua na tamata vutuniyau me curu i na matanitu ni Kalou (Elohim).” O ira era rogoca oqori era qai kaya, “Ia o cei ga e na qai rawa ni vakabulai?” Ia qai sauma o Koya, “Na ka kecekece e sega ni rawa vua na tamata, e rawa vua na Kalou (Elohim).” Sa qai kaya o Pita, “Raica, keitou sa dui biuta tu yani na ka kece, me keitou mai muri i Kemuni.” Sa mani kaya vei ratou o Koya, “Na ka dina, Au kaya vei kemudou, e sega ni dua e biuta tu yani na nona vale, se nona itubutubu, se tacina, se watina, se o ira na luvena e na vuku ni matanitu ni Kalou (Elohim), me na sega ni ciqoma vakalevu cake sara e na gauna oqo, vata kei na itabagauna se bera mai, na bula tawamudu.”
Luke 18:18-30.



Wilika Talega Ke Rawa
Lako Yani 20:12-16; Vakarua 5:16-20; Maciu 19:16-30;

Marika 10:17-31; I Korinica 13:3.

Na Vakamau Kei Na Veibiu

Na iTakitaki Ni iKatolusagavulu ni Siga ni Okotopa

O ira talega na Farisi era lako yani vua me ra lai vakatovolei Koya, era qai tarogi Koya, “E dodonu beka vakalawa vua e dua na tagane me biuti watina, e na dua ga na iulubale, e rawa?” A qai sauma oqori o Koya ni kaya vei ira, “Oni se sega beka ni wilika ni o Koya e a buli i rau mai na ivakatekivu, ‘a buli rau me dua e tagane, ka dua e yalewa,’ qai kaya, ‘Oqo na vuna, me biuti tamana kina kei tinana e dua na tagane me lai vakaduavatataki vei watina yalewa, me rau yaco me rau ledua ga vakayago? “Qori, rau sa na sega kina ni lerua tale tiko, ka ni rau sa duavata vakayago. O koya oya, na ka sa semata vata tu na Kalou (Elohim), laiva me kakua ni dua na tamata e tasereka” Era baci tarogi Koya tale, “Ia na cava ga qai vakarota kina o Mosese, me volai ga e dua na ivolasui ni sere, oti qai biuti watina laivi?” Sauma o koya vei ira, “O Mosese, baleta na babamatua ni vuniyalomuni, a vakadonuya kina vei kemuni moni sere mai vei ira na watimuni, ia mai na ivakatekivu, qori a sega ni dau vaka kina. “Au na kaya vei kemuni, ni o koya e biuti watina me rau sere, vakavo ga e na vuku ni ivalavala vakasisila ni veidauci, qai vakamautaka e dua tale, e cala e na veidauci; ia o koya e vakamautaki koya e veibiu mai, e cala talega e na veidauci.” O ratou na Nona tisaipeli e ratou qai kaya Vua, “Kevaka e vaka tu oqori na ituvaki ni ka me baleta na tagane vata kei watina, sa na vinaka cake me kua ga na vakawati!” Ia qai kaya vei iratou o Koya, “Na tamata kece e na sega ni ciqoma rawa na ivakamacala oqo, vakavo ga o ira e soli vei ira. “Era tu o ira era na sega ni vakamau, baleta era a sucu ga mai me ra vaka kina mai na ketei tinadra, ka tu eso era na sega ni vakamau, baleta sa vakayacori oti vei ira vakatamata me ra kakua ni vakamau rawa, ka tiko eso era na sega ni vakamau, baleta era nakita ga me ra kakua ni vakamau e na vuku ni matanitu vakalomalagi. O koya e rawa ni ciqoma oqori, laiva me ciqoma.”
- Maciu 19:3-12.



Wilika Talega Ke Rawa
Vakatekivu 1:27; 2:24; Vakarua 24:1-4;
Malakai 2:13-16; Marika 10:2-12; Luke 16:18.

Veivakabulai E Na Siga Ni Vakacecegu O Jisu

Na iTakitaki Ni iKaruasgavulukaciwa ni Siga ni Okotopa

E a veivakatavulici tiko o Koya vei ira e na valenisoro e na dua na Siga ni Vakacecegu Ia raica, e dua na marama a tiko kina, a sa tinikawalu na yabaki na kena tiko vua e dua na yalo velavela dau veivakamalumalumutaki, ka sa kalobi tu kina vakaca na yagona, qai vakavuna oqori na nona sa sega tu ni duri cake rawa vakadodonu. Ia ni sa raici koya o Jisu (Yahshua), sa kacivi koya sara mai Vua, qai kaya vua, “Yalewa, o sa sereki mai na ivau ni nomu maluma­lumu!” E tabaki koya sara e na Ligana, ka sega ni bera ni sa duri cake vakadodonu, qai vakavinavinakataka na Kalou (Elohim). Ia na ivakatawa ni valenisoro a leva­taka na ka a yaco qo, baleta ni a veivakabulai e na Siga ni Vakacecegu o Jisu (Yahshua); qai kaya vei ira na le vuqa, “E ono vakadua na siga e dodonu me cakacaka kina na tamata; sa dodonu ga kina moni lako mai e na veisiga oqori moni mai vakabulai kina, ia me kakua ga e na Siga ni Vakacecegu.” Sa qai sauma vua na Turaga (Master) ni kaya, “Ni dauveivakaisini! O kemuni yadudua, oni sega beka ni dau sereka na nomuni bulumakau se asa mai na nodra vanua ni kana, e na Siga ni Vakacecegu, moni tuiyi ira me ra lai gunu? “E sega beka kina ni dodonu cake vua na yalewa oqo, baleta ni luvei Eparayama, ka sa vesuki koya tu o Setani, - vakasamataka mada - me tinikawalu na yabaki, me sereki mai na ivau oqo e na Siga ni Vakacecegu?” Ia ni sa kaya na veika oqori, o ira kece era dau saqati Koya era qai tini vakamadualaki; ia o ira na le vuqa era a marautaka vakalevu na veika lagilagi a vakayacora o Koya.
- Luke 13:10-17.



Wilika Talega Ke Rawa
Lako Yani 20:8-11; Maciu 12:1-14; Joni 5:1-18 Luke 6:1-11; 14:1-6; Marika 2: 23-3:3.

Taleitaki Ira na Lalai O Jisu

Na itakitaki ni iKaruasagavulukaciwa ni Siga ni Okotopa

Oti, a qai tubu e dua na veileti e na kedratou maliwa, se o cei vei iratou e cecere duadua. Ia o Jisu (Yahshua) ni siqema na vakasama ni vuniyalodratou, a qai kauta mai e dua na gone lailai, me lai duri tu e Yasana, sa qai kaya vei iratou, “O koya e ciqoma na gone lailai oqo e na vukuni Yacaqu, e ciqomi Au; ia o koya e ciqomi Au, e ciqomi Koya e a talai Au mai. Baleta o koya e lolovira duadua e na kemudou maliwa, e na yaco me cecere duadua.”
Luke 9:46-48.


Oti era qai kauti ira mai na gone lalai Vua, me rawa ni mai tabaki ira; ia o iratou na tisaipeli e ratou qai vosataki ira era veikau mai. Ia ni raica qori o Jisu (Yahshua), e a tubu na nona sega ni taleitaka, qai kaya, “Laivi ira na gone lalai me ra lako mai vei Au, kakua ni tarovi ira; baleta o ira sara ga na mataqali vaka oqo e nodra na matanitu ni Kalou (Elohim). Na ka dina Au kaya vei kemudou, o ira era sega ni via ciqoma na matanitu ni Kalou (Elohim) me vaka e dua na gone lailai, e na sega ni dua na sala me ra na curu rawa kina.” E keveti ira yadudua sara o Koya, tabaki ira e na Ligana, oti qai vakalougatataki ira.
Marika 10:13-16.


E na tikinigauna oqori, e a curumi Jisu (Yahshua) kina e dua na marau vakayalo levu qai kaya kina, “Au vakavinavinaka vei Kemuni Tamaqu, Kalou (Sovereign) ni lomalagi kei vuravura, ni Oni vunitaka na veika oqo mai vei ira na vuku kei ira na qaseqase, Oni qai vakaraitaka ga vei ira na gone dramidrami. Me qai vaka tiko kina, Tamaqu, baleta ni rairai talei e Matamuni! Na ka kecekece sa soli oti vei Au, maivei Tamaqu, ka sega ni dua e kila se o cei na Luvena, vakavo ga o Tamana; e sega talega ni dua e kilai Tamana vakavo ga o Luvena, vata kei koya e digitaka o Luvena me vakatakilai Koya vua.”
-Luke 10:21-22.



Wilika Talega Ke Rawa
Same 127:3-5; Maciu 18:1-14; 19:13-15; Marika 9:33-37; Luke 18:15-17.

Vakatavulica Na iWalewale Ni Masu O Jisu

Na iTakitaki ni iKaruasagavulukavitu ni Siga ni Okotopa

A qai yaco ni a masu tiko o Koya e na dua na vanua, ni sa tinia na Nona masu, ni dua vei iratou na nona tisaipeli a qai mai kaya Vua, “Vakavuvuli, vakatavulica mada vei keitou na iwale­wale ni masu, me vaka a cakava o Joni vei ira na nona tisaipeli.”
Sa mani kaya vei iratou o Koya, ‘Ni oni sa masu, kaya:

Tamai keimami mai lomalagi,
Me vakarokorokotaki na Yacamuni,
Me yaco mai na nomuni Matanitu.
Na Nomuni lewa, me vakayacori
E vuravura me vaka ni dau yaco mai lomalagi.
Solia mai e na veiveisiga yadudua, na keimami
kakana, e veiraurau kei na dua na siga.
Vosoti kemami e na vukuni neimami ivalavala ca,
Baleta keimami sa vosoti ira kecekece,
o ira era caka ca tiko vei keimami.
Kakua ni vakayarayarataki keimami
ki na vere,
Ia Moni vueti keimami ga mai na
ca.

Sa qai kaya tale vei ira, “O cei vei kemuni e dua tiko na nona itau, e rawa ni lako vua e na lomaloma ni bogi me lai kerea vua, ‘Noqu itau, solia mada mai vei au e tolu na ibuli, ‘baleta e dua na noqu vulagi e se qai yaco ga mai oqo, mai na nona ilakolako, qai sega sara ga ni dua na ka e tu vei au meu vakarautaka vua’; ia e na qai sauma mai loma o koya, ‘Kakua ni vakaogai au; na katuba levu sa sogo, o ratou na luvequ eratou sa tiko qo vata kei au, me keitou sa moce. Au sa sega ni duri rawa tale yani meu lai solia e dua na ka vei iko.’ Au kaya vei kemudou, e dina ga ni na sega ni duri cake me lai solia vua e dua na ka baleta ni nona itau o koya, ia e na nona cikecike ga e na duri cake mai kina me lai solia na veika cava ga e gadreva. Au kaya vei kemudou, ‘Kerea e na soli vei iko; vaqara o na kunea, tukituki e na dola vei iko.’
-Luke 11:1-9.




Wilika Talega Ke Rawa
Same 89:19-29; Aisea 9:6-7; Maciu 6:6-13; 7:7-11;
Vakatakila 3:14-22.

Na Vakabauta Lailai Kei Na Cakacaka Levu

Na iTakitaki Ni iKaruasagavulukaono ni Siga ni Okotopa

Ia ni ratou sa yaco yani vei ira na le vuqa, a qai lako mai Vua e dua na tagane, tekiduru Vua qai kaya, “Turaga, ni bau lomana na luvequ tagane; baleta sa dau tauvi koya vakaca sara na manu­manu soni; qai vakawasoma na nona dau lutu i loma ni buka­waqa ka vakawasoma talega i loma ni wai. Au a mani kauti koya mai, vei iratou na Nomu tisaipeli, ia eratou qai sega ni vakabulai koya rawa.” E sauma o Jisu (Yahshua) ni kaya, “Oilei, na itabatamata vaka­bauta lalai ka sakasakavakatani; e na vakacava soti na dede ni Noqu tiko vata kei kemuni? E na vakacava soti na dede ni Noqu na vosoti kemuni tiko? Kauti koya mai ke vei Au.” Sa qai vosataka na jimoni, o Jisu (Yahshua), sa mani curu tani mai vua o koya; ka vakabulai na gone mai na tikinigauna sara ga oya. Oti eratou qai lako lo vei Jisu (Yahshua) o iratou na tisaipeli, ratou qai kaya, “Na cava beka keitou a sega ni cemuri i koya rawa kina?” Kaya vei iratou o Jisu (Yahshua), “Baleta ga ni sega na nomudou vakabauta; na ka dina Au kaya vei kemudou, ke tautauvata kei na sore ni musita na nomudou vakabauta, dou na tukuna vua na ulunivanua oqo, ‘Toso mai ke ki keya’ e na qai toso; ka na sega ni dua na ka me dredre vei kemudou. Ia na kena mataqali oqo, e sega ni dau talaci rawa, vakavo ga e na masumasu kei na lolo.” Ia, e na gauna eratou a tiko kina mai Kaleli, a qai kaya vei iratou o Jisu (Yahshua), “Na Luve ni Tamata sa vakarau cakitaki i ligadra na tamata, era na qai vakamatei Koya, ia e na ikatolu ni siga e na qai vakaturi.” Eratou a rarawa dina kina vakalevu.
-Maciu 17:14-23


“Na ka dina Au kaya vei kemudou, o koya e vakabauti Au; na cakacaka Au cakava, e na cakava talega o koya; ia e na cakacaka lelevu cake sara mai na kena sa yaco tiko, baleta Au sa na lesu tale vei Tamaqu. Na veika cava ga oni kerea e na Yacaqu, qori Au na cakava, me vakalagilagitaki kina o Tamada, e na vuku i Luvena tagane.
-Joni 14:12-13.

Wilika Talega Ke Rawa
I Samuela 16:14-23; Marika 9:14-32; Luke 9:37-45; Roma 4:18-21; 11:1-23; Iperiu 3:16-19

Na Veivakamataliataki

Na iTakitaki ni iKaruasagavulukalima ni Siga ni Okotopa

Ia ni sa oti e ono na siga, o Jisu (Yahshua) a qai kauti ratou o Pita, o Jemesa kei Joni i na dua na ulunivanua cere, me ratou lai tu vakatikitiki tu kina vakataki ratou; oti qai vakamataliataka na kena irairai e matadratou. Na Nona isulu e a caliva, ka vulavula kata me vaka na uca cevata, oya e na kena e sega ni dua na dau savasavasa ni vuravura oqo me na vakavulavulataka rawa kina. Oti qai rairai mai o Ilaiya vata kei Mosese, ni rau mai vosa tiko vei Jisu (Yahshua). E sauma o Pita ni kaya vei Jisu (Yahshua), “Vakavuvuli, e vinaka dina vei keitou ni keitou tiko talega eke; vakadonuya me keitou tara e tolu na vale tabatabanikau, me dua na Nomuni, me dua na nei Mosese, ka dua na nei Ilaiya”, baleta ni a sega ni kila se cava me kaya, e na levu ni nodratou domobula. Oti, qai kovuti ratou mai e dua na o; qai rorogo mai na o oya e dua na domo ni kaya, “Oqo na Luvequ daulomani. Rogoci Koya!” E vakasauri, ni ratou qai veiraiyaki tale, eratou sa sega ni raica tale e dua, vakavo ga o Jisu (Yahshua), ni tu vata kei iratou. Ia, ni ratou sa siro tiko mai na ulunivanua, sa qai vakaroti ratou o Koya, me ratou kakua ni tukuna vua e dua na veika ratou a raica, me yacova ni sa vakaturi mai na mate, na Luve ni tamata. Eratou sa mani dau vakamuria tiko vakataki ratou na vosa oqo, ia ratou a dau veitarotarogitaka lo tu ga se cava beka na ibalebale ni vakaturi mai na mate.
-Marika 9:2-10


Ia na Vosa a qai yaco me yago, qai mai vakaitikotiko e na keda maliwa, (keitou qai raica na Nona lagilagi, na lagilagi e kune duadua ga Vua e vakatubura na Tamada), ka levu tu Vua na loloma kei na dina.
-Joni 1:14



Wilika Talega Ke Rawa
Lako Yani 40:33-35; Maciu 17:1-9; Luke 9:28-36; Roma 16: 25-27;

I Timoci 1:17; Jiuta 24:25

O Cei O Jisu?

Na iTakitaki ni iKaruasagavulukava ni Siga ni Okotopa

Ia o Jisu (Yahshua) ni sa yaco i na yasayasa o Sisaria-Filipai, sa tarogi ratou sara na Nona tisaipeli ni kaya, “O cei beka o Au, na Luve ni Tamata, e na nodra nanuma na tamata.” Eratou sauma, “Eso era kaya o Joni na dauveipapitaisotaki, eso o Ilaiya, kei na kena vo o Jeremaia se dua vei ira na parofita.” E kaya sara vei iratou, “Ia vakacava o kemudou, o cei beka o Au e na nomudou nanuma?” Sauma qori o Saimoni Pita ni kaya, “O Kemuni saka na Karisito (Messiah), na Luve ni Kalou (Elohim) bula.” Sauma o Jisu (Yahshua) me kaya vua, “Me nomu na kalougata Saimoni Para-Jona; baleta na lewe kei na dra a sega ni vakatakila oqori vei iko, ia o Tamaqu ga e vakai­tikotiko mai lomalagi. Au na kaya talega vei iko, ni o iko o Pita, ia e na dela ni vatulevu oqo, Au na tauyavutaka kina na Noqu isoqosoqo lotu, ia na matamata i Etesi e na sega ni kinoca rawa. Au sa na solia vei iko na idola ni matanitu vakalomalagi; na cava ga o vauca e vuravura, e na vauci mai lomalagi, kei na cava ga o sereka e vuravura e na sereki mai lomalagi. Oti, sa qai vakaroti ratou na Nona tisaipeli o Koya, me ratou kakua ni tukuna vua e dua ni o Koya o Jisu (Yahshua), na Karisito (Messiah). Me tekivu mai na gauna oya, o Jisu (Yahshua) sa qai tekivu me vakaraitaka vei iratou na Nona tisaipeli, ni dodonu Vua me na lako i Jerusalemi, me lai vakararawataki vaka­levu e ligadra na qase ni lotu, na bete levu, kei na vunivola, oti me qai vakamatei, ia me na qai tucake tale e na ikatolu ni siga.
- Maciu 16:13-21



Wilika Talega Ke Rawa
Aisea 52:14-15; Marika 8:27-33; Luke 9:18-22;

Joni 6:67-71.

Vakania E Le Limanaudolu O Jisu

Na iTakitaki ni iKaruasagavulukarua ni Siga ni Okotopa

Ia ni matacake o Jisu (Yahshua), a qai raica na ibinibini tamata levu era sa toso tiko mai Vua, qai kaya sara vei Filipe o Koya, “Evei beka tou na voli madrai rawa kina me ra kania o ira qo?” Qo a kaya o Koya me vakatovolei koya ga kina, baleta o Koya vakataki Koya e sa kila oti tu na ka me na cakava. Sauma Vua o Filipe, “Ke tou volia mada ga e limasagavulu na dola na ibuli madrai, e na sega tikoga ni rauta, ke vinakati me ra wase vakalalai o ira kece qo!” E dua vei iratou na tisaipeli, oya o Adriu na taci i Saimoni Pita a qai kaya yani Vua, “E dua na gone tagane lailai e tiko qo, e tiko vua e lima na ibuli madrai-parile, kei na rua na ika lalai, ia e na sega na betena e na kedra maliwa na le vuqa. E kaya sara o Jisu (Yahshua), “Cakava me ra dabe kece e ra na tamata.” E a veico vinaka tu na vanua oya. Era sa mani dabe kece na tamata, e rauta na limanaudolu na kedra iwiliwili. Sa taura sara na ibuli o Jisu (Yahshua), ia ni sa cavuta oti e dua na kena vakavinavinaka, sa qai wasea vei ira na tisaipeli, era qai veivotayaka na tisaipeli vei ira era sa dabe tu. E vaka kina na ika, e na kena ilevu ga era vinakata. Ia ni ra sa mamau, sa qai kaya o Koya vei iratou na Nona tisaipeli, “Soqona mai na meme ni kakana era sa vo tu, me kakua ni dua na tikina e yali.” Eratou sa mani tomitomi, ratou qai vakasinaita e tinikarua na sova sisinai na vovo ni lima na ibuli madrai-parile, era a vo tu, mai vei ira era a kana. Ia o ira na tamata oya ni ra sa raica na ivakatakilakila sa cakava qo o Jisu (Yahshua), era qai kaya, “Oqo dina ga na Parofita e kainaki ni na lako mai i vuravura.
-Joni 6: 5-14

Wilika Talega Ke Rawa
Vakarua 8:2-3; Maciu 14:13-21; Marika 6:32-44;
Luke 9:10-17.

Vakadiloya Na Lailai Ni Vakabauta O Jisu

Na iTakitaki ni IKaruasagavulukarua ni Siga ni Okotopa

Era baci sosoqoni tale yani na le vuqa, qai vakavuna oqori na nodratou sa sega mada ga ni kana madrai rawa. Ia ni ratou sa rogoca na veika oqo na wekana, era qai via lai kauti Koya laivi mai, baleta eratou nanuma, ‘O Koya, e sa rairai leqa na uluna!” Ia o ira na vunivola era a lako sobu mai Jerusalemi era qai kaya, “E tiko Vua o Pielisipapa,” ka kuria “E na nodra daunivakavulewa na jimoni, e cemuri ira tiko kina na jimoni o Koya.” Sa mani kacivi ira vata mai Vua, qai vosa vei ira e na vosa vakatautauvata, “E rawa vakacava vei Setani me cemuri Setani? Ke dua na matanitu e sa tawase tiko vakataki koya, na matanitu oya e na sega ni tudei rawa. Ke dua na matavuvale e tawase tiko vakataki koya, na matavuvale oya e na sega ni tudei rawa Ia kevaka sa tu o Setani me valuti koya tale vakataki koya, ka sa tawase, e sa na sega ni tudei rawa o koya, ia sa yacova yani e dua na itinitini. E sega ni dua e na curuma na nona vale e dua na tamata qaqa, me lai kovea mai na nona iyau, vakavo ga ke vesuka rawa mada na tamata qaqa oya; oti sa na qai rawa ni vakayayana e na nona vale. Na ka dina Au kaya vei kemuni, na ivalavala ca kece e na vosoti vei ira na luve ni tamata, ka vaka kina na vosa ni veivakacacani cava ga era kaya; ia o koya e vosa vakacacataka na Yalo Tabu, e na sega ni vosoti rawa, baleta ni sa coko tu e na itotogi e tawamudu o koya; ia qori a kaya o Koya, baleta ni ra kaya Vua, “Sa curumi Koya tu e dua na yalo velavela.”
-Marika 3:20-30



Wilika Talega Ke Rawa
Lako Yani 22:28; Same 106:1-37; Maciu 12:22-37;

Maciu 13:53-58; Marika 6:1-6; Luke 11:14-23; 12:10.

Na Vakabauta Kei Na Veivakabulai

Na iTakitaki ni iKaruasagavulukadua ni Siga ni Okotopa

Ia ni se vakamacalataka tiko na veika oqori vei ira, raica ni a lako yani e dua na iliuliu, tama vakarokoroko yani Vua qai kaya, “Na luvequ yalewa e se qai ciba wale toka ga oqo, ia Moni lako ga mai, moni mai tabaki koya e na Ligamuni, e na qai bula tale o koya!” Sa tu sara o Jisu (Yahshua), me muri i Koya; era qai muri i Koya talega na Nona tisaipeli. Ia raica ni a lako mai dakuna e dua na yalewa, sa tinikarua na yabaki na nona tauvi turudra balavu tu, qai tara na bele ni Nona kote balavu; baleta a dau kaya voli e lomana, “Kevaka meu tara rawa ga na Nona isulu, au sa na vakabulai vakadua.” E a saumaki lesu mai o Jisu (Yahshua), ia ni sa raici koya o Koya, e qai kaya o Koya, “Luvequ yalewa, mo yalovakacegu tiko; na nomu vakabauta sa vakabulai iko.” E a vakabulai na marama oya mai na tikinigauna oqori. Ia ni sa yaco yani i nona vale na iliuliu o Jisu (Yahshua), qai raici ira na dau uvu ivakatagi bitu, kei ira na le vuqa kosakosa ni ra qoqolou tiko, sa kaya sara vei ira o Koya, “Ni vagalala mada; baleta na goneyalewa e se sega ni mate ka ni moce lutu no ga”. Era mani dredrevaki Koya me ra vakalialiai Koya. Ia ni ra sa vagalalataki oti o ira na le vuqa, sa qai curu i loma o Koya, tuberi koya cake e ligana, sa matacake sara na goneyalewa. Na itukutuku ni ka a yaco qo, a qai tete i veivanua kece.
-Maciu 9: 18-26;

E dua beka e na kemuni maliwa e yalorarawa tiko? Laivi koya me masu. E dua beka e mamarau tiko? Laivi koya me laga same. E dua beka e na kemuni maliwa e tauvi mate tiko? Laivi koya me kacivi ira na qase ni lotu, qai laivi ira me ra masulaki koya, ni ra sa lumuti koya tiko e na waiwai, e na yaca ni Turaga (Master). Na masu ni vakabauta e na vakabula na tauvi mate, ia na Turaga (Yahweh) e na qai vakaturi koya cake. Ke a vakayacora na ivalavala ca o koya, qori e na vosoti vua. Moni dau vakatusa e na kemuni maliwa na nomuni ivalavala ca, ka dau veimasulaki vakataki kemuni, me rawa ni oni vakabulai. Na mana ni nona vakatamamasu vagumatua na tamata yalododonu, e vakaitamera na ka e rawata.
-Jemesa 5: 13-16


Wilika Talega Ke Rawa
Apakuki 2:4; Maciu 9:27-30; Marika 5:21-43;

Luke 7:1-10, 36-50, 40-56; 17:11-19; 18:35-43.

Lewa Na Cagilaba Kei Na Yalo, O Jisu

Na iTakitaki ni iKaruasagavulu ni Siga ni Okotopa

Ia ni sa lai vodo e na dua na waqa, e ratou qai muri i Koya yani na Nona tisaipeli. Qai vakasauri na kena tubu e dua na cava kaukaua e wasawasa, a mani vodo na ua i loma ni waqa. Ia a moce lutu no ga o Koya. Eratou mani lako Vua na Nona tisaipeli, me ratou vakayadrati Koya, ni ratou kaya, “Vakavuvuli, vueti kedatou! Tou sa rusa tiko!” Ia a qai vosataki ratou o Koya ni kaya, “Na cava dou sa rui domobula kina, baleta beka ni rui lailai na nomudou vakabauta?” Oti, sa qai matacake ka vosa­taka na cagi kei na wasawasa. Sa qai yaco e dua na maravu levu. Era a qoroqoro na tamata ni ra kaya “Na tamata mada vakacava o koya qo; na cagi mada ga kei na biau e talairawarawa Vua?” Ni sa yaco yani i tai kadua o koya, e na vanua vaka Katarini, rau sa tavaki Koya tu mai e rua na tamata rau sa curumi jimoni tu, ka rau lako vaka­dodonu sara ga mai na ibulubulu, rau vakadomobula, ka sa sega ga kina ni rawa vua e dua me takosova na yasayasa oya. Vakasauri rau sa kaila cake rau qai kaya, “Na cava mada e neimami ka vei iko, Jisu (Yahshua) na Luve ni Kalou (Elohim)? O lako beka mai ke, mo mai vakararawa­taki keimami ni se bera na kena gauna?” Ia e na dua na vanua e yawa toka mai vei iratou, era a kana tu kina e vica vata na qeleni vuaka. Era mani kerekere vua o ira na jimoni, ni ra kaya, “Kevaka o cemuri keimami, ia vakadonuya me keimami lako i na kedra maliwa na qeleni vuaka.” E kaya sara o koya vei ira, “Lako”. Ni ra sa curu laivi mai; era a lako vaka­dodonu sara vei ira e na qeleni vuaka. Ia raica, ni ra a qai tabaka na cici na qeleni vuaka taucoko, me ra sa ciciva sobu e na kena i gu, na baba tonidromuca oya me yaco vakadua i loma ni drano, era qai lai rusa vakadua e loma ni wai.
-Maciu 8:23-32


Wilika Talega Ke Rawa
Vakarua 14:8; Aisea 65:1-4; Marika 4:35-5:20;
Luke 8: 22-39.

Vakabulai na Tauvimate; Vosoti Na iValavala Ca

Na iTakitaki ni iKatinikaciwa ni Siga ni Okotopa

A qai yaco e na dua na siga, ni veivaka­tavulici tiko o Jisu (Yahshua), ni ra a dabe tale toka ga e na kedra maliwa eso na Farisi kei na so na qasenivuli ni lawa, era a lako mai na vei korolevu tale eso mai Kaleli, mai Jiutia vata kei Jerusalemi. Ia na kaukaua ni Kalou (Yahweh) a tiko vua me vakabulai ira kina. E na gauna vata oqori, raica, ni so na tamata era a laveta tiko mai e na dua na idavodavo, e dua na tamata paralasi. Eratou a segata me ratou mai vako­tori koya sara ga e matana. Ia ni ratou sa sega ni kunea e dua na sala me ratou kauti koya mai kina i loma, baleta na osodrigi ni tamata, ratou qai kaba cake i delanivale, ratou qai lai tukuci koya sobu mai na delavuvu, e na nona idavodavo, me vaka­dodonu sobu e na kedra maliwa, taudonui Jisu (Yahshua). Ia ni sa raica na nodratou vaka­bauta, e kaya sara vua o Koya, “Tagane! Na nomu ivalavala ca sa vosoti e na vukumu.” O ira na vunivola kei ira na Farisi era qai tekivu veiba ni ra kaya, “O cei qo e vosa veivakacacani tiko! O cei tale e rawa ni bokoca na ivalavala ca, ia na Kalou (Elohim) duadua ga?” Ia ni sa siqema na nodra vakasama o Jisu (Yahshua), sa qai sauma ni kaya vei ira, “Na cava oni yalotarotaro tiko kina e vuniyalomuni?
“Na cava e rawa­rawa cake me tukuni, ‘Na nomu ivalavala ca sa vosoti e na vukumu,’ se me tukuni, ‘Matacake, lako?’ Ia baleta ni vinakati moni kila ni tu Vua na Luve ni Tamata na kaukaua me vosota e vuravura na ivalavala ca ” - E kaya sara vua na tamata tauvi paralasi, “Au kaya vei iko, matacake, taura na nomu idavodavo, lako i nomu vale.” E na tikinigauna oqori, e matacake kina o koya e matadra, taura cake na nona idavodavo a koto no kina, ka lesu i nona vale e na yalo ni vakavinavinaka vua na Kalou (Elohim). Era sa qoroqoro kecega; era qai vakalagilagitaka na Kalou (Elohim), ka ra vakasinaiti e na rere, ni ra kaya, “Eda sa qai raica eso na ka veivakurabuitaki dina edaidai.”
-Luke 5:17-26


Wilika Talega Ke Rawa
Same 25:1-11; Maika 7:18; Maciu 9:1-8;
Marika 2:1-12.

Kaciva Na iMatai Ni Tisaipeli O Jisu

Na iTakitaki ni iKatinikawalu ni Siga ni Okotopa

A qai yaco e na dua na gauna, ni duri tu e na matasawa ni Drano o Seni­saireti, ni ra a veidrigidrigi wavokiti koya tiko na le vuqa, e na nodra via rogoca na vosa ni Kalou (Elohim). A mani raica e rua na waqanisiwa ni rau kele tu e na matasawa ni drano; ia era a sa sobu oti na gonedau ka ra sa savuya tiko na nodra lawa ni qoli. Sa mani vodo e na dua vei rau na waqa o Koya, qo e taukena o Saimoni, qai kerei koya me biliga i wai, me lai ciri toka mai wai. Oti sa qai dabe sobu o Koya, me vakata­vulici ira na le vuqa mai na waqa. Ia ni sa vosa oti, sa qai kaya vei Saimoni o Koya, “Tou toso mada i wai titobu, mo lai kolo kina na nomu lawa, me tou rawata eso na ika.” Ia o Saimoni a qai sauma ni kaya Vua, “Vakavuvuli, keitou a cakacaka tiko e na bogi taucoko, ia keitou a sega ga ni rawata e dua na ka; ia e na vuku ga ni Nomuni vosa, au sa na kolo tale kina na lawa.” Ia ni ratou sa vakayacora qori, eratou sa qai rawata e dua na ibinibini ika levu, ka sa tekivu me botea na nodratou lawa. E ratou sa mani yalovi ratou na nodra­tou icaba e na waqa kadua, me ratou mai veivuke vei iratou. Eratou toso sara mai eratou qai vakasinaita na waqa ruarua, me yacova ni rau sa tekivu viavia dromu tale. Ia ni raica qori o Saimoni Pita, sa tekiduru sobu i na durui Jisu (Yahshua) qai kaya, “Lako tani mai vei au, baleta au tamata ivalavala ca, Turaga (Master)!” Qori, baleta ga ni a vakidacalataki koya vata kei iratou na nona icaba, na ilevu ni ika eratou sa rawata qo; ka vakatalega kina vei rau o Jemesa (Jacob) kei Joni, o rau na luvei Sepati, o rau na icaba nei Saimoni. E kaya sara o Jisu (Yahshua) vei Saimoni, “Kakua ni rere. Me tekivu qo lako yani, o sa na dau gonedau ni tamata.” Ia ni ratou sa sokotaka lesu mai na nodratou waqa me sa mai kabi i vanua, eratou a qai vakanadakuya na veika kece, me ratou sa muri i Koya.
-Luke 5: 1-11





Wilika Talega Ke Rawa
Same 51:1-13; Maciu 4:18-22; Marika 1:16-20;
Joni 1: 35-51.

E Dodonu Mo Na Sucu Tale

Na iTakitaki ni iKatinikavitu ni Siga ni Okotopa

A bula voli e dua na tamata vei ira na Farisi, na yacana o Nikotimo, ka iliuliu e na kedra maliwa na Jiu. O koya vata ga oqo a lako vei Jisu (Yahshua) e na dua na bogi, qai kaya Vua, “Rapai, kei­mami kila ni o Kemuni na ivakavuvuli Oni lako mai Vua na Kalou (Yahweh); baleta e sega ni dua na tamata e rawa ni cakava na cakacaka mana Oni cakava tiko, vakavo ke tiko vata kei koya na Kalou (Elohim).” Sauma o Jisu (Yahshua) ni kaya vua, “Na ka dina Au kaya vei iko, vakavo ke sa sucu tale e dua na tamata, o koya e na sega ni raica na matanitu ni Kalou (Elohim)!” Kaya o Nikotimo Vua, “E na rawa vakacava vua e dua na tamata me sucu ni sa qase tu? E rawa beka vua me curu lesu i ketei tinana, me qai sucu tale?” Sauma o Jisu (Yahshua), “Na ka dina, Au kaya vei iko, vakavo ga ke sucu e na wai kei na Yalo e dua na tamata, e na sega ni rawa vua me curu i na matanitu ni Kalou (Elohim).
-Joni 3:1-5


Sauma o Nikotimo ni kaya Vua, “E rawa vakacava na veika oqo.” Sauma o Jisu (Yahshua), ni kaya vua, “O iko beka o qasenivuli vei ira na Isireli, o qai sega ni kila na veika oqo?
-Joni 3:9-10


“Kevaka Au tukuna vei iko na veika vakavuravura o qai sega ni vakabauta, o na qai vakabauta rawa vakacava kevaka Au tukuna vei iko na veika vakalomalagi? E sega ni dua e se bau cabe cake i lomalagi vakavo ga o Koya e a siro mai lomalagi, oya na Luve ni Tamata, o koya e tiko mai lomalagi. “Ia me vaka na nona a laveta cake na gata o Mosese, mai lekutu, e vinakati talega me laveti cake vakakina na Luve ni Tamata, me rawa kina vei koya e vakabauti Koya, me kakua ni rusa, ia me rawata ga na bula tawamudu. “Baleta na Kalou (Yahweh) e na vakataimera ni Nona lomani vuravura, e a solia kina na Luvena duabau a vakatubura, me kakua ni rusa o ira yadua era vaka­bauti Koya, ia me ra rawata ga na bula tawamudu. “Baleta na Kalou (Yahweh) a sega ni talai Luvena mai i vuravura me mai vakarusa na vuravura, ia me mai vueta ga na vuravura e na vukuna.
-Joni 3:12-16



Wilika Talega Ke Rawa
Lekutu 21:1-9; Joni 1:1-13; I Pita 1;
I Joni 2:28-29; 3:1-10; 4:7-8; 5.

Na iMatai Ni Cakacaka Mana

Na iTakitaki ni iKatinikaono ni Siga ni Okotopa

E na ikatolu ni siga, e a yaco e dua na vakamau mai Kana e Kaleli, ia o tinai Jisu (Yahshua) a tiko kina. O Jisu (Yahshua) vata kei ratou na Nona tisaipeli, eratou a sureti talega i na vakamau. E na gauna sa maca koso kina na waini, o tina i Jisu (Yahshua) a qai mai tukuna Vua, “Sa sega vei iratou na waini!” E kaya sara vua o Jisu (Yahshua), “Yalewa, na cava beka e noqu e na ka o leqataka mai qo? Na noqu gauna e se bera ni yaco mai.” E kaya sara o Tinana vei ira na dauniveiqaravi, “Na ka ga e kaya vei Kemudou o Koya, dou cakava.”
-Joni 2:1-5


E kaya sara vei ratou o Jisu (Yahshua), “Dou tawana na saqavatu e na wai.” Eratou tawani ira sara me ra sisinai. Oti sa qai kaya o Koya vei iratou, “Dou takiva yani eso, dou kauta vua na tuirara ni soqo ni vakamau”. E ratou takiva sara. Ia na tuirara ni soqo ni vakamau, ni sa tovolea na wai sa vuki tu oqo me waini, qai sega ni kila se kau mai vei (o ratou ga na dauniveiqaravi ratou a lai taki wai mai eratou kila), sa kaciva sara na taganevou o koya. E kaya sara vua o koya, “Na tamata kece era dau vakarautaka sara ga e liu na waini vinaka, me tekivu kina na soqo, ia ni ra sa gunu vakalevu sara tu ga na vulagi, sa qai dau vakarau mai na kena e sega soti ni vinaka; ia o iko, o maroroya tu na waini vinaka me yacova mai oqo.” Oqo na imatai ni cakacaka mana me cakava o Jisu (Yahshua), oya mai Kana e Kaleli, me vakaraitaka kina o Koya na Nona lagilagi; eratou qai vakabauti Koya kina na Nona tisaipeli.
-Joni 2:7-11


E levu sara na ka a vakayacora o Jisu (Yahshua), ia kevaka me ra a volai yadudua kece, au vakabauta ni na lailai mada ga na vuravura oqo, ke via maroroi kina na ivola tuku­tuku taucoko sara era na volai. Emeni.
-Joni 21:25



Wilika Talega Ke Rawa
Aisea 55; Joeli 3:16-18; Emosi 9:11-15;
Joni 20:30-31

Vakatovolei Jisu Na Tevoro

Na iTakitaki ni iKatinikalima ni Siga ni Okotopa

Oti sa qai vakayarayarataki Jisu (Yahshua) i vei­kauloa na Yalo me lai vakatovolei Koya kina, na tevoro. Ia ni sa lolo o Koya, me vasagavulu (40) na siga kei na vasagavulu (40) na bogi, a qai yaco Vua e muri na walokai. Ekeri sa qai toso mai kina Vua na daunivere, qai kaya Vua, “Kevaka o iko na Luve ni Kalou (Elohim), vakarota na veivatu oqo me ra madrai!” Ia qai sauma o Koya ni kaya, “E volai tu ‘Na tamata e na sega ni bula mai na madrai duadua ga, ia mai na veimala ga ni vosa e rogo mai na gusu ni Kalou (Yahweh).’” Oti sa qai kauti Koya cake, na tevoro, i na korolevu tabu, vakatokari Koya e na doka ni valenisoro, qai kaya Vua, “Kevaka o iko o Luve ni Kalou (Elohim), rika sobu. Baleta e volai tu:

‘E na qai talai ira mai na Nona agilosi
me ra mai qaravi iko,

“qai kuria,

‘E na ligadra, era na tabei
iko cake,
De qai tavutu na yavamu e na dua na gauna,
e na dua na vatu.’”

Sauma o Jisu (Yahshua), “E volai tale tu ga, ‘Mo kakua ni vakatovolea na TURAGA (Yahweh) na nomu Kalou (Elohim).’”
Oti e baci kauti Koya tale na tevoro i na dua na ulunivanua cecere sara, sa qai lai vaka­raitaka Vua mai keya, na veimatanitu kecekece e vuravura, vata kei na kedra dui lagilagi. Sa qai kaya Vua o koya, “Na veika kece oqori, au na solia vei iko, kevaka mo cuva sobu mo vakarokoroko mai vei au.” E kaya tale vua o Jisu (Yahshua), “Lako tani i dakuqu, Setani! Baleta e volai tale ga, ‘Mo dau vaka­rokorokotaka ga na TURAGA (Yahweh) ga na nomu Kalou (Elohim), io o Koya duadua ga mo dau qarava.’” Sa qai biuti Koya na tevoro, ia raica, ni ra qai lako mai na agilosi, me ra mai qaravi Koya.
- Maciu 4:1-11



Wilika Talega Ke Rawa
Vakarua 6:13, 16; 8:3; Same 91:11-12;
Marika 1:12-13; Luke 4:1-3

Papitaiso O Jisu

Na itakitaki ni iKatinikava ni Siga ni Okotopa

Na ivakatekivu ni Nona itukutuku vinaka o Jisu Karisito (Yahshua Messiah) na Luve ni Kalou (Elohim). Me vaka sa volai tu e na Parofita;

“Raica, Au sa tala yani na Noqu italai me liu yani e Matamuni, o Koya me na caramaka na Nomuni sala;
“Na domo ni dua e kacikaci tiko e veikauloa;
‘Ni caramaka na sala ni TURAGA (Yahweh),
Ka vakadodonutaka na kena salatu’”

O Joni a veipapitaisotaki voli e loma ni veikauloa, ka vunautaka voli na veipapitaisotaki ni sa yaco na veivutuni, me rawa na veibokoci ni ivalavala ca. O ira kece e na vanua vaka Jiutia kei ira mai Jerusalemi, era a lako yani vua, era qai papitaiso mai vua e na uciwai na Joritani, ni ra sa vakatusa oti na nodra ivalavala ca. Ia o Joni, a dau vakaisulu e na vutinikameli, ka dau vau na tolona e na beleti leca, qai dau kania na vodre kei na denioni ni veikau. A dau vunau voli o koya, ni kaya, “E muri i au tiko mai e Dua e cecere cake vei au; na ivesu mada ga ni Nona ivava, e sega ni kilikili vei au meu roso sobu meu sereka. “Au papitaisotaki kemuni tiko e na wai, ia o Koya e na papitaisotaki kemuni e na Yalo Tabu.” A qai yaco e na veisiga oya, ni a lako mai Nasareci e Kaleli o Jisu (Yahshua), qai mai papitaiso vei Joni e na Joritani. E na gauna e lamata cake kina i dela ni wai, e a qai raica na lomalagi o Koya ni tawase rua, qai sobuti Koya na Yalo Tabu, e na ibulibuli ni dua na ruve. A qai rogo mai lomalagi e dua na domo, “O iko na Luvequ daulomani, Au dau marau vakalevu e na Vukumu!”
- Marika 1:1-11


Wilika Talega Ke Rawa
Aisea 40:3; Malakai 3:1; Maciu 3; Joni 1:19-34;
Luke 3.

O Jisu E Loma Ni Valenisoro

Na iTakitaki ni iKatinikatolu ni Siga ni Okotopa

O rau na Nona itubutubu, rau a dau lako i Jerusalemi e veiyabaki e na Solevu ni Lakosivia. E na gauna a yabaki tinikarua kina o Koya, eratou a lako cake i Jerusalemi me vaka na ivalavala ni solevu oqo. Ia ni sa oti na veisiga oya, ni ratou sa lesu tiko, na gonetagane lailai o Jisu (Yahshua) e a tiko voli ga mai Jerusalemi.
Ia o Josefa vata kei Tinana rau a sega ni kila oqori; ka ni nodrau nanuma ga ni sa tiko e na ilakolako o Koya, baleta ni sa lai oti sara e dua na siga na nodra itosotoso, rau sa qai vaqarai Koya vei ira na wekadrau vata kei ira na nodrau veikilai. Ia ni rau sega ni kunei Koya, rau qai lesu i Jerusalemi, e na nodrau vaqarai Koya tiko. A qai yaco ni oti tale e tolu na siga, rau qai kunei Koya ni tiko e valenisoro, ni dabe tiko e na kedra maliwa na qasenivuli, me vakarogoci ira tiko, ka vakatarogi ira tale tikoga. Ia o ira kece era rogoci Koya era a kurabui e na titobu ni veika e kila kei na Nona isau ni taro eso. Ia ni rau sa kunei Koya, rau a kurabui dina; qai kaya Vua o tinana,
“Luvequ, na cava Mo cakava kina na ka qo vei keirau? Raica, o tamamu vata kei au, keirau a lomaleqa vakalevu e na neirau vaqarai iko tiko!”
Sa qai kaya vei rau o Koya, “Na cava drau a vaqarai Au kina? Drau a sega beka ni kila ni dodonu Meu na vakayacora tiko na cakacaka nei Tamaqu? Ia rau a sega ni kila na ibalebale ni vosa a kaya qo vei rau o Koya. Sa qai lako mai vata kei rau o koya, ka ratou lako sara i Nasareci, qai dau talatalairawarawa tiko vei rau, ia o tinana a dau katona voli ga na veika oqo e vuniyalona. O Jisu (Yahshua) a qai tubu bulabula tikoga e na Nona kilaka, vata kei na kena ilevu, ka dau taleitaki vakalevu vua na Kalou (Yahweh) vata kei ira na tamata.
- Luke 2:41-52



Wilika Talega Ke Rawa
I Samuela 2: 21, 26; Same 26: 8; 27: 4; 65;
Maciu 2:13-23; Joni 2:13-17; 2 Korinica 4:18-5:4

Sucu O Jisu Karisito

Na iTakitaki Ni iKatinikarua ni Siga ni Okotopa

Na Nona sucu o Jisu (Yahshua), a vaka oqo na kena ituvatuva. E na gauna sa musuki oti kina o Meri (Miriam) na tinana me sa wati i Josefa, a qai kune, ni rau se bera ni tiko vata, ni sa buketetaka tiko na gone ni Yalo Tabu. Ia o Josefa na watina, baleta ni turaga yalododonu, a sega ni via vakamadualaki koya e matadra na lewe vuqa, a qai nakita me rau sa na sere ga vakavuni. Ia ni se vakasamataka voli na veika oqo, raica, e dua na agilosi ni Kalou (Yahweh), a qai rairai vua e na dua na tadra qai kaya, “Josefa luvei Tevita, kakua ni rere mo tauri Meri me watimu baleta o koya e kunekunetaki tiko vua, e vakatuburi mai na Yalo Tabu. “E na qai vakasucuma o koya e dua na Gonetagane, mo na qai vakatoka me yacana o Jisu (Yahshua), baleta o Koya e na vueti ira na Nona tamata, mai na nodra ivalavala ca.” Na veika kece oqo a yaco, me rawa ni vakayacori kina na veika a tukuna na Kalou (Yahweh) e na gusudra na Parofita ni kaya:

“Ni vakaraica, e dua na goneyalewa tabutagane e na kunekunetaka e dua na Gone, e na qai vakasucuma e dua na luvena tagane, era na qai vakatoka me Yacana o Imanueli,” ia qori ni vakadewataki, “Na Kalou (El) sa tiko kei keda.”

Ia o Josefa ni vakayadrati mai na moce, a vakayacora sara na veika a mai vaka­rota vua na agilosi ni Kalou (Yahweh), qai vakamautaka me sa watina, ia a sega ni veiyacovi kei koya, me yacova ni sa vakasucuma oti na luvena tagane ulumatua. A qai vakatoka me yacana o Jisu (Yahshua).
- Maciu 1:18-25





Wilika Talega Ke Rawa
Aisea 7:14; Maciu 2; Luke 1-2; Joni 4:1-42

Jisu: Na Luve Ni Kalou, Na Luve Ni Tamata

Na iTakitaki ni iKatinikadua ni Siga ni Okotova

Au a qai raica e na raivotu e na bogi, niu a raica e dua e vaka na luve ni tamata, ni a lako mai e na o kei lomalagi, ka lako vua na Qase makawa ni Veisiga (Ancient of Days), era qai kauti koya vaka voleka sara vua. Sa qai soli vua na lewa, na vakarokoroko, kei na matanitu: me ra qaravi koya na tamata kece, na matanitu kece kei na duivosavosa. Na nona kaukaua ni vakavulewa e na vakavulewa tawamudu, ka na sega ni takali rawa, kei na nona matanitu e na sega ni vakarusai rawa.
-Taniela 7:13-14


Na Kalou (Elohim), e na veitabagauna eso, a dau vakayagataki ira na parofita e na veimataqali sala eso, me vosa kina vei ira na tukada, ia e daidai, e na ivakataotioti ni gauna, e sa mai vosa vei keda, ka sa mai gusuna o Luvena, o Koya e a lesia o Koya me itaukei ni veika kece, o Koya talega e a bulia kina na veitabagauna: O Koya, baleta ni ramase tiko mai Vua na Nona lagilagi, ka veiucui vakaoti kei Koya na kena irairai, qai taura vata tu na veika kece e na vosa ni Nona kaukaua e na gauna a vaka­savasavataka kina vakataki Koya na noda ivalavala ca, a qai lai dabe e na liga imatau i Koya e cecere duadua mai cake, baleta ni sa lai cecere cake sara mai vei ira na agilosi, ka ni Nona ivotavota ga vakaitaukei, e a qai lai rawata kina e dua na yaca e cecere cake sara mai na yacadra.

O cei vei ira na agilosi e a bau kaya vua o Koya:

“O iko na Luvequ-tagane,
Nikua Au sa vakatuburi Iko”?

oti qai kaya tale,

“Au na wili Vua meu Tamana,
O Koya e na wili vei Au me dua na Luvequ”?
- Iperiu 1:1-5



Wilika Talega Ke Rawa
II Samuela 7:14; I Veigauna 17:13; Same 2:7;
Maciu 23: 63-63; Marika 14: 61-62; Joni 1: 32-34;
Luke 22: 67-70.

Na Yalayala Ni Na Lako Mai O Jisu

Na iTakitaki ni iKatini ni Siga ni Okotopa

Ia oqo, sa qai kaya na TURAGA (Yahweh) –
o koya e a lesi i au mai na bolanigone
meu nona italai,
meu kauti Jekope lesu mai Vua,
ka vaka­soqoni Isireli tale mai vua,
baleta au sa dokai e na mata ni TURAGA (Yahweh),
ka sa noqu kaukaua tiko na noqu Kalou (Elohim),
Ia e kaya o koya,
“E ka lailai wale vei iko mo noqu italai,
mo vueta cake na veimataqali nei Jekope,
qai vakalesui ira mai na Isireli Au a maroroi ira tiko.
Au na cakavi iko talega mo nodra rarama na kai Veimatanitu tani,
mo rawa ni kauta talega mai na noqu veivueti i na iyalayala
kei vuravura.”
-Aisea 49:5-6



“Ia o iko, Peciliema-Efirata,
e dina ga ni o lailai wale vei ira na udolu e Jiutia,
maivei iko e na lako mai e na vukuqu
e dua e na mai vakavulewa e Isireli;
na nona veitosoyaki e se vure sara mai na gauna eliu
mai na veitabagauna tawamudu.”
O koya oya e na guileca tu mada kina,
me yacova na gauna sa na vakasucu kina o koya e taratara tiko:
kei na nodra lesu mai na vo ni tacina
me ra mai duavata kei ira vaka kai Isireli.
E na qai tu o koya, me qaravi ira na nona isolosolo,
e na kaukaua ni TURAGA (Yahweh),
e na lagilagi ni yaca vakaturaga
ni TURAGA (Yahweh) na nona Kalou (Elohim).
Era sa na qai bula vakacegu, baleta na nona cecere
e na tete i na iyalayala kei vuravura.
E na qai yaco o koya me vu nodra bula sautu.
-Maika 5:2-5a).



Wilika Talega Ke Rawa
Vakatakila 35:14-19; Ruci 4:10-17; Maciu 2:1-6
I Samuela 17:12.

Malakai: Na iTalai Ni Veiyalayalati.

Na itakitaki Ni iKaciwa ni Siga ni Okotopa

“Raica, au na tala yani na noqu italai, me na lai caramaka na sala, ni sebera niu yaco yani, vata kei na Kalou (Sovereign) o koya oni vakasaqara, e na qai yaco yani vakasauri me lako i na nona valenisoro; io na italatala ni veiyalayalati oni gadreva, raica e na lako yani,” e kaya na TURAGA cecere (Yahweh of hosts).
Ia o cei e na vorata rawa na siga e na lako yani kina? O cei me na tudei rawa tu e na gauna e basika yani kina o koya? Baleta o koya e na vaka na nona bukawaqa na dausava koula, ka vaka na nodra sovu na dausava isulu: ka na dabe o koya me vakataki koya e dauvakawaicalataka ka vakasavasavataka na siliva. E na vakasavasavataki ira na Livai, qai savai ira me vaka na koula kei na siliva me rawa ni ra vakacabora vua na TURAGA (Yahweh) na imadarali ni yalododonu. Ekeri na imadrali nei Jiuta vata kei Jerusalemi sa na qai donu vua na TURAGA (Yahweh), me vaka e na gauna eliu, e na veitabayabaki sa sivi.
-Malakai 3:1-4.


“Raica, sa lako dina tiko mai na siga oya; e na kama me vaka na lovo ni vakawaicalataki kaukamea; o ira kece na viavialevu, kei ira kece era dau caka ca, era na vaka na vunisila ta vakavo: era na qai vakamai e na siga oya sa tadu tiko mai,” e kaya na TURAGA ni lewe vuqa (Yahweh of Hosts). “E na sega ni dua na wakana se tabana e na vo vei ira. Ia vei kemuni oni rerevaka na Yacaqu, na matanisiga ni yalododonu e na cadra mai ka na toka e tabana na veivakabulai, oni na qai toso yani, me vaka na luve ni bulumakau e lomanibai. Oni na qai butuqaqi i ira na tamata ca; era sa na dra­vusa tu e na ruku ni qeteqete ni yavamuni, e na siga au na cakava kina na veika oqo”, e kaya na TURAGA ni lewe vuqa (Yahweh of Hosts).
- Malakai 4:1-3.


“Raica, au na tala yani vei kemudou na parofita o Ilaija, ni se bera ni yaco yani na siga levu, vakadomobula ni TURAGA (Yahweh). E na lai vagolea na yalodra na tama vei ira na luvedra, kei na yalodra na gone vei ira na nodra qase; deu qai lako yani meu lai mokuta na vuravura e na vosa ni veivakaloucataki.”
- Malakai 4:5-6.




Wilika Talega Ke Rawa
Vakarua 23:3-5; Esiteri 8-10; Joeli 3:1-8;
Opetaia 15; Vakatakila 19:11-20; 10.

Na Lutu Nei Amani.

Na iTakitaki ni iKawalu ni Siga ni Okotopa

Rau sa mani lako na Tui vata kei Amani me rau lai kana magiti vata kei Ranadi Esiteri, ia ni ratou sa gunu waini tiko e na ikarua ni siga, sa taro sara na Tui, “Ranadi Esiteri, na cava beka na nomu gagadre? E na soli dina ga vei iko. Na cava beka o kerea? Kevaka mada ga me sa na veimamataki na matanitu, e na vakadonui ga.”
E sauma sara o Ranadi Esiteri, “Kevaka o sa yalovinaka e na vukuqu, kemuni na Tui, kevaka oni gadreva me vaka kina, kemuni na Tui, au masuti kemuni moni solia ga vei au na noqu bula, qo ga na noqu vakamamasu. Me ra bula talega o ira na kai noqu – qo na noqu kerekere. Baleta o au vata kei ira na kai noqu, keimami sa volitaki oti me keimami vakacacani, me keimami na vakamatei, me keimami qeyavu vakadua. Kevaka beka me keimami volitaki ga vaka bobula tagane se yalewa, keu a vagaluya voli ga na ka oqo, baleta qori e sega ni ka me mai vakaogai sara kina na Tui.”
E tarogi Ranadi Esiteri sara o Tui Easuerosi, “O cei o koya? E tiko evei na tamata viavialevu e bolea me cakava na ka oqo?”
E kaya sara o Esiteri, “Na tamata ca kei na meca oya o Amani na tamata yaloca.”
-Esiteri 7: 1-6a).


E kaya cake sara o Apona, e dua vei iratou na tagane sele eratou dau veiqaravi tiko vua na Tui, “E dua na itutu ni veikuna, e vitusagavulu ka lima (75) na fiti na kena cere sa duri tu qori e na yasa ni vale nei Amani. Qori a tara o koya me na vakamatei kina o Moatekai, o koya e a vosa cake me vukea na Tui.”
E kaya sara na tui, “Kunati koya kina!” Era sa mani kunati Amani e na itutu ni veikuna e a tara o koya me na kuna kina o Moatekai. Oti sa qai malumu sobu na nona yalokatakata na Tui.
-Esiteri 7: 9-10.




Wilika Talega Ke Rawa
Vakarua 23:3-5; Esiteri 8-10; Joeli 3:1-8; Opetaia 15;
Vakatakila 19:11-20; 10.

Buki Vere O Amani Me Ra Vakamatei O Ira Na Jiu.

Na Takitaki ni iKavitu ni Siga ni Okotopa

Ia ni sa oti na veika oqo, e a qai vakaicocovitaki Amani na luve i Hamataca tagane, na kai Aqaqaiti, o Easuerosi na Tui, oya ni a vakatoroicaketaka na nona ilesilesi, me sa lai dabeca na idabedabe ni veiliutaki e cecere duadua mai vei ira na vei turaga bale kece tale eso. O ira kece sara na vakailesilesi e na matamata ni koro ni Tui, era dau cuva e na vakarokoroko vei Amani, me vaka na ivakaro ni Tui e na vukuna.
Ia o Moatekai a sega ni via cuva vua se vakarokoroko vua.
-Esiteri 3:1-2.

Ni sa raica o Ama­ni ni sega ni dau via cuva vua se vakarokorokotaki koya o Moatekai, sa dua na ka na nona yalokatakata. Ia ni sa qai kilai ira na kawa nei Moatekai o koya, sa qai tuburi koya tale na vakasama ni na maumau wale ke vakamatei Moatekai duadua ga. Qori a qai vaqara kina o Amani e dua na sala me na vakamatei ira kece kina vakadua na kawa nei Moatekai – oya o ira na Jiu – e na loma ni matanitu taucoko nei i Easuerosi.
-Esiteri 3: 5-6.

A mani kaya kina o Amani vua na Tui o Easuerosi, “E dua na kawa tamata era bula tiko e na loma ni nomuni matanitu, era duitutu tu, ia era na kune e na veiyasana kece sara e na loma ni nomuni matanitu raraba; na nodra itovo o ira qo, e dua tani sara mai na nodra itovo o ira na vo ni nomuni tamata kece, era qai dau sega sara ga ni via muria na lawa ni Tui; sa sega sara ga ni dua na betena vua na Tui me vosoti ira tiko. Kevaka e gadreva na Tui, vakatara me buli mada e dua na lewa me ra vakawabokotaki kina: Au na biuta vakatikitiki e tini na udolu na taledi na siliva, e na vale ni yau ni Tui, me ra na saumi kina o ira me ra na cakava na cakacaka oqo.”
Sa mani ucuna mai na nona iqaqalo na nona mama ni vakatulewa, na Tui, qai solia vei Amani na luve i Hamataca, na Aqaqaiti, na kedra meca na Jiu. “Taura na ilavo,” e kaya na Tui vei Emani, “qai vakayagataki ira talega na tamata mo vakayacora kina na ka ga e gadreva na lomamu.”
-Esiteri 3:8-11.


Wilika Talega Ke Rawa
Vakatekivu 12:1-3; Vakarua 30:1-7; Esiteri 4-6;
Same 44:1-8; Taniela 3; 6; Roma 9-11.

Yaco Me Ranadi ni Perisia O Esiteri.

Na iTakitaki ni iKaono ni Siga ni Okotopa

E a tiko voli mai na itikotiko vakatui mai Susani e dua na Jiu mai na Yavusa Penijamini, na yacana o Moatekai, na luve i Jaea tagane, na luve i Simei tagane, na luve i Kiso taga­ne e dua vei ira era a kau vakabobula mai Jerusalemi e na gauna i Nepukanesa na Tui Papiloni. O Kiso qo a dua vei ira na ilala era a kau vakabobula vata kei Jekonaia na Tui Jiutia. O Moatekai a susuga voli mai na tavalena, o Hadasa, baleta rau sa yali ruarua o tamana kei tinana. Na goneyalewa oqo, e dau yacana talega o Esiteri, e goneyalewa bulicaki vinaka sara ka rairai totoka vakaoti. Ia baleta ni rau a sa mate o tamana kei tinana, e a susugi koya mai vakaluvena o Moatekai.
A qai yaco, ni sa rogo na ivakaro vaka Tui, ni levu sara na goneyalewa era a kau i na itikotiko vakatui mai Susani, era qai lai biu tu yani me qaravi ira tu vakadua o Ekai. O Esiteri talega e a kau i na itikotiko ni Tui me lai qaravi koya o Ekai, o koya e dau qaravi ira na goneyalewa musuki. E a vakayalovinakataki koya na goneyalewa oqo, qai vakavuna na nona dau taleitaki koya. Qori a totolo sara kina na nona dau solia vakarawarawa vua na iyaya ni sasauni me vakarairaivinakataki koya kina, qai dau solia talega vua na kakana uasivi. E a lesia vua e levitu na goneyalewa dauveiqaravi digitaki mai na vale ni tui: qai lai vakatikori koya vata kei ira na nona goneyalewa dauveiqaravi, e na vanua vinaka duadua e loma ni nodra vale na goneyalewa musuki.
Ia o Esiteri a sega ni vakatakila na nona koro, vata kei ira na wekana: baleta a vakaroti koya o Moate­kai me kakua sara ni vakatakila.
- Esiteri 2:5-10.


Ia na Tui a domoni Esiteri vakalevu cake sara mai vei ira na vo ni yalewa, ka vinakati koya qai lomani koya vakalevu cake talega mai vei ira na vo ni goneyalewa tabutagane. A mani vakaisalataki koya na Tui, e na isala vaka Ranadi, ka buli i koya me Ranadi me isosomi kei Vasiti.
-Esiteri 2: 17.



Wilika Talega Ke Rawa
Vakatekivu 39; 41; Niemaia 1:1-11;
I Pita 3:1-6

Gadrevi Me Dua Na Ranadi Vou Mai Perisia

Na iTakitali ni iKalima ni Siga ni Okotopa

Oqo na veika a yaco e na gauna nei Easuerosi, oya o Ea­suerosi e iliuliu ni duanadrau ruasagavulukavitu (127) na yasana, me tekivu mai Idia qai tete yani vaka i Iciopia. E na gauna oya, e a veiliutaki tiko ga o Easue­rosi mai na nona itikotiko vakaturaga mai Susani, ia e na ikatolu ni yabaki ni nona veiliutaki, e qai vakayacora e dua na kana magiti levu o koya, e na vukudra na nona turaga kei ira na nona ivakailesilesi.
-Esiteri 1:1-3a).

E na ikavitu ni siga, ni sa tubu sara tu ga e cake, mai na gunu waini, na nona marau o Easuerosi, sa qai vakaroti iratou na levitu eratou dauveiqaravi vua … me ratou lai kauti Vasiti na Ranadi maivua, ka me dara tiko mai na nona isala vaka Ranadi, me mai vakaraitaka mada na nona totoka vei ira na tamata kei ira na vei turaga bale; baleta sa bau totoka dina ga o koya ni raici. Ia ni ra sa lai vakasavuya na ivakaro ni Tui o ira na dauniveiqaravi, e a qai sega ni via lako mai o Vasiti na Ranadi: E a qai curuma na Tui e dua na yalokatakata vakaitamera qai tubu kaukaua na nona cudru.
-Esiteri 1:10-12.

Oti sa qai mai kaya o Memukani vua na tui kei ira na veituraga bale, “Sa vakayacora qo e dua na cala levu o Vasiti na Ranadi, sega walega vua na Tui, vei ira kece talega na vei tura­ga bale, kei ira na tamata na lewenivanua e na veiya­sana kece e nodra iliuliu vakadua tu o Easuerosi na Tui.
-Esiteri 1:16.


O koya oya ke vinakata na tui, me sa na veikauyaki e dua na ivakaro vakatui, ni sa volai e na nodra ivola ni lawa na kai Perisia kei ira na kai Mitia, ka me kakua ni veisautaki rawa, ni sa na sega ni vakatarai vakadua tale vei Vasiti na Ranadi me lai raica ka tiko e na mata i Easuerosi na Tui. Sa na vakatarai talega vua na Tui me solia laivi na itutu vaka Ranadi vua e dua tale e na vinaka cake mai vua. Ni sa na veikauyaki na nona vakatutu oqo na tui, e na loma ni nona matanitu taucoko, era sa na qai dau doka na dui watidra o ira kece na yalewa, maivei ira era lolovira ka vaka kina vei ira era cecere sara.”
-Esiteri 1:19-20.



Wilika Talega Ke Rawa
Esera 4:1-6; Vakaibalebale 31:1-9; Taniela 9:1-2;
I Korinica 6:9-10

Wilika Na Lawa Vei Ira Na Yasa, O Esera.

Na iTakitaki ni iKava ni Siga Ni Okotopa

E na imatai ni siga ni ikavitu ni vula, e kauta mai kina na ivola ni lawa, o Esera na bete, ki na isoqosoqo, vei ira na tagane kei ira na yalewa, era sa yalomatua me ra rogoca ka vakasamataka. E wilika vei ira e na domolevu mai na mataka me yacova na sigalevu, ni duri tu e na mata ni salatu, donuya na matamata ni wai, e na matadra na tagane kei na yalewa, kei ira era sa vakasama rawa. O ira kece na tamata era a vakadirorogo ni wiliki tiko na ivola ni lawa.
Niemaia 8:2-3


E dolava na ivola o Esera. Na tamata kece era rawa ni raici koya baleta e duri tu mai cake; ia ni sa dolava tiko era a qai tucake kece na tamata. E a qai vakacaucautaka na TURAGA (Yahweh) na Kalou (Elohim) levu o Esera; era qai laveta na ligadra o ira kece na tamata era qai kaya, “Emeni! Emeni!” Era sa qai vakacuva na uludra me tara na dela ni qele, me ra vakarokoroko vua na TURAGA (Yahweh). O ira na Livai …. era vakamacalataka na lawa ni ra se duri tu e keya na tamata. Era wilika vakamalua na ivola ni lawa ni Kalou me rawa ni matata na kena ibalebale, me rawa ni ra kila vinaka na veika e wilika tiko o ira na tamata.
Niemaia 8: 5-6


Oti oya era sa qai vosa vei ira na tamata, o Niemaia na kovana, o Esera na bete, kei na vunivola, kei ira na Livai, o ira era a veivakatavulici tiko vei ira na tamata, e na nodra ka­ya, “Na siga oqo e sa vakatabui e na vukuni TURAGA (Yahweh) na nomuni Kalou (Kalou; ni kakua ni lomabibi, se tagitagi”. O ira na tamata era a tagi tiko, ni ra sa rogoca tiko na vei mala ni vosa ni lawa.”
Sa qai kaya vei ira o koya, “Ni lako, ni lai kania na kakana digitaki ka gunuva na wai ni gunu kamikami­ca, qai vakauta tale ga eso vei ira era sega tu ni vakavakarau. Na siga oqo e siga tabu Vua na TURAGA (Adonai). Moni kakua ni yalobibi, baleta na marau ni TURAGA (Yahweh) e vu ni nomuni kaukaua.
Niemaia 8: 8-10.


Wilika Talega Ke Rawa
Vakarua 16:13-15; Esera 6:19-22; Aisea 58;
Maciu 13:18-23; Cakacaka 17:10-11

Masulaka Na Bula Sautu Mai Jerusalemi.

xNa Same ni Cabecabe. Me baleti Tevita

Au a marau vata kei ira era a kaya vei au,

“Mai meda mai lako i na vale ni TURAGA (Yahweh).”

Na yava i keimami sa duri tu

E na nomu matamata, i Jerusalemi.

O Jerusalemi e tara me vaka na korolevu,

me dau vaqaqacotaki kina na veitaratara vakaveiwekani;

Oya na vanua era dau lako cake kina na lewe ni veimata­qali,

na veimataqali ni TURAGA (Yahweh),

me ra lai vakavinavinakataka kina na Yaca ni TURAGA (Yah),

me vaka sa vakaroti tu ena ilesilesi a soli vei Isireli.

E keya e duri tu kina na idabedabe vakatui ni dodonu,

na nodra idabedabe vakatui na lewe ni mataqali i Tevita.

Masulaki na bula sautu nei Jerusalemi:

“Me ra na tiko vinaka mada ga o ira era lomani iko.

Me tiko mada ga na bula sautu ena nomu lomanibai,

kei na cakacaka yaco ena nomu veivale vakaturaga.”

Ena vukudra na taciqu kei ira na noqu icaba,

Au kaya kina, “Me tiko e lomamu na bula vakacegu.”

Ena vukuni Nona vale na TURAGA (Yahweh), na nei­mami Kalou (Elohim),

Au na vakasaqara ga me nomu na veika vivinaka.

Same 122: 1-9

Wilika Talega Ke Rawa

Same 85; Sakaraia 9:9-17; Luke 13:34-35;

Efeso 2:11-22

Masulaki Ira Na Isireli Yasa O Niemaia

Na vosa nei Niemaia na luve i Akalaia tagane.

E na vula o Kisilevi, e na ikaruasagavulu ni yabaki, niu a se tiko mai Susani e na vale ni tui, a lako yani mai Jiutia o Hanani, e dua vei ira na taciqu, vata kei na so tale na tagane; au a mani vakatarogi ira me baleti ira na vo ni kai Jiutia era a dro bula mai na veivakabobulataki, kau vakatarogi ira talega me baleti Jerusale­mi.

Era qai kaya vei au, “O ira era a dro bula mai na veivakabobulataki era sa lesu tale mai, era sa leqa sara vakalevu, ka ra sa vakamaduataki talega. Na lalagabai vatu mai Jerusalemi sa kabasu, ka sa kama yavu e na bukawaqa na kena matamata.”

Niu rogoca ga oqori, au sa dabe sobu ga meu tagi. E a vica vata na siga na noqu vakaloloku tiko, kau lolo tiko, ka masumasu talega vua na Kalou (Elohim) ni lomalagi. Oti au sa qai kaya:

“Kemuni na TURAGA (Yahweh), na Kalou (Elohim) ni Lomalagi, o kemuni na Kalou (El) vakaitamera ka vakadomobula, o Kemuni oni taqomaka matua na nomuni vosayalayala ni loloma vei ira era lomani kemuni ka dau talai rawarawa e na nomuni ivunau: laiva me vakatudaliga na daligamuni, kei na matamuni me dola mai, me rogoca na qaqani masu sa cabora tiko e matamuni na nomuni dauniveiqaravi, e na nona masu tiko e na veisiga kei na veibogi, e na vukudra na nomuni tamata, o ira na Isireli. Au vakatusa yani na ivala­vala, keimami dau vakayacora vei kemuni, o keimami na kawa Isireli bau kina o au vakataki au kei na vale nei tamaqu. Keimami a dau vakayacora na ivakarau vakasisila e matamuni. Keimami a sega ni bau talai rawarawa ki na nomuni ivaka­ro se na nomuni ilesilesi, kei na nomuni lawa oni a solia vua na nomuni dauniveiqaravi o Mosese.

Ni nanuma mada na nomuni vosa oni a vakarota vei Mosese na nomuni dauniveiqaravi, oni a kaya kina, “Kevaka oni talaidredre, Au na tawasei kemuni e na kedra maliwa na vei matanitu, ia kevaka oni lesu mai vei au, moni mai talairawarawa tale i na noqu ivakaro; o ira mada ga era sa wasei tani tu i na iyalayala kei vuravura kadua, au na lai vakasoqoni ira mai­ keya, meu kauti ira lesu mai i na yasana au sa digitaka me vakatikori kina na Yacaqu.”

Niemaia 1:1-9

Wilika Talega Ke Rawa

Isikeli 34:7-16; Marika 2:14-17; Luke 7:36-47

Tara Tale Na Lalagabai Mai Jerusalemi O Ira Na Isireli Yasa.

Keimami sa mani tara vou tale na lalagabai, ka keimami sa lai yacova sara na veimama ni kena cere makawa, baleta era a gumatuataka dina na kena cakacaka o ira na tamata.

Ia ni ra lai rogoca o Sanivalati, o Topaia, o ira na kai Arapea, kei ira na Amonaiti, kei ira na tagane mai Asitoti, ni sa tekivu na kena tara vou na lalagabai mai Jerusalemi, ka sa te­kivu me bonati na vei tikina kabasu; era sa cudru sara vakalevu. Era sa mani bukivere vata o ira kece, me ra valuti Jeru­salemi, me ra lai vakavu veisei talega. Ia keimami a qai masu vua na Kalou (Eohim), ka lesia na ivakatawa me ra yadra tiko e na siga kei na bogi, me iwali ni leqa oqo.

-Niemaia 4:6-9

Me tekivu mai na siga oya, e veimama ga na noqu tamata era cakava na cakacaka, na veimama kadua, era sa tauri moto, isasabai, dakai titi, kei na iyaragi. O ira na ovisa qori era sa qai mai duri tu e dakudra na kai Jiutia era tara vou tiko na lalaga. O ira na cola iyaya tiko, era cakava tiko na nodra cakacaka e na dua ga na ligadra, baleta na kena ikarua e sa tara tiko na iyaragi, ia o ira na matai, era vauca toka e dibidra na nodra iseleiwau, ni ra cakacaka tiko.

-Niemaia 4:16-18a).

Sa qai tara oti vakadua na lalagabai e na ikaruasagavulukalima ni siga ni vula o Ilulu, oya ni tara oti vakadua e na loma ga ni limasagavulukarua ni siga. Ni ra sa rogoca vata oqori o ira na neimami meca, e a tuburi ira kece na veimatanitu era tiko volivoliti keimami, na rere kei na yalolailai, baleta era sa qai kilakasamataka mai ni a rawa ga na caka­caka oqo e na veivuke ni neimami Kalou (Elohim).

Niemaia 6:15-16

Wilika Talega Ke Rawa

Niemaia 2-6; Same 27; 51:18-19; 127:1;

Joni 16:33; I Joni 4:4