Vakacakacakataki o Pelami me Vakacacani Isireli.

Sa qai toso na nodra ilakolako na Isireli me ra lai cegu toka e na bucabuca mai Moapi, e na bati ni Joritani, veibasai kei Jeriko.
Ia o Pelaki na luvei Sipori, e a raica na ka kece era a cakava na Isireli vei ira na Amoraiti. Sa qai tuburi ira na Moapi na domobula vakaitamera baleti ira na tamata; e a domobula o Moapi e na vukudra na kawa i Isireli.
-Lekutu 22:1-3


…… ia o Pelaki na luvei Sipori, o koya e a tui Moapi tiko e na gauna oya. A qai talai ira na italai vei Pelami na luve i Peoa, mai Paicori e na bati ni uciwai, e na nona vanua ga, me ra lai kacivi koya mai ka kaya:
“Raica eso na kawa tamata era sa biuti Ijipita mai; e robota na vanua na kedra ilevu, ka ra sa mai toka qo e na noqu yasayasa. Mo lako mada mai, au vakamasuti iko, mo mai vosa vakaloucataki ira na tamata oqo, baleta era sa rui kaukaua vakalevu cake vei au. De dua au na qai rawa ni vakadrukai ira meu cemuri ira laivi mai na vanua oqo. Au sa kila tiko ni ra dau kalougata o ira o vosa vakalougatataki ira, ka ra kalouca o ira o vosa vakaloucataka.”
-Lekutu 22: 4b-6

E tabu vei ira na Amonaiti kei ira na Moapi bau kina o ira na nona kawa me ra curu i na ivavakoso ni TURAGA (Yahweh), me yacova sara na ikatini ni tabatamata, era na vakatabui tiko me ra curu i na ivavakoso ni Kalou (Yahweh) me tawamudu.
Qori, baleta, era a sega ni lai tavaki kemuni me ra sikovi kemuni ka kauta yani vei kemuni na madrai kei na wai, e na gauna oni a lako tani kina mai Ijipita; baleta talega ni ra a saumi Pelami na luve i Peoa na kai Paicori mai Arema Naharaimi, me vosa vakaloucataki kemuni.
Ia na TURAGA na Kalou (Yahweh your Elohim) a qai sega ni via rogoci Pelami, ia na TURAGA na Kalou (Yahweh your Elohim) a qai vukica na nona vosa ni veivakaloucataki me vakalougatataki kemuni kina, baleta na TURAGA na nomuni Kalou (Yahweh your Elohim) e dau lomani kemuni.
-Vakarua 23:3-5


Wilika Talega Ke Rawa
Lako Yani 12:1-3; Lekutu 22-23; Josua 24:8-10;
II Pita 2:15-16

Rai Cake Mo Bula

Era a qai lako mai na ulunivanua o Hori, e na sala vaka ki na Wasa Damudamu, me ra lako wavoliti Itomi. Ia a tubu na nodra nuiqawaqawa na tamata e na vukuni gaunisala; era sa mani vosavosa ka vosa vakacacana na Kalou (Elohim) vata kei Mosese ni ra kaya, “Na cava sara mada drau kauti keimami tani kina mai Ijipita me keimami mai mate tu e na vanua dravuisiga qo? Sa sega na madrai. Sa sega na wai. Na yalo i keimami sa sevaka tale ga na kakana qo.
Sa mani tala mai na gata batigaga na TURAGA (Yahweh) e na kedra maliwa; era qai katilaki ira na tamata, ka levu sara na kai Isireli era mate. Era sa mani lako vei Mosese na tamata, era qai kaya, “Keimami a valavala ca, e na gauna keimami a vosa vakacacana kina na Kalou (Yahweh) vata kei iko. Masuta mada na TURAGA (Yahweh) me kauta laivi na gata batigaga, mai vei keimami. Sa mani masulaki ira na tamata, o Mosese.
E qai kaya na TURAGA (Yahweh) vei Mosese, “Bulia e dua na gata batigaga qai ciqimaka toka e na mua ni dua na duru balavu, e na qai yaco ni o ira kece era laukati, ni ra raica era na vakabulai.
Sa mani bulia e dua na gata parasa o Mosese, qai ciqimaka e na dua na duru, a qai yaco, ke dua na gata batigaga e katia e dua na tamata, ia ni raica ga na gata parasa e a qai bula.
-Lekutu 21:4-9


Me vaka ni a lave cake na gata e na vanua dravuisiga o Mosese, e na lave cake vaka kina na Luve ni Tamata, me ra kakua ni rusa o ira yadua era vakabauti koya, ia me ra rawata ga na bula tawamudu. Baleta na vakaitamera ni Nona lomani vuravura na Kalou (Yahweh), e a solia mai kina na luvena tagane e duabau, me ra kakua ni rusa o ira yadua era vakabauti koya, ia mera rawata ga na bula tawamudu. Baleta na Kalou (Elohim) a sega ni talai Luvena mai i vuravura, me mai vakacacana na vuravura, ia me mai vakabula ga e na vukuna, na vuravura.
-Joni 3:14-17


Wilika Talega Ke Rawa
Lako Yani 16:6-12; Lekutu 14:26-37; II Tui 18:1-4;
Lele i Jeremaia 3: 25-40, I Korinica 10:1-11

Talaidredre Vua na Kalou o Mosese .

E na imatai ni vula, era a qai yaco yani kina i na vanua dravuisiga o Sini, o ira na lewe ni yavusa taucoko o Isireli, era a qai lai tiko mai Katesa. E a mate ka bulu tu mai keya o Miriama.
E keya e a sega na medra wai na lewe ni yavusa, era a mani sosoqoni vata na tamata me ra lai saqati rau o Mosese kei Eroni. Era a veileti kei Mosese ka kaya vua, “Ke a solia ga na Kalou (Elohim) me keimami a mate vata kei ira na tuakai keimami era a mate e na mata ni TURAGA (Yahweh). Na cava o kauta mai kina na ivavakoso ni TURAGA (Yahweh) i na vanua dravuisiga oqo, me keimami mai mate tu eke vata kei ira na neimami manumanu yavaiva. Na cava o vakasaurarataki keimami kina me keimami biuti Ijipita mai, me keimami mai tini tu e na vanua ca oqo. E sega ni bula rawa eke na sore-ni-itei, se na lolo, na vaini se na pomenikaraneti. Qai sega tale ga na wai me laugunu.
Rau mani biuti ira tu yani na lewe ni yavusa o Mosese kei Eroni, me rau lako i na katuba ni valelaca ni bose, rau qai lai koto sobu ka cuva vakatoboicu, sa qai rairai vei rau na iserau ni TURAGA (Yahweh). E kaya sara na TURAGA (Yahweh) vei Mosese, “Kauta na ititoko, o iko kei na tuakamu o Eroni, drau lai soqoni ira vata na lewe ni yavusa. Vosa i na uluvatu oya e matadra, e na qai sovaraka mai na wai. O na kauta mai na wai mai na uluvatu, me medra na lewe ni yavusa, me rawa ni ra gunu kina o ira vata kei ira na nodra manumanu yavaiva.
Sa kauta sara na ititoko e na mata ni TURAGA (Yahweh), me vaka e vakarota vua. Rau sa qai vakasoqoni ira vata na lewe ni yavusa, o Mosese vata kei Eroni, me ra lai tu taudonuya na uluvatu, sa qai kaya vei ira o Mosese, “Ni vakatudaliga mada, ni yavu tamata talatalaidredre, oni vinakata beka me keirau sa na vakavurea na memuni wai mai na uluvatu oqo?” Sa qai laveta na ligana o Mosese, qai samuta vakarua na uluvatu e na nona ititoko. Sa qai dave mai kina vakalevu sara na wai, era qai gunu kina o ira na lewe ni yavusa vata kei ira na nodra manumanu yavaiva.
Ia na TURAGA (Yahweh) a qai kaya vei Mosese vata kei Eroni “Baleta na nomudrau a sega ni vakabauti au mo drau vakaraitaka nomudrau dokai au niu cecere, e matadra na yavusa Isireli, drau sa na sega kina ni kauti ira na lewe ni yavusa i na vanua au sa solia vei ira.
-Lekutu 20:1-12


Wilika Talega Ke Rawa
Lako Yani 7:19-21; 8:16-17; 17:1-6 Vakarua 4:20-22;
Cakacaka 5:1-11.

Na Kalou E Na Tinia Na Vakadrecike

O Kora na luve i Isihari, na luve i Koaca, na luvei Livai vata kei na so na lewe ni mataqali i Rupeni, -- o Tecani kei Eapairami, rau luvei Iliapi kei Oni na luvei Peleci – eratou a soqoni ira vata eso na tamata.
Era qai tu me ra lai saqati Mosese. E a muri ratou mai e 250 na turaga ni Isireli, iliuliu rogo e na kedra maliwa na lewe ni yavusa, ka ra lewe talega ni matabose e cake.
Era a sosoqoni era qai lako vata kece, me ra sa lai saqati Mosese vata kei Eroni. Era kaya vei rau, “O kemudrau qo, sa sisivia tale na nomudrau i vakarau! O ira na lewe ni Yavusa qo era yalosavasava kece sara vakadua, ka sa tiko vata kei ira na TURAGA (Yahweh). Na cava na vuna drau qai biubiuti kemudrau sara ga kina e deladra na ivavakoso ni TURAGA (Yahweh)?”
Ia ni rogoca qori o Mosese sa cuva sobu ga vakaitoboicu. Oti sa qai kaya vei Kora vata kei ira kece na nona itokani, “Nimataka na TURAGA (Yahweh) e na qai vakatakila se ocei e wili me Nona, ka na vakaraitaka talega se ocei e yalosavasava, ka na qai lewa mai o koya me toro yani vua na tamata oya. Ia o iko Kora vata kei ira na nomu ilawalawa, qo na ka mo dou cakava, “Dou kauta mai e dua na miqa, ia nimataka dou biuta e loma na bukawaqa, vata kei na ka boi vinaka e na mata ni TURAGA (Yahweh). Na tamata e na digitaka na TURAGA (Yahweh) qori o koya e savasava. Sa toro cake sara tikoga na nomudou viavialevu na Livai!”
-Lekutu 16:1-7


E ka lailai beka vei kemuni, ni sa digitaki kemuni na Kalou (Elohim) i Isireli, mai na vo ni nodra isoqosoqo na kai Isireli, me toroi kemuni vakavoleka yani Vua, moni cakava na cakacaka ni loqitabu ni Kalou (Yahweh) moni qai tu e matadra na lewe ni vavakoso moni veiqaravi vei ira?
-Lekutu 16:9


Sa qai dalaga na gusu ni vuravura qai tilomi ira vata kece kei na nodra veivale, vata kei ira kece na tamata nei Kora kei na nodra iyau. Era a bulu bulabula i loma ni ibulubulu, vata kei na ka kece era taukena; sa qai tasogo tale na vuravura, era sa mani rusa yani, me ra sa yali vakadua mai na loma ni Yavusa.
-Lekutu 16:32-33


Wilika Talega Ke Rawa
Same 106: 16-17; Iperiu 10:26-31; 12:23-29;
II Pita 1:16 – 2:22; Juta 1:11

Vakatudaliga ki na vosa ni Turaga

Me vaka e kaya na Yalo Tabu,

“Nikua, kevaka oni rogoca na domona,
Ni kakua ni vakaukauataka na vuniyalomuni
me vaka oni a cakava e na gauna ni vakadrecike,
e na gauna ni veivakatovolei e na vanua dravuisiga,
e na vanua era a tovolea mera vakatovolei au kina
o ira na tamamuni,
era qai raica na ka au cakava
me vasagavulu na yabaki.
Qori na vuna au a levaci ira kina na itabatamata oya,
au qai kaya “E dau lako sese tu ga na uto ni nodra vakasama.
era se sega tikoga ni vulica na noqu ivakarau.”
Au mani bubuluitaka e na levu ni Noqu rarawa,
“Era na sega vakadua ni curu i na noqu vakacegu.”

Ni dau raica, kemuni na taciqu, me kua sara ni dua vei kemuni, e kune vua na mataqali yaloca kei na yalotawavakabauta e dau vuki laivi mai Vua na Kalou (Yahweh) bula.
Ia, moni veivakauqeti tiko vakataki kemuni e veisiga ni se vakatokai tiko me ‘Nikua’, me tarova na nona vakayalokaukauataki e dua vei kemuni, e na veivakacalai ni ivalavala ca. Eda na vakaiwasewase kece kei Karisito (Messiah), ke da taura matua tiko, me yacova na ivakataotioti, na noda inuinui e na kedra inono a soli kina vei keda e na ivaka­tekivu.
Me vaka sa tukuni oti:

“Nikua, kevaka oni rogoca na domona,
ni kakua sara ni vakaukau­ataka na vuniyalomuni,
me vaka oni a cakava e na gauna ni vakadrecike.”

O cei e a rogoca, qai vakadrecike? E sega beka ni o ira kece e a liutaki ira laivi mai Ijipita o Mosese? Ia o cei e a vakararawa tiko Vua me vasagavulu na yabaki? E sega beka ni o ira era a mate laivi tu yani e na vanua dravuisiga, baleta na nodra ivalavala ca? Ia o cei beka a qai bubuluitaki vei ira, ni ra na sega vakadua ni curu i na Nona vakacegu ke sega ni o ira era a valavala ca? Eda sa na qai raica eke, ni ra a sega ni curu rawa, baleta ni sega na nodra vakabauta.
-Iperiu 3:7-19

Wilika TalegaKe Rawa
Same 95; Maciu 17:1-5; Joni 14:15-24;
Cakacaka 3:19-23, Iperiu 4.

Yabaki Vasagavulu E Loma Ni Vanua Dravuisiga.

Rau sa qai davo sobu vakatobuicu o Mosese kei Eroni e matadra taucoko na nodra isoqosoqo na luvei Isireli era a soqo tiko e keya. O Josua na luvei Nuni vata kei Kelepi na luvei Yefune, e rua vei ira era a lai butu vanua, rau a qai dresulaka na nodrau i sulu, rau qai kaya vei ira taucoko na Yavusa Isireli, “Na vanua keimami a butuka mai ka vakadikeva mai e vanua vinaka vakaoti. Ke sa taleitaki keda tiko na TURAGA (Yahweh), e na liutaki keda i na vanua oya o Koya, na vanua e dave kina na wainisucu kei na oni, me lai solia vei keda. Mo ni kakua ga ni talaidredre vua na TURAGA (Yahweh). Moni kakua talega ni lamutaki ira na tamata ni vanua oya, baleta eda na tilomi ira vakadua. Na nodra isasabai sa oti, na TURAGA (Yahweh) sa tiko kei keda. Ni kakua ni lamutaki ira.”
-Lekutu 14:5-9

Sa qai vosa vei rau o Mosese kei Eroni na TURAGA (Yahweh) ni kaya, “Sa na vakaevei na dede ni nodra vosa kudrukudru tiko baleti au o ira na lewe ni yavusa ca oqo? Io au sa mai rogoca na nodra kudru o ira na kai Isireli daukudru oqo. Ia tukuna sara vei ira qo, ‘Me vaka niu bula tiko, e tusanaka na Turaga (Yahweh), me vaka ni oni sa vosa mai i daligaqu, au sa na cakava dina vei kemuni. Na yagomuni era na dui bale matemate e na vanua dravuisiga oqo – oya o kemuni kece sara oni a wili e na gauna ni wilivanua, oni yabaki ruasagavulu se qase cake, oni kudruvaki au tiko. E na sega ni duabulu vei kemuni e na butuka na vanua au a dusimaka e na ligaqu, ka bubuluitaka niu na cakava me nomuni vanua, vakavo ga o Kelepi na luvei Yefune kei Josua na luvei Nuni.
-Lekutu 14:26-30


E na loma ni vasagavulu na yabaki – oya me dua na yabaki e na veisiga yadua ni vasagavulu na siga oni a butu vanua tiko kina -- oni na totogitaki tiko kina e na vuku ni nomuni ivalavala ca, moni na qai vakila kina na noqu duatani niu sa saqati kemuni.’”
-Lekutu 14: 34


Na cava tale meda qai kaya rawa e na vuku ni ka oqo? Ke sa to kei keda na Kalou (Elohim), o cei e na rawa ni saqati keda?
-Roma 8:31


Wilika Talega Ke Rawa
Josua 5:1-6; Joni 6:48-51; I Korinica 10:1-6;
Iperiu 3:7 – 4:7.

Cata Na Vanua Yalataki O Isireli.

A vosa vei Mosese na TURAGA (Yahweh), “Tala mada e so na tagane, me ra lai butuka mai na qele va Kenani, na qele au sa solia vei ira na luvei Isireli. Mai na veiyavusa taucoko ni nodra qase, mo tala e tau yadua na tagane, ia o ira kecekece me ra iliuliu e na kedra maliwa.”
-Lekutu 13:1-2

Era a qai lako oti era qai lesu mai vei rau o Mosese kei Eroni, kei ira kece na nodra veisoqosoqo na luvei Isireli, mai Katesa e na vanua dravuisiga o Parani. E keya era a qai tukutuku vei rau kei ira kece na lewe ni Yavusa, era qai vakaraitaka tale ga na vuata ni vanua. Era tukutuku vua ka kaya: “Keimami sa lako i na vanua o a talai keimami kina, e ka dina taucoko ni dave tu kina na wai ni sucu kei na oni. Qo na vuata mai keya. Ia o ira na tamata era tawana tu na vanua era kaukaua kei na nodra veikoro lelevu era vakabainivalu vakavakaitamera; qai kena ikuri ga ni keimami a raici ira na luvei Yanaqa mai keya”.
-Lekutu 13: 26-28

A qai vagalui ira o Kelepi e na mata i Mosese, qai kaya, “E dodonu meda sa lako cake sara ga qo, meda lai taukena na qele, baleta eda rawa ni cakava”
Ia o ira na vo ni tagane era a lako vata kei koya era kaya, “Eda na sega ni rawati ira rawa na tamata oya; baleta era kaukaua cake mai vei keda.”
-Lekutu 13: 30-31

E na bogi ni siga oya, era a laveta cake kina na domodra o ira na lewe ni yavusa, era qai tagi lagalaga ka qoqolou. Era a sosovaki rau o Mosese kei Eroni o ira na lewe ni Yavusa taucoko era qai kaya vei rau, “E vinaka cake beka meda a mate ga mai Ijipita, se, e na vanua dravuisiga oqo. Na cava me kauti keda mai kina na TURAGA (Yahweh) i na vanua oqo, meda qai mai vakamatei wale tu e na iseleiwau, oti me ra qai mai vakasasataki o ira na watida kei ira na luveda me ra qai kau vakabobula ni ivalu. E sega beka ni vinaka cake meda sa lesu tale i Ijipita?” Oti era sa qai veivosaki vakataki ira, “Laiva meda bulia e dua na noda kavetani me kauti keda lesu i Ijipita.”
-Lekutu 14:1-4



Wilika Talega Ke Rawa
Vakarua 1:19-33; Same 106:24-27; Vakaibalebale 29:25;
Filipai 2:12-16

Era Vakatovolea na Kalou na Isireli

Era qai nakita me ra vakatovolea na Kalou (El),
E na nodra tagica na kakana era garova.
Io, era vosa saqata na Kalou (Elohim) ni ra kaya,
“E rawa beka vua na Kalou (El) me vakarautaka e dua na teveli e veikau?
Raica ni a samuta na vatu o koya,
qai coka mai kina na wai
qai drodro yani vakayauyau i na uciwai,
Ia, e rawa beka vua me soli keda madrai?
E rawa beka ni vakarautaka na lewe ni manumanu
me kedra na nona tamata?”
Ia qai rogoci ira na TURAGA, qai tubu na Nona cudru;
qai caudre na nona bukawaqa me baleti Jekope,
ka tubu na nona leva baleti Isireli,
baleta era sega ni vakabauta na Kalou (Elohim),
ka sega ni vakararavi i na nona veivueti.
Ni o koya ga e lewa na o mai cake,
Qai vakatauca mai na mana vei ira me ra kania,
ka solia vei ira na sila mai lomalagi
Na tamata era a kania na kedra kakana na Agilosi,
e vakauta mai vei ira na kakana kece ga era rawa ni kania.
E sereka mai na cagi mai na tokalau kei lomalagi:
ka vakauta mai na cagi mai na ceva e na nona kaukaua.
E vakatauca na lewe ni manumanu vei ira me vaka na kuvu ni soso
Na manumanu vakavutina (feathers) me vaka na mataninuku e matasawa,
e cakava me ra tau sara ga e na nodra loma ni keba,
vakavolivolita na nodra dui valelaca.
Era kana me yacova ni ra sa mamau vinaka,
baleta ni a solia vei ira o koya na kakana era garova
Ia ni sebera ni ra vakanadakuya na kakana era garova.
e na gauna era se kubuta tu ga kina e gusudra,
Sa tau mai vei ira na leva ni Kalou (Elohim),
e a vakamatei o ira sara ga na momoqaqa vei ira,
ka muduki ira laivi na cauravou digitaki ni Isireli.

Ia, e na dela ni veika a yaco oqo, era a valavala ca tikoga,
era a sega tiko ga ni vakabauta na nona cakacaka mana.
- Same 78:18-32




Wilika Talega Ke Rawa
Lekutu 11; Same 106:1-15; Luke 4:1-4;
Jemesa 4:1-4

Na Veivakaroti ni Kalou vei ira na Isireli.

E na siga sa vakaduri cake kina na loqitabu, oya na valelaca ni veiyalayalati, e a ubia kece tu vakadua na o. Mai na yakavi me yacova na mataka na o e ubia toka na loqitabu e rairai tu vaka e dua na bukawaqa. Qori na kena ivakarau e veigauna, e ubia tu ga na o, ia e na bogi e rairai tu vaka na bukawaqa. E na veigauna kece e talave cake kina na o mai na valelaca, era sa cavutu sara na Isireli, ia ni kovuta sobu ga mai, era sa cegu talega na Isireli, me ra keba.
E na veivakaroti ga ni TURAGA (Yahweh) era na toso kina na Isireli, e na nona veivakaroti tale ga era na cegu kina, me ra keba. Ni toka na o e na dela ni loqitabu era na tiko voli ga e na keba. Ni toka vakadede na o e na dela ni loqitabu, era sa na muria ga na vosa ni TURAGA (Yahweh) o ira na Isireli, era sa na sega ga ni toso. E na so na gauna e dau bogi vica toka ga na o e na delani loqitabu; e na veivakaroti ga ni TURAGA (Yahweh) era na cegu kina, ia era na qai toso talega e na nona veivakaroti. E na so na gauna e na toka ga na o mai na yakavi me yacova na mataka, ia ni sa talave e na mataka kadua era sa na toso sara. Ke toka na o me siga rua, vula dua se yabaki dua, o ira na Isireli era sa na cegu toka ga e na keba, ka sega ni toso.
E na veivakaroti ni TURAGA (Yahweh) era na cegu kina me ra keba, e na veivakaroti talega ni TURAGA (Yahweh) era na toso kina. Era dau muria na veivakaroti ni TURAGA (Yahweh) me vaka e vakasavui tiko vei ira mai vei Mosese.
-Lekutu 9:15-23



Wilika Talega Ke Rawa
Lako Yani 13:22,33; 40:34-38; Lekutu 14:11-14;
I Korinica 10:1-2

Tagane Vakawati, Lomani ira na Watimuni.

Kemuni na tagane vakawati, lomani ira na dui watimuni, me vaka ni dau lomana na isoqosoqo lotu na Karisito (Messiah), qai solia kina vua na Nona bula; me rawa ni vakatabui koya, ka savati koya e na wai mai na vosa, me rawa ni cabora lesu mai vua, e dua na isoqosoqo lotu totoka vakaoti, e sega ni tavutonotono se salulu se dukadukali cava tale, baleta ni sa vakatabui oti ka sega ni dukadukali.
E na sala vata oqori, e dodonu vei ira na tagane vakawati, me ra lomani ira na dui watidra me tautauvata ga na nodra lomana na dui yagodra. Na tagane e lomana na watina, e lomani koya vakataki koya.
E sega ni dua na tagane me na cata na yagona ga o koya vakataki koya, baleta e na vakania ka qarava me vaka ni dau vakania ka qarava na isoqosoqo lotu o Karisito (Messiah). Baleta eda duavata e yagona, eda leweni yagona kei na nona sui. “Qori na vuna e dodonu kina vua na tagane me biuti tamana kei tinana me lai semati vua na yalewa na watina, me qai vakaduavatataki kina na yagodrau.”
Oqo e dua na ka bibi e sega ni vakamacalataki rawa – io, ia au vosa tiko e na nodrau veiwekani na Karisito (Messiah) vata kei na isoqosoqo lotu. Ia, laivi kemuni yadudua moni lomani ira na dui watimuni yalewa, me vaka ni oni lomani kemuni vakataki kemuni. Ia na yalewa vakawati me raica me dau dokai ira na dui watidra.
-Efeso 5:25-33


Me vaka kina o kemuni na tagane vakawati, moni vakaitikotiko kei ira e na kilaka ka dau vakarokorokotaki ira na watimuni yalewa me vaka ni ra malumalumu sobu, ia era vakaivotavota tale ga vata kei kemuni e na iloloma ni bula, me kua kina ni dua na ka e vakataotaka na nomuni masumasu.
-I Pita 3:7


Wilika Talega Ke Rawa
Vakatekivu 2:18-25; Osea 3:1-3; Malakai 2: 13-16; Kolosa 3:19,
Vakatakila 21:14

Na Sere ni Dodomo Vua na Tagane Vakawati.

E vaka na vuni apolo e na kedra maliwa na vunikau e loma ni veikau,
O koya na noqu dodomo e na kedra maliwa na cauravou,
E talei vei au meu dabe e na ruku ni yaloyalona,
Ia na vuana e kamica na kena ikanakana e gusuqu.
Sa kauti au oti ki na vale ni soqo, o koya
ia na kuila e vakarurugi au kina, na loloma.
E vakaukauataki au e na vua ni vaini mamaca kamica,
e vakabulabulataki au e na vuani apolo,
baleta au sa malumalumu e na dodomo.
Na ligana imawi e no e ruku ni uluqu,
qai kamokotaki au koto e na ligana i matau.
-Sere i Solomoni 2: 3-6.

Rogoca! Na domo ni noqu dodomo!
Raica! Sa lako mai qori o koya,
e ladeva kosova mai na veiulunivanua,
ka rikava mai na veidelana.
Na noqu dodomo e vaka na anitilope, se diatagane gone.
Raica! Sa duri tu qori e daku ni nodatou bai,
Ka vakararai tiko mai e na nodatou katubaleka,
e iro tiko mai e na isogo cicila.
Sa vosa na noqu dodomo, e kaya mai vei au,
“Duri mai noqu daulomani, noqu matavinaka duabau, daru mai lako,
Raica! sa sivi na vula ililiwa,
sa mudu na uca, ka sa oti yani,
Na senikau, era sa babasika e delai vuravura;
Sa yaco mai na gauna ni lagalagasere
vei ira na manumanu vuka,
na domo ni ruve sa rogo e loma ni noda vanua.
Na vunilolo sa tekivu vuataka na imatai ni vuana,
Sa kubu na senivaini, ka kuvuraka mai na kedra iboi totoka.
Duri mai, lako mai noqu daulomani,
noqu matavinaka e duabau, daru mai lako.”
-Sere i Solomoni 2: 8-13.


Wilika Talega Ke Rawa
Same 45, Sere i Solomoni 1-8, II Korinica 11:2-3,
I Pita 3:1-6

Na Tagane Vakawati Yalodina.

I luvequ, vakadikeva matua na noqu vuku,
rogoca vinaka sara na noqu vosa ni yalomatua,
me rawa ni o kila vinaka na itovo ni digidigi,
ka me toka e tebenigusumu na vosavosa vuku.
Mai na tebenigusuni yalewa dautagane, e dau titiri mai na oni,
ia na nona vosa e dadara cake mai na waiwai;
ia e muri, e na qai gaga vaka na duva, o koya,
ka gagata vaka na iseleiwau batirua.
-Vakaibalebale 5:1-4.

Gunu wai ga mai na nomu tobu ni wai,
na waidrodro mai na nomu toevu,
ia ke mani vuabale i gaunisala levu na nomu ivurevure ni wai,
me drodro na nomu veiuciwai i na veisaqata ni koro?
Ia laiva me nomu duadua tikoga,
mo kua sara ga ni wasea vata kei ira na tani.
Me vakalougatataki mada ga na nomu toevu,
ka mo kune marau tikoga maivua na watimu ni cauravou.
Laivi koya me vaka na meyalewa dauloloma,
se na diayalewa totoka vakaoti,
Me dau vakamamautaki iko mada ga e veigauna kece na sucuna,
ka me dau vakamarautaki iko tu vakadua na nona dodomo.
Na cava me vakamarautaki iko kina, i luvequ, na yalewa saqamua?
Na cava mo lai mokota kina na watina e dua tale na tagane?
Na ivalavala ni tagane, e laurai votu tiko mai vua na TURAGA (Yahweh),
ka dikeva vinaka tiko mai o Koya, na nona ilakolako kece.
Na ivalavala vakasisila ni tamata ca, e na tudaitaki koya,
na ivau ni nona ivalavala ca e na vesuki koya matua.
E na mate ga o koya, baleta ni rui lailai na nona vakatavulici,
Qai mani muri cala kina, e na vuku ni nona lialia.
-Vakaibalebale 5:15-23.



Wilika Talega Ke Rawa
Lako Yani 20:14, Vakarua 20:10,
Vakaibalebale 2:16:22, 6:23-35, 7, Efeso 5:1-3.

Na Veivakadodonutaki ni Tama.

E na nomuni dauveisaqasaqa kei na ivalavala ca, oni sebera ni yacova sara na ivakatagedegede me sa dave kina na nomuni dra. Oni sa guilecava beka na vosa ni veivakayaloqaqataki a soli vei kemuni, e na nomuni itutu vakaluvena:

“I luvequ, kakua ni taura vakamamada
na veivosataki ni TURAGA (Yahweh),
kua talega ni yalolailai ni totogitaki iko o Koya,
baleta o koya e lomana na Turaga (Yahweh)
e na vosataka,
ka totogitaki ira kece era sa vakadonui oti me ra luvena.”

Kevaka o vosota na veivakadodonutaki; na Kalou (Elohim) e na okati iko moni luvena. O cei na gone e sebera vakadua ni bau kuitataki mai vei tamana? Kevaka oni sebera ni bau kuitataki (o keda kece sara eda sa kuita oti) oni na wili moni luve ni sala, sega ni luvena dina. Kena ikuri, o keda kece eda dau kuitataki mai vei tamada vakavuravura, eda qai dau dokai ira ni ra vakadodonutaki keda. E vinaka cake sara ke da dau talairawarawa vua na Tamada Vakayalo, meda bula?
O ira na tamada era dau kuitataki keda vakalailai wale sara, ke lomadra ni dodonu, ia na Kalou, e vakayacora tiko oqori me rawa ni yaga vei keda, meda rawa ni wasea kei Koya na Nona lagilagi. E dina ni sega ni talei vei keda ni da kuita, baleta e ka mosimosi. Ia mai muri, e na tamusuka vei ira era vuli mai kina, na yalododonu kei na yalovakacegu.
-Iperiu 12:4-11


Wilika Talega Ke Rawa
Vakarua 8:5, I Samuela 2:12-36,
Vakaibalebale 3:11-12, 15:5, Vakatakila 3:14-20.

Na iVakasala ni Tama

Vakarogoca, kemuni ragone, na ivakavuvuli ni dua na tama;
vakayacora moni rawata na yalomatua,
Baleta au na solia vei kemuni na i vakavuvuli momona,
kakua ni vakanadakuya na noqu lawa.
E na gauna au se lailai kina e na vale nei tamaqu,
Gogo ia au daulomani duabulu e na mata i tinaqu,
E a vakavulici au talega o koya, ni kaya,
“Laiva na vuniyalomu me taura matua na noqu vosa;
talai rawarawa i na noqu ivakaro, mo bula.
Rawata mai na vuku, kei na yalomatua, kakua ni guilecava,
kakua ni vakanadakuya na vosa e cavuta na gusuqu,
Kakua ni vakanadakuya e na qai taqomaki iko,
Lomani koya e na qai vakatawani iko.
Na vuku e ka bibi duadua; rawata mai na vuku.
E na veika kece mo rawata, rawata talega mai na yalomatua.
Vakacerecerei koya, e na qai vakcerecerei iko,
Mokoti koya e na qai vu ni nomu dokai.
E na daramaka vei iko na salusalu ni loloma,
Ka solia vei iko na isalavakatui vakaturaga.”
Rogoca luvequ, ciqoma na noqu vosa,
e na qai levu na yabaki ni nomu bula.
Au sa vakatavulici iko tiko e na sala ni vuku,
Kau sa tuberi iko tiko e na sala dodonu.
Ni o sa lako, na nomu ikalawa e na sega ni vakataotaki,
Ia ni o cici, o na sega ni tacaqe.
-Vakaibalebale 4: 1-12


Wilika Talega Ke Rawa
Lako Yani 21:15, Vunau ni Soro, 19:3, Vakaibalebale 10: 1, 23 :22-25,
Efeso 6: 1-3.

Vakarokorokotaka na Tamamu

Mo vakarokorokotaka na tamamu kei na tinamu, me rawa ni balavu na nomu veisiga e na vanua sa solia na TURAGA (Yahweh) na nomu Kalou (Elohim) vei iko.
-Lako Yani 20:12.

O koya e vakatubura e dua na gone sesewa,
e kauta ga mai vua na rarawa
ia na tama ni gone sesewa, e sega na nona marau.
-Vakaibalebale 17:21.

I luvequtagane, ke yalomatua na vuniyalomu,
E na marau vakalevu na yaloqu, io na yaloqu;
Ia na yaloqu mai loma sara, e na marau vakaoti,
ni cavuta na gusumu, na veika e dodonu.
-Vakaibalebale 23:15-16.

Vakarorogo, i luvequ, mo yalomatua,
qai tubera na vuniyalomu, e na sala dodonu.
-Vakaibalebale 23:19

Laiva me bulabula tiko e lomamuni na vosa nei Karisito (Messiah), ni oni dauveivakatavulici ka dauveituberi vakataki kemuni e na yalomatua, ka vaka kina e na gauna oni dau laga same kina, laga sere ni lotu, kei na sere ni bula vakayago e na yalo ni vakavinavinaka vua na Kalou (Elohim). Ia e na veika cava ga oni cakava, vosataka se vakayacora, cakava kece sara e na yaca ni Turaga o Jisu (Master Yahshua), qai vakavinavinakataka tiko na Kalou (Elohim) na Tamada e na yacana.
Kemuni na yalewa vakawati, soli i kemuni vei watimuni,
baleta e dodonu vua na Turaga (Elohim)
Kemuni na tagane vakawati, lomani ira na dui watimuni,
kakua ni lomacataki ira.
Kemuni ra gone, talatalairawarawa vei ira na nomuni itubutubu
e na veika kece, baleta qori e ka talei Vua na Kalou (Elohim).
Kemuni na tama, kakua ni vakacudrui ira na luvemuni ni oni leva,
de ra qai vakayalolailaitaki.
-Kolosa 3:16-21.



Wilika Talega Ke Rawa
Lako Yani 21:15, Vunau ni Soro, 19:3,
Vakaibalebale 10: 1, 23:22-25, Efeso 6: 1-3.

Na Tamada Vakalomalagi

Oni luve ni Kalou (Yahweh) kece sara, e na nomuni vakabauti Jisu Karisito (Messiah Yahshua). Na kena ilevu ga oni sa papitaiso vei Karisito (Messiah), oni sa tokari Karisito (Messiah) tu. Sa sega kina na Jiu se na kai Kirisi, na bobula se na tugalala, na tagane se na yalewa, baleta oni sa duavata kece vei Jisu Karisito (Yahshua Messiah). Ia kevaka oni nei Karisito (Messiah), oni sa na wili talega moni kawa i Eparayama, ka vakaivotavota e na yavu ni veiyalayalati.
-Kalatia 3:26-29

Na ka au kaya tiko, ni o koya e vakaivotavota, e na gauna e se gone voli kina, e sega na kedrau duidui kei koya e dauniveiqaravi, e dina ga ni o koya e na taukena na veika kece. E na qaravi tiko vei ira na nona dau ni vakavuvuli kei ira na nona dau ni tataqomaki, me yacova na gauna sa lokuca o tamana.
E vaka kina o keda, ni da se gone lalai, eda se bobula tu e na veika vakavuravura oqo. Ia ni sa yaco mai na gauna lokuci, sa vakauti luvena tagane mai na Kalou (Elohim), sucu mai vua e dua na yalewa, sucu e na ruku ni lawa, me mai vueti ira era bula tu e na ruku ni lawa, me da rawa ni ciqoma meda sa volai meda luvena vakaivotavota. Baleta ni da sa luvena, sa solia mai kina i vuniyalomuni na Yalo i Luvena, na Kalou (Elohim), na Yalo e dau kaci vakamenemene, “I Tamaqu.”
Oni sa na sega tale kina ni bobula, oni sa Luvena; ia ke oni sa Luvena, oni sa luve ni Kalou (Yahweh) vakaivotavota, e na vuku ni Karisito.
-Kalatia 4:1-7


Raica mada, se mataqali loloma vakacava sara mada e solia tiko vei keda o Tamada, e rawa kina meda vakatokai me da luve ni Kalou (Yahweh). Qori na vuna e sega ni kilai keda kina o vuravura, baleta ni sega ni kilai Koya.
Kemuni na daulomani, eda sa wili sara tu ga oqo meda luve ni Kalou (Yahweh), ia e se sega ni vakatakilai mai na keda i rairai. Ia eda sa kila rawa, ni gauna e na basika mai kina o Koya, eda na tautauvata kei Koya baleta eda na raici Koya e na kena i rairai dina.
-I Joni 3:1-2


Wilika Talega Ke Rawa
Vakarua 32:6, Same 2, Aisea 9:1-7, Joni 1:12-13,
Roma 8, Iperiu 12:1-14

Na Kalou e Yalododonu

Mata cake, TURAGA (Yahweh), e na Nomuni leva,
Laveti kemuni cake baleta era sa yalokatakata na kequ meca,
Yadra mai, e na vukuqu; moni vakatauca na nomuni lewa dodonu.
Me yaco vei ira na tamata, na ivavakoso, me ra toso vakavolivoliti kemuni.
E na vukudra, vuki mai, mai na nomuni itikotiko cecere .
Laiva na TURAGA (Yahweh) me vakataulewa vei ira na tamata.
Vakataulewa vei au, TURAGA (Yahweh) e na noqu yalododonu,
vata kei na lomadina e kune vei au.
Isa, ni laiva na nodra i valavala vakarerevaki na tamata ca me tini vakadua
ia vakataudeitaki ira era yalododonu.
Baleta na Kalou (Elohim) yalododonu e na vakatovolea na vuniyalo
kei na vakasama
E noqu isasabai na Kalou (Elohim), o koya e dau vueti ira
e dodonu na vuniyalodra,
Na Kalou (Elohim) e dau lewa dodonu,
na Kalou (EL) e dau levaci ira na ca e veiveisiga.
-Same 7:6-11

“E na yaco mai na siga” e tusanaka na TURAGA (Yahweh),
“au na vakatubura kina vei Tevita e dua na Coke yalododonu,
e dua na Tui, dau vakavulewa e na vuku,
ka vakayacora na veika dodonu ka dina e loma ni vanua.
E na dela ni nona gauna, o Jiuta e na vakabulai,
o Isireli e na bula sautu.
Oqo na yacana e na vakatokai kina o Koya:
Na TURAGA (Yahweh) e NODA YALODODONU.
-Jeremaia 23:5-6

Kemuni na Luvequ lalai, na veika oqo au vola yani vei kemuni, moni kakua ni vakayacora na ivalavala ca. Ia ke dua e vakayacora na i valavala ca, sa tiko e dua me matataki keda Vua na Kalou – oya o Jisu na Karisito (Yahshua the Messiah) na Yalododonu.
O koya na imadrali ni noda ivalavala ca, ia e sega ni baleta na noda ga, e baleta talega na ivalavala ca e vuravura raraba.
-I Joni 2:1-2


Wilika Talega Ke Rawa
Esera 9, Same 36:5-10, 71, Taniela 9:1-19, Maciu 6:28-33,
Cakacaka 3:12-16

E Dua Ga Na Kalou

Rogoca Isireli: Na TURAGA (Yahweh) na noda Kalou (Elohim), na TURAGA (Yahweh) e duabau ga.
-Na iVakarua 6:4

Na TURAGA (Yahweh) e na tui e vuravura raraba. E na siga oya, na TURAGA (Yahweh) e na dua, kei na yacana e dua.
-Sakaraia 14:9

O Koya beka e nodra Kalou (Elohim) ga na Jiu? E sega beka ni nodra Kalou talega na Kaitani? Io, e nodra talega na Kaitani.
Raica e dua ga na Kalou (Elohim), o Koya e na vakadonui ira era sa teve e na vuku ni nodra vakabauta, ka vakadonui ira talega era sega ni teve mai na vakabauta.
-Roma 3:29-30

Kevaka mada ga e levu tu o ira era vakatokai ni ra kalou (elohim), se ra tu e vuravura, se mai lomalagi, (me vaka ni bini dina tu na kalou (elohim) kei na turaga (master), ia vei keda e dua ga na Kalou (Elohim), oya na Tamada (Father) vakalomalagi, o koya e vu ni veika kece, ka vu talega ni noda bula; ka dua ga na Turaga (master), o Jisu Karisito (Yahshua Messiah), o koya e ivakayaco ni veika kece, o koya talega eda bula tiko e na vukuna.
-I Korinica 8:5-6

E dua ga na yago, ka dua ga na Yalo - me vaka ni oni a kacivi i na dua ga na inuinui e na gauna oni a kacivi kina.
E dua ga na Turaga (Yahweh), dua na vakabauta, dua na papitaiso;
dua na Kalou (Elohim) na Tamada kecekece, o koya e lewa na ka kece, e tiko maliwai keda kece, ka tiko talega vei kemuni kece.
-Efeso 4:4-6


Wilika Talega Ke Rawa
Aisea 44:6-8, Malakai 2:10, Maciu 19:16-17, 23:1-10,
Marika 12:28-34.

Na Kalou e Kila na Veika Kecekece

I TURAGA (Yahweh), oni dau dikevi au,
oni sa kilai au.
Oni kila na noqu dabe sobu kei na noqu tucake,
oni siqema na noqu vakasama ni oni se tu yawa mai.
Oni kila vinaka na noqu veitosoyaki kei na noqu davo sobu;
oni sa kila deivaki tu na noqu ivalavala kece sara.
Ni sebera ni tasere e dua na vosa mai yamequ
oni sa na kila oti kece tu, TURAGA (Yahweh)
Oni sa vakalati au – mai dakuqu, mai mataqu talega
oni qai tabaka na ligamuni vei au.
Na mataqali kilaka vakaoqori, sa ka ga meu qoroya,
e sa rui cecekia: Au sa na sega vakadua ni rawata.
-Same 139:1-6

Ie! na titobu kei na talei ni Nona vuku kei na kilaka na Kalou (Yahweh)!
E na sega ni vaqaqai rawa na nona itovo ni vakatulewa
kei na nona ivakarau eda na sega ni kunea rawa!
O cei sa bau kila rawa na uto ni nona vakasama na TURAGA (Yahweh)?
Se o cei e sa bau nona daunivakasala?
O cei sa bau solika vua taumada,
sa na dodonu kina me saumi lesu tale vua?
Na ka kece e kau mai vua, era tu e na vukuna,
Ka ra na tini kece tale yani vua.
Me nona tikoga na lagilagi (majesty) me tawamudu. Emeni.
-Roma 11:33-36

Baleta na vosa ni Kalou (Elohim) e totolo ka kaukaua ka gagata cake mai na dua ga na iseleiwau bati rua, ni sa coba e na yaco sara i na tikina e tawase kina na bula kei na yalo se e na isema ni sui kei na kena waiwai, na titobu e suaka rawa; ka dau kila vinaka talega na vakasama kei na inakinaki ni vuniyalo. E sega ni dua na kabuli e vunitaki rawa mai matana, na ka kece e luvawale ka tadola tu me vakadikeva na matana, o Koya e itini ni veika kece me baleti keda.
-Iperiu 4:12-13

Wilika Talega Ke Rawa
Same 94:1-11, Vakaibalebale 5:21,
II Veigauna 16:9, I Korinica 1:18-25, Joni 3:19-20.

Na Kalou e Tiko e Veivanua Kece

Evei beka au rawa ni lako kina mai na yalomuni?
Se evei beka au rawa ni dro kina mai vei kemuni?
Keu cabe cake i lomalagi, Oni tiko mai keya;
keu tevuka na noqu idavodavo mai bulu,
raica oni tiko talega mai keya.
Keu taura na taba ni mataka lailai,
meu lai vakaitikotiko e na tai yawa duadua ni wasawasa,
E keya mada ga na ligamuni e na lai tuberi au,
kei na ligamuni imatau, e na qai tauri au matua.
Kevaka meu kaya, “Na butobuto e na rawa ni pulouni au,
ia na bogi mada ga e na ramase wavolivoliti au”
Io, na butobuto e na sega ni vunivunitaki rawa mai vei kemuni,
Baleta na bogi e na rarama me vaka na siga,
baleta na butobuto kei na rarama e tautauvata ruarua vei kemuni.
-Same 139: 7-12


“O Au beka e dua na Kalou (Elohim) tu voleka,”
e taroga na TURAGA (Yahweh),
“kau sega ni Kalou (Elohim) tu yawa?.
E rawa beka ni dua e vunitaki koya e na nona ivunivuni
meu kakua kina ni raici koya?”
e taroga na TURAGA (Yahweh).
“Au sega beka ni vakasinaiti lomalagi kei vuravura?
e taroga na TURAGA (Yahweh).
-Jeremaia 23:23-24,

Sa qai lako mai o Jisu (Yahshua) qai kaya vei iratou, “Na kaukaua kece ni vakavulewa (authority) e lomalagi kei vuravura sa soli oti vei au. Qori mo dou lako yani kina, mo dou lai veivakatavulici e na veivanua kecekece, dou qai papitaisotaki ira e na yaca ni Tamada kei na Luvena tagane kei na Yalo Tabu. Mo dou vakatavulici ira me ra vakamuria matua na veika kece Au sa vakarota oti vei kemudou: ia raica niu na dau tiko vata kei kemudou e veiveigauna kece sara, me yacova na ivakataotioti kei vuravura. Emeni.
-Maciu 28:18-20


Wilika Talega Ke Rawa
Na iVakarua 4:7-12, I Tui 8:27, Joni 1:45-49,
Joni 14:16-17.

Na Kalou E Kaukaua

Sa qai sauma o Jope vua na TURAGA (Yahweh) ni kaya:
“Au kila ni oni rawa ni cakava na ka kecekece;
ka na sega ni dua na nomuni vakananavu (inakinaki),
me na tarovi rawa mai vei Kemuni.”
-Jope 42:1-2

Kacivaka na kaukaua ni Kalou (Elohim),
na nodra Turaga levu e lewai Isireli,
kei na nona kaukaua e tu mai lomalagi.
Kemuni na Kalou (Elohim),e dodonu moni vakarokorokotaki,
E na loma ni nomuni Loqi Tabu,
Na Kalou (El) i Isireli, o Koya e dau solia na kaukaua
kei na qaqa vei ira na nona tamata.
Me vakacaucautaki ga na Kalou (Elohim)!
-Same 68:34-35

A kemuni na TURAGA (Yahweh) Daulewa (Sovereign), raica oni a bulia na lomalagi kei na vuravura e na nomuni kaukaua levu ni oni dodoka na ligamuni, ka sega ni dua na ka, me dredre vei kemuni.
Oni vakaraitaka na yalololoma vei ira na udolu, ia oni kauta mai na itotogi ni nodra ivalavala ca na qase, me mai bika na lomaseredra na luvedra era muri ira mai: O kemuni oni valaitamera, o kemuni na Kalou (El) kaukaua, na TURAGA ni lewe vuqa (Yahweh of Host) na yacana. E uasivi na nomuni vakanananu, ka vakaitamera na nomuni cakacaka, baleta na matamuni e tadola tiko i na nodra ivalavala kecega na luve ni tamata; moni solia vei ira kece na ka me veiraurau ga kei na nodra dui ivalavala yadudua ka veiganiti kei na nodra itovo.
-Jeremaia 32:17-19

E kilikili kemuni na Turaga (Sovereign), na neimami Kalou (Elohim),
Moni ciqoma na veivakarokorokotaki, na lagilagi kei na kaukaua,
Baleta oni a bulia na veika kece,
E na vuku ni nomuni gagadre, era a buli kina,
Na veika kece era kabuli.
-Vakatakila 4:11


Wilika Talega Ke Rawa
Vakatekivu 18:14, Lako Yani 15:1-18, Same 29, Marika 4:35-41

Na Kalou e Dauveivosoti

Kivei kemuni au laveta cake na mataqu,
Vei kemuni oni vakaitikotiko mai lomalagi.
Me vaka na mata ni bobula, ni dau rai i na liga ni nona turaga,
kei na mata ni vada, ni dau rai i na liga ni nona marama,
sa rai tiko vakakina na mata i keimami Vua na TURAGA
na neimami Kalou (Yahweh our Elohim),
me yacova ni sa vakaraitaka mai vei keimami na Nona loloma.
Ni lomani keimami, TURAGA (Yahweh), ni lomani keimami,
baleta keimami sa sinai tu e na neimami dau beci,
Na neimami bula sa sinai vutuvutu e na nodra veivakalialiai na dokadoka,
kei na nodra veibeci na viavialevu.
-Same 123: 1-4

Ia o kemuni, oni a sa mate oti e na vukuni nomuni talaidredre kei na nomuni ivalavala ca, oni a dau bula tu kina eliu, ni oni a dau vakamuria tu na ivakarau ni vuravura oqo, vata kei na nona lewa na tui ni kaukaua e macawalala, na yalo e vakauqeti ira tiko na dautalaidredre. O keda kece eda a dau bula talega e na kedra maliwa e na dua na gauna, ni da a dau vakaceguya tu ga na gagano ca ni leweniyagoda ka dau muria tiko na kena gagadre kei na kena vakasama. Me vakataki ira na kena vo, eda dau vakayacora tu ga na veika eda na cudruvi kina.
Ia, na Kalou (Elohim) o koya e sinai vutuvutu tu vua na loloma, e na vukuni nona dau lomani keda vakalevu, sa vakabulai keda tale, e dina ga ni da sa mate tu e na vuku ni ivalavala ca, vata kei na Karisito (Messiah) - e na loloma ga, oni a vakabulai kina.
-Efeso 2:1-5



Wilika Talega Ke Rawa
Lako Yani 33:19, Na iVakarua 4:31,
Niemaia 9:29-31, Maika 7:18-20, Roma 9:11-18

Na Kalou e Yalosavasava

O Au na TURAGA (Yahweh), o Koya e a kauti kemuni laivi mai na vanua o Ijipita, meu mai nomuni Kalou (Elohim); o koya oya e dodonu kina moni yalosavasava, baleta o Au, Au yalosavasava.
-Vunau ni Soro 11:45


E na yabaki a mate kina o tui Usaia, au a raica talega kina na TURAGA (Yahweh) ni dabe toka e na iDabedabe Vakatui, cecere ka cecekia, qai robota kece tu na valenisoro na nona kote tiyara. E cake era tu cake tu mai kina na serafimi; ka ra tauya ono na tabadra; e rua me tabonaka na matadra, e rua tale era tabonaka kina na yavadra, kei na rua tale era dau vuka kina. Era a qai veikacivi tiko, ka kaya,
“E savasava, e savasava, e savasava na TURAGA ni Lewe Vuqa (Yahweh of Host), na vuravura taucoko sa vakasinaiti tu e na Nona lagilagi”.
-Aisea 6:1-3


Oqo na veika e kaya o koya e Duabau e cecere ka cecekia,
o koya e tiko e na bula tawamudu, ka yacana o yalosavasava,
“Au bula tiko e na vanua cecere ka tabu,
vata kei koya e yaloraramusumusu ka yalomalumalumu,
meu vakabula tale na yalodra o ira era lolovira
ka vakabula talega na yalodra o ira era bibivoro.
Au na sega ni veibeitaki tiko me tawamudu,
kau na sega talega ni dau cudrucudru tu ga,
baleta qori e na vakavuna me na leqa koso na yalo e mataqu – na bula ni tamata au a bulia.”
-Aisea 57:15-16

Ni oni sa luvena dau talatalairawarawa, moni kakua tale ni vakamuria na gagadre ca a dau tu vei kemuni e na gauna ni nomuni lecaika. Ia, me vaka ni yalosavasava o koya e sa kacivi kemuni, o kemuni talega moni yalo savasava vakakina e na nomuni itovo kece sara; baleta sa volai tu,
“Moni yalosavasava, baleta o Au, Au yalosavasava.”
-1 Pita 1: 14-16



Wilika Talega Ke Rawa
Lako Yani 15:11, Vunau ni Soro 22:31-33, Same 99,

Vakatakila 4, 15:2-4.

Na Kalou e Dau Yalovinaka

E dau yalovinaka na TURAGA (Yahweh) ka dau yalododonu;
Io, na noda Kalou (Elohim) e dau yalololoma.
Na TURAGA (Yahweh) e dau taqomaki ira na yalorawarawa,
Au a vakalolovirataki, a qai vueti au o Koya.
Lesu tale i na nomu vakacegu i yaloqu,
Baleta na TURAGA (Yahweh),
sa cakava e vuqa na ka lelevu e na vukumu.
-Same 116:5-7

Ia na vosa a qai yaco me tamata, qai vakaitikotiko e na keda maliwa (keitou a raica na kena i serau, na serau e kune ga vua e duabulu a vakatubura na Tamada) ni sinai e na loloma kei na dina.
-Joni 1:14

E na vakaitamera ni nona loloma, eda sa mai vakasinaiti kece tu kina; na loloma e na dela ni loloma. Na ivakaro eda a ciqoma mai vei Mosese; ia na loloma kei na dina e a kauta mai o Jisu na Karisito (Yahshua the Messiah).
-Joni 1:16-17

Ia na Kalou (Elohim) o koya e vutuniyau e na yaloloma, e dau lomani keda baleta na cecekia ni loloma e tu vua. E dina ga ni da sa mate oti tu e na vuku ni noda i valavala ca, e a vakabulai keda vata kei Jisu Karisito (Messiah) o Koya, (e na loloma ga eda vakabulai kina). Sa qai vakaturi keda cake vata kece, ka vakatikori keda vata kece e na itikotiko vakalomalagi vei Jisu Karisito (Messiah Yahshua), me rawa kina, e na veitabagauna mai muri, me na vakaraitaka na cecekia kei na vakaitamera ni Nona yalololoma, e na nona dau lomani keda e na vuku i Jisu Karisito (Messiah Yahshua). Baleta e na loloma ga oni sa vakabulai kina, ni sa tiko na vakabauta; e sega ni rawa oqori mai vei kemuni vakataki kemuni, ia mai na iloloma soliwale ni Kalou (Yahweh). E sega sara ni rawa ni cakacakataki, de qai tini dokadokataka e dua na tamata.
-Efeso 2:4-9


Wilika Talega Ke Rawa
Lekutu: 24-26, Vakaibalebale 3:33-35,
Roma 5:12-21

Na Kalou e Dau Veivosoti

O cei e Kalou (El) me tautauvata kei kemuni,
o kemuni oni bokoca na ivalavala ca, ka rai sivita na nodra talatalaidredre
o ira na vo ni nona kawatamata?
O koya e sega ni dau cudru tu me tawamudu,
baleta e dau marautaka me vakaraitaka na yalololoma.
E na vuki tale mai o Koya
Me vakaraitaka tale na Nona yalololoma vei keda;
E na tarova na noda ivalavala ca
Oni na qai kolo laivi na nodra ivalavala ca kece sara
i na boto ni wasaliwa.
Oni na vakaraitaka na dina vei Jekope,
kei na yalololoma vei Eparayama,
me vaka na nomuni bubului vei ira na neimami qase
mai liu sara, e na veitabagauna makawa.
-Maika 7:18-20

Oqo na itukutuku keitou a rogoca mai Vua, ka keitou sa mai vakaraitaka oqo vei kemuni: ni rarama na Kalou (Elohim); ka sega sara ga vua na butobuto. Kevaka eda kaya ni da sa veitokani tiko kei koya, eda qai lakova tiko ga na sala butobuto; eda lasulasu, baleta eda sega ni vakayacora tiko na dina.
Ia kevaka eda lako tiko e na rarama, baleta ni tiko e na rarama o Koya, eda sa veitokani dina tiko vakaveitacini, na dra i Jisu Karisito (Yashua Messiah) na luvena, sa vakasavasavataka oti vakadua na noda ivalavala ca kecekece.
Kevaka eda kaya ni sega vei keda na i valavala ca, eda vakaisini keda tiko ga vakataki keda, baleta e sega vei keda na dina.
Kevaka eda vakatusa na noda ivalavala ca, o Koya e na nona yalodina kei na yalololoma, e na vosota na noda ivalavala ca, me vakasavasavataki keda kina mai na noda dukadukali kece sara.
Kevaka eda kaya ni da se sega ni bau valavala ca, eda sa cakava tiko ga me lasulasu o koya, ka ni sega ni tiko vei keda na nona vosa.
I Joni 1:5-10



Wilika Talega Ke Rawa
Lekutu 14:1-35, I Tui 8:27-53, Same 32:1-5, Taniela 9:1-19,

Maciu 6:14-15, 18:21-35.

Na Kalou e dau Veivakacegui

Moni kakua ni tautauvata kei ira na tamamuni vata kei ira na tuakamuni, o ira era a sega ni yalodina Vua na TURAGA (Yahweh), na nodra Kalou (Elohim) na nodra qase, a qai laivi ira kina me ra kawaboko (desolation) me vaka oni sa raica e matamuni. Moni kakua ni babamatua me vakataki ira na tamamuni; ia moni soli i kemuni Vua na TURAGA (Yahweh) moni curu i na nona Loqi tabu, ka ni sa vakatabuya oti tu o koya me tawamudu ka moni qarava na TURAGA (Yahweh) na nomuni Kalou (Elohim), me rawa ni vukica laivi mai vei kemuni na nona leva waqawaqa. Io, kevaka oni vuki lesu Vua na TURAGA (Yahweh), era na qai vakarautaka na yalololoma vei ira na tacimuni kei ira na luvemuni, o ira era vakabobulataki ira tu, era na qai lesu mai ki na vanua oqo; baleta na TURAGA (Yahweh) na nomuni Kalou (Elohim) e dau yalovinaka ka dauyalololoma. E na sega ni vukica tani na matana mai vei kemuni, kevaka oni lesu tale Vua.
-II Veigauna 30:7-9

Na TURAGA (Yahweh) e daulomasoli ka dauyalololoma,
e berabera sara na nona vakacudrui, ia qai vuable e na loloma.
Na TURAGA (Yahweh) e dau vinaka vei keda kecekece,
Na Nona yalololoma e kovuta vakadua na ka kece a bulia.
-Same 145:8-9

Me vakavinavinakataki na Kalou (Elohim) na Tama ni noda Turaga (Master) o Jisu Karisito (Yashua Messiah), ka Tama ni veivakacegui, na Kalou (Elohim) ni vakacegu, o Koya e dau vakacegui keda mai na noda veileqaleqa, me rawa ni da vakacegui ira era vauci tu e na veimataqali leqa, e na Yalo vata ga sa vakacegui keda tiko kina na Kalou (Elohim). Me vaka ga ni drodrova tiko mai na noda bula na veivakararawataki nei Karisito (Messiah), e yaco kina e na vuku i Karisito (Messiah) e na mai vuabale kina na noda vakacegui.
-2 Korinica 1:3-5



Wilika Talega Ke Rawa
Lako Yani 33, 19, Niemaia: 16-19, Same 103, Lele i Jeremaia 3:19-23,
Kolosa 3:12-14

Na Kalou E Vosoti Ira Era Veivutuni

E kaya vei Mosese na TURAGA (Yahweh), “Taya mai e rua tale na vatu raraba me vaka na kena eliu; Au na qai vola kina na vosa kece era a volai tu e na imatai ni vatu raraba e rua, o sa voroka.
-Lako Yani 34:1

Sa mani taya e rua na vatu raraba me vaka ga na kena eliu o Mosese; oti sa qai cabe cake tale i na ulunivanua o Saineai, e na mataka lailai sara me vaka e vakarota vua na TURAGA (Yahweh), ka kauta tiko yani e ligana na vatu raraba e rua.
Sa qai sobu mai na TURAGA (Yahweh), qai mai duri tu vata kei koya, qai kaya vua ni yacana na TURAGA (Yahweh). Sa qai toso e mata i Mosese qai kaya, “Na TURAGA (Yahweh), na TURAGA (Yahweh) na Kalou (El) dauyalololoma, daulomasoli, dauvosovosota vakadede, vuabale e na loloma kei na dina, dauyalololoma vei ira na udolu, ka dauvosoti ira era daucakaca, dautalaidredre se dau ivalavala ca. Ia qori e na sega ni tarova na kedra itotogi, o ira e sa vakadinadinataki na nodra ivalavala ca; e dau totogitaki ira na itabagone kei ira na dui luvedra, e na vuku ni nodra ivalavala ca na tamadra, me yacova yani na ikatolu kei na ikava ni tabatamata.
Sa cuva sobu sara vakatotolo i na dela ni qele o Mosese, me vakamamasu, qai kaya, “Kemuni na Turaga (Yahweh), kevaka au sa kunea na veivakadonui e matamuni” e kaya o koya, “ia vakadonuya Turaga (Yahweh) moni mai lako vata kei keimami. E dina, ni oqo eso na tamata babamatua domoqa, ia ni vosota na neimami caka ca, kei na neimami ivalavala ca, ka tauri keimami me keimami nomuni.
E vosa sara o Koya, “Au sa na tauyavutaka e dua na veiyalayalati. E na matadra kece na nomu tamata, au na vakayacora e so na cakacaka mana lelevu, e sebera vakadua ni bau caka e vuravura se e na dua na matanitu. O ira kece na tamata, o bula tiko e na kedra maliwa, era na raica na cecekia ni cakacaka, o Au na TURAGA (Yahweh), Au na cakava e na vukumu.”
-Lako Yani 34:4 -10


Wilika Talega Ke Rawa
Same 86:15, 103:8, Joni 3: 16-21, I Joni 1:9

Na Kedra iTukutuku Na Isireli E Ka Ni Noda Vuli

Au sega ni vinakata moni lecaika tiko e na dina, kemuni na taciqu, baleti ira na noda qase, ni ra a taubale e ruku ni o, ka takosova kece talega na waitui. Era a papitaiso kece vei Mosese e na o kei na wai. Era a kania vata kece na kakana vakayalo ka gunuva talega na wainigunu vakayalo; baleta era a gunu kece mai na Uluvatu vakayalo a lako tiko vata kei ira; na Uluvatu oya o Karisito (Messiah).
Ia na Kalou (Elohim), a sega ni taleitaka e levu vei ira, qai vakavuna qori na nodra mate laivi tu ga yani e na veivanua dravuisiga.
Na veika oqori a yaco me idusidusi vei keda, me tarova na noda galeleta mai vuniyaloda na veika ca, me vakataki ira. Meda kua ni lotutaki matakau me vakataka eso vei ira; me vaka sa volai tu “Era a dabe sobu me ra kana ka gunu, oti era qai tucake me ra veimeketi.” Meda kua ni dauveidauci e na kena veimataqali, me vaka era cakava eso vei ira – e na dua ga na siga e ruasagavulukatolu na udolu vakadua vei ira era a mate.
-I Korinica 10:1-8

Na veika kece oqo a yaco vei ira me idusidusi, ka sa volai tu vakaivola meda na mai vuli kina, o keda eda bula taudonuya na ivakataotioti ni gauna. O koya oqori, mo laivi koya kina e nanuma ni sa tudei tu, me qaqarauni de na qai lutu! E sebera sara ni yaco vei kemuni na veivakatovolei, vakavo ga na kena sa yaco tiko vakawasoma vei ira na tamata. Na Kalou (Elohim) talega e Yalododonu, e na sega ni vakatara moni vakatovolei e na veimataqali vere oni na sega ni tabea rawa. Ia ni sa veivakatovolei, e na vakaraitaka tale tiko ga mai o Koya na sala oni na tabea vinaka kina.
I Korinica 10:11-13


Wilika Talega Ke Rawa
Lako Yani 14, 17:1-7, Joni 6, Iperiu 2:9-18,
Jemesa 1:12-15

Vakamamasu E Na Vukudra Na Isireli, O Mosese

Sa qai vakamasuta na TURAGA (Yahweh) na nona Kalou (Elohim) o Mosese, “TURAGA (Yahweh)” e kaya o koya, “na cava me waqawaqa kina na nomuni rarawa cecekia vei ira na nomuni tamata, o ira Oni a kauti ira laivi mai Ijipita e na kaukaua levu kei na liga vakaitamera? Na cava beka me soli kina vei ira na kai Ijipita me ra kaya, ‘E a kauti ira tani mai ke o koya e na inaki ca, me rawa ga ni lai vakamatei ira e na veiulunivanua, ka vakawabokotaki ira mai na dela i vuravura?’ Ni vakanadakuya na nomuni rarawa cecekia, ka veivutunitaka na Nomuni cudru baleti ira na nomuni tamata. Nanumi ratou na nomu dauniveiqaravi o Eparayama, o Aisake, vata kei Isireli, kei na nomuni bubului vei iratou, o kemuni vakataki kemuni e na nomuni a kaya, “Au na vakalewevuqataka na nomudou kawa me ra vaka na iwiliwili ni kalokalo mai lomalagi, kau na qai solia vei ira na nomudou kawa na vanua taucoko oqo au sa yalataka me ra na taukena ka sega ni mudu.’” Sa qai veivutunitaka tale na TURAGA (Yahweh) na ca a sa nakita me vakayacora vei ira na nona tamata.
Sa qai vuki o Mosese, ka siro mai na ulunivanua, qai lave tiko mai ligana. na vatu raraba ruarua ni veiyalayalati. Na vatu raraba e rua sa volavolai tu na yasana ruarua, e matana kei na dakuna. Na vatu raraba e rua e nona cakacaka sara ga na TURAGA (Elohim), kei na veika e volai tu kina era we ni ligana na TURAGA, era ceuti tu e na vatu raraba e rua.
-Lako Yani 32:11-16

A qai yaco, ni toro volekata ga yani na keba o Mosese, sa raica sara na luve ni bulumakau kei na veimekemeketi: qai curumi Mosese e dua na yalo katakata levu, qai mani kolotaka mai ligana na vatu raraba ruarua, rau qai kavoro e na boto ni ulunivanua. Oti sa qai taura o koya na luveni bulumakau era a bulia, vakama e na bukawaqa, ka vakavurumemeataka, wakia e na wai, qai vakasaurarataki ira na kawa i Isireli me ra gunuva.
-Lako Yani 32:19-20


Wilika Talega Ke rawa
Vakatekivu 15:1-5, 22:15-8, 26:2-4, Vakarua 9:16-21,
Same 106:23. Jona 3 Cakacaka 7:40-42.

Na Luve ni Bulumakau Koula.

Ni ra raica na tamata ni sa dede na nona lesu sobu mai na ulunivanua o Mosese, era sa mani soqo wavolivoliti Eroni na tamata, era qai kaya vua, “Tu, bulia e dua na noda kalou (elohim) me mai liutaki keda; baleta na tamata qo o Mosese, o koya e a kauti keda laivi mai Ijipita, eda sa sega ni kila se cava sa yaco vua”.
Sa kaya sara vei ira o Eroni, “Ni luvata mai na sau koula era dui dara tu e daligadra o ira na watimuni, kei ira na luve­muni tagane, kei ira na luvemuni yalewa, qai yauta kece mai vei au. Era sa qai dui luvata na sau koula mai na dui daligadra o ira kece na tamata, era qai kauta kece vei Eroni.
Sa taura sara o koya na ka era solia mai vua, oti qai bulia kina, e na nona iyaya ni ceuceu, e dua na matakau e na ibulibuli ni luve ni bulumakau, era qai kaya, “I Isireli, oqo na nomuni kalou (elohim), o koya e a kauti kemuni laivi mai na qele vakaIjipita.”
Ia ni sa raica qori o Eroni, sa qai tara e dua na icabocabo ni soro e na mata ni luve ni bulumakau, oti sa qai kacivaka vei ira o Eroni, “Nimataka sa na yaco e dua na solevu vua na TURAGA (Yahweh). Era sa mani sou vakamataka e na siga tarava, ka ra vakacabo isoro kama, kei na imadrali ni veitokani. Oti era sa qai tiko sobu me ra kana ka gunu, ka tu me ra veimeketi.
Sa kaya sara vei Mosese na TURAGA (Yahweh), “Biubiu, mo lako sobu vei ira, baleta o ira na nomu tamata, o ira o a kauti ira laivi mai Ijipita, era sa vakacacani ira tiko vakataki ira.
Sa totolo sara na nodra riba tani mai na ivakaro Au a vakarota vei ira: era sa bulia e dua na nodra matakau ceuceu luve ni bulumakau, ka ra sa sokalou tiko vua, ka vakacabo isoro vua, era qai kaya, “Oqo na nomuni kalou (elohim), I Isireli, o koya e a kauti kemuni laivi mai Ijipita”. Oti sa qai kaya tale na TURAGA vei Mosese “Au sa raici ira na tamata oqo, kau raica ni ra tamata babamatua ka domoqa dina.
Biuti Au duadua tu mada, me waqawaqa mada vei ira na noqu rarawa, me rawa vei Au meu vakarusai ira; oti au na qai bulia cake mai vei iko e dua na matanitu vakaitamera.
Lako Yani 32:1-10


Wilika Talega Ke Rawa
Na iVakarua 9:7-15, Niemaia 9:16-19, Same 106:19-22,
Cakacaka 7:37-41