NA IVUNAU E TINI: Na Kocokoco

E tabu vei iko mo kocova na nona vale na wekamu vakaitikotiko, e tabu vei iko mo kocova na wati i wekamu vakaitikotiko, se nona dauveiqaravi tagane se na nona dauveiqaravi yalewa, na nona bulumakau se nona asa, se cava ga e nona na wekamu vakaitikotiko.
-Lako Yani 20:17.

Kakua ni dinautaka e dua na ka, ia mo ni veilomalomani ga vakataki kemuni; baleta o koya e lomana e dua tale, e sa vakayacora tiko na lawa. Na ivakaro eso, “e tabu vei iko mo vakayacora na veidauci”, “e tabu vei iko mo laba”, “e tabu vei iko mo butako”, “e tabu vei iko mo veibeitaki vakailasu”, “e tabu vei iko na kocokoco.“ kei na ivakaro cava tale e tu, era vauci vakadua, e na dua ga na kena ivosavosataki, oya “Mo dau lomani ira na wekamu vakaitikotiko, me vaka ni o dau lomani iko vakataki iko". Na loloma e sega ni vakatubu ca vei ira na wekada vakaitiko­tiko. Na loloma ga na noda vakayacora na ivakaro.
-Roma 13:8-10.

Na ivakarau vaKalou (holiness) ni waki kei na yalovakacegu, e iyau levu duadua.
Baleta eda a sega ni kauta mai e dua na ka i vuravura oqo, e sa matata talega ni da na sega ni colata laivi e dua na ka. Ke sa tu na ka meda kania, kei na ka meda dara­maka, laiva me cegu na yaloda e na veika oqori.
-I Timoci 6:6-8.

Raica matua me kua ni curuma na nomuni bula na yalokocokoco, ka moni dau vakacegu ga e na veika sa tu vei kemuni, baleta sa kaya oti o Koya,
“Au na sega vakadua ni laivi kemuni; se guilecavi kemuni.”
-Iperiu 13:5.




Wilika Talega Ke Rawa
Vakarua 31:6; Vakaibalebale 1:10-19; Filipai 4:11-12; I Timoci 6:9-11;
Jemesa 4: 1-3; I Joni 2:15-17.

NA IVUNAU E TINI: Na Veibeitaki Vakailasu

E vakatabui vei iko mo beitaka vakailasu na wekamu vakaitikotiko.
-Lako Yani 20:16

Kevaka e dua na ivakadinadina lasu e tu me beitaka e dua na tagane ni cakava e dua na ka e cala vakalawa, sa na vinakati vei rau ruarua na tamata rau veibeitaki tiko, me rau na basika, ni tiko na TURAGA (Yahweh), e na matadra na bete kei ira na turaganilewa era vakailesilesi tiko e na gauna oya.
O ira na turaga ni lewa me ra qai vakayacora e dua na veivaqaqai vinaka, ia ke sa kune ni tamata lasulasu na ivakadinadina oya, ni a lasu wale na nona veibeitaki vua na wekana, ia me qai caka sara ga vua na ka a via cakava vua na wekana. E vinakati me kau laivi vakadua na ivakarau ca oqo mai na kemuni maliwa.
Ia ni ra na rogoca na ka oqo o ira na vo ni tamata, e na tuburi ira na domobula, e na qai sega vakadua tale ni caka na ivalavala ca oqo e na kemuni maliwa.
-Na iVakarua 19:16-20

TURAGA (Yahweh) o cei e vakatarai me vakaitikotiko e na nomuni vale?
o cei e vakatarai me bula e na nomuni ulunivanua tabu?
O koya e dau vakarautaka na itovo dodonu
dau cakava na ka e dodonu,
ka dau kaya na ka dina mai vuniyalona
O koya e sega ni kune na kakase e yamena,
e na sega ni cakava na itovo ca vei ira na wekana vakaitikotiko,
se nakita me vakaucacataki ira na wekana,
O koya e raica rawa e matana ni o ira na tamata ca era sa mate dina tu,
ia e dau vakarokorokotaki ira era rerevaka na TURAGA (Yahweh),
o koya e na vakayacora na nona yalayala,
kevaka mada e na leqa kina
o koya e dinautaka na nona ilavo, ia qai sega ni lavaka na kena tubu
ka sega ni taura na ilavo, me beitaki ira lasu kina o ira e sega nodra cala.
O koya e cakava na veika kece oqo
E na sega ni yavalati rawa.
-Same 15.


Wilika Talega Ke Rawa
Vakaibalebale 12:17-18; 25:18; Aisea 29:19-21; Maciu 15:10-20;
Marika 14:53-64

NA IVUNAU E TINI: Na Butako

E tabu vei iko mo butako.
-Lako Yani 20:15

Kakua ni vakararavi i na ivalavala vakalawaki ca,
Se dokadokataka na iyau butakoci;
Ke tubu tikoga na iyau,
Kakua ni biuta kina na yalomu.
Na Kalou (Elohim) sa vosa oti vakadua,
Au sa rogoca oti vakarua,
Na kaukaua e taukena na Kalou (Elohim)
o kemuni talega, TURAGA (Yahweh), oni taukena na yalololoma.
Baleta oni dau vakarautaka vei ira na tamata yadudua
na veika me veiraurau vinaka kei na nodra dui cakacaka.
-Same 62:10-12.

Vakarota vei ira na tamata vutuniyau e na vuravura oqo, me ra kakua ni vakadokadokataka se vakanuinui i na iyau tawadei, ia me ra biuta ga na nodra inuinui vua na Kalou (Yahweh) bula, o koya e solia vakayauyau vei keda na veika meda marautaka.
Vakaroti ira me ra dau caka vinaka, me ra vutuniyau ga e na caka vinaka, me ra dauyalosoli ka taleitaka na veiwasei. Me ra vakotora e dua na nodra yavu vinaka, e na vuku ni gauna sa roro mai, me rawa ni ra tatakube matua tiko i na bula tawamudu.
-I Timoci 6:17-19.

Laivi koya e butako tiko me kakua tale ni butako; ia me sa cakacaka, me cakava na veika e yaga, e na ligana o koya vakataki koya, me qai rawa kina ni tu vua na ka, me wasea vata kei ira era gadreva na veivuke.
-Efeso 4:28.


Wilika Talega Ke Rawa
Vakaibalebale 1:10-19; 10:2; Aisea 10:1-4;
Malakai 3: 6-12; Taito 2:9-10.

NA IVUNAU E TINI: Na Veidauci

E vakatabui vei iko mo vakayacora na veidauci.
-Lako Yani 20:14

Na cava mo garova tiko kina, i luvequ, na yalewa dautagane,
mo lai mokolaka tiko kina na yagona e dua drau sega ni veikilai?
Na ivalavala ni tamata, e dikevi matua tiko mai vua na TURAGA (Yahweh),
ka wanonova vinaka tiko mai o Koya, na nona ilakolako kece.
Na ivalavala vakasisila ni tamata ca, e na tudaitaki koya,
na ivau ni nona ivalavala ca e na vesuki koya matua.
E na mate tabu tatau o koya, e na ilevu ni nona lecaika,
E na muri cala tiko ga kina.
-Vakaibalebale 5:20-23

Oni sa rogoca ni ra tukuna o ira mai na gauna makawa, ‘Mo kakua ni vakayacora na veidauci.’ Ia au kaya vei kemuni, o koya e raica ga e dua na yalewa qai garova, e sa veidauci oti vata kei koya e vuniyalona.”
-Maciu 5:27-28

Oni sega beka ni kila ni ra na sega ni taukena na matanitu ni Kalou (Yahweh) o ira era tawayalododonu? Kakua ni cala na nomuni vakasama. E sega ni dua e dau lasa-e-tuba, se dau daulotutaki mata­kau, se dauveidauci, se dauvakasalewalewa, se dau veiwedevi vakatagane se vakayalewa, se daubutako, se daukocokoco, se daumateni, se dauveivakacacani, se daukovekove, me na vakaiwasewase e na matanitu ni Kalou (Yahweh).
Eso sara ga vei kemuni a dau cakava tu na veika oqori e liu. Ia qo oni sa vakasavasavataki oti, oni sa vakatabui oti, oni sa vakadonui oti talega e na yaca ni Turaga (Master) o Jisu (Yahshua), kei na Yalo ni noda Kalou (Elohim).
-I Korinica 6:9-11

Na vakawati e dodonu me ka dokai vei keda kecekece, ia na loga ni vaka­wati me kakua ni vakadukadukalitaki; baleta o ira era dausaqamua kei ira era dauveidauci, na Kalou (Elohim) e na veilewaitaki ira.
-Iperiu 13:4



Wilika Talega Ke Rawa
Vakaibalebale 5:1-19; 6:20-35; Roma 1:18-27;
Efeso 4:17-24; Kolosa 3:1-7; I Cesalonaika 4:3-8

NA IVUNAU E TINI: Na Laba

E vakatabui vei iko mo laba
-Lako Yani 20:13

O cei ga e vakadavea na dra ni tamata,
na tamata talega e na vakadavea na nona dra;
baleta e na ibulibuli ni Kalou (Elohim)
e a bulia kina na tamata o Koya.
-Vakatekivu 9:6

Oni sa rogoca ni ra dau tukuna o ira mai na gauna makawa, “Mo kakua ni laba, baleta o koya e laba e na sotava na mataveilewai!”
Ia au kaya qo vei kemuni, ni o koya e levataka wale tu ga vakaveitalia na tacina, e na sotava na mataveilewai!” E tukuni talega ni o koya e kaya vei tacina ‘ulu-lala’ e na saumi taro e na matabose, ia o koya e rukaki tacina, ‘o iko na tamata tawayaga’ , e rawa ni bala i na drano bukawaqa mai keiyina.”
-Maciu 5:21-22

Baleta qo na itukutuku oni a rogoca mai na ivakatekivu; ni dodonu meda dau veilomalomani. Kakua ni tautauvata kei Keni, o koya e a duavata kei na vunica, qai vakamatei tacina. Na cava a labati tacina kina o koya? Baleta na nona cakacaka a sega ni vinaka, ia na cakacaka nei tacina a daumaka vakaoti
Kua ni kurabui, kemuni na mataveitacini, ke sevaki kemuni o vuravura. Eda kila vinaka ni da sa lako sivia mai na mate, me sa noda na bula, baleta eda dau lomani ira na mataveitacini.
O koya e sevaki tacina e daulaba; ia eda kila vinaka ni sega ni dua na daulaba, e kune vua na bula tawamudu.
Qo na sala eda na kila kina se cava na loloma: baleta o Koya e a solia na Nona bula e na vukuda: O keda talega meda solia na noda bula e na vukudra na tacida.
- I Joni 3:11-16

Wilika Talega Ke Rawa
Vakatekivu 4:1-16; Lekutu 35:9-34;
Maciu 15:10-20; Joni 8:42-44; Roma 1:28-32

NA IVUNAU E TINI: Na iTubutubu

Mo vakarokorokotaka na tamamu kei na tinamu, me rawa
ni o bula balavu e na vanua e solia vei iko na TURAGA (Yahweh)
na nomu Kalou (Elohim).
-Lako Yani 20:12

O cei ga e yavita na tamana se na tinana e dodonu me vakamatei.
-Lako Yani 21:15

Ke dua e rukaka na tamana se na tinana, e na dodonu me vakamatei. O koya e sa rukaka na tamana se na tinana; sa na baleti koya ga vakataki koya na nona mate.
-Vunau ni Soro 20:9
Na vosa vakaibalebale nei Solomoni:
Na gone vuku e vu ni reki vei tamana,
ia na gone lialia e vu ni rarawa vei tinana.
-Vakaibalebale 10:1

Vakarorogo vei tamamu, o koya e a solia vei iko na nomu bula
kakua talega ni sevaki tinamu ni sa qase cake mai o koya,
Volia na dina ia kakua ni volitaka;
kauta mai mo taukena na vuku, na yalomatua kei na kilaka.
Na tamana na tamata yalododonu e tu vua na reki vakaitamera;
o koya e gone vuku na luvena, e na dau marautaki koya
Me rau dau mamarau mada ga o tamamu kei tinamu;
ka me dau nona tu ga na reki o koya e a vakasucumi iko.
-Vakaibalebale 23:22-25

Ragone, ni dautalai rawarawa vei ira na nomuni itubutubu mevaka Vua ni Turaga (Yahweh); baleta qori e dodonu. “Vakarokorokotaki tamamuni kei tinamuni” -- oqori na imatai ni ivakaro e semati vata kei na dua na vosa ni yalayala—“me rawa ni lako vinaka vei kemuni na veika kece, moni na qai rawa bula balavu e na dela ni vuravura oqo.”
-Efeso 6:1-3


Wilika Talega Ke Rawa
Malakai 4:5-6; Kolosa 3:20-21; II Timoci 3:1-5; Taito 1:6-9

NA IVUNAU E TINI: Na Siga Ni Vakacecegu

Nanuma na siga ni vakacecegu, e na nomu dau vakatatabutaka.
E ono na siga mo dau cakacaka kina ka kitaka na nomu cakacaka kecekece,
Ia na ikavitu ni siga e Nona siga ni vakacecegu na TURAGA (Yahweh) na nomu Kalou (Elohim); e na siga oqori e tabu vei iko mo cakava kina e dua na cakacaka, oya o iko se o luvemu tagane se o luvemu yalewa, o ira na nomu dauniveiqaravi tagane se o ira na nomu dauveiqaravi yalewa, se na nomu manumanu se o koya e nomu vulagi ka tiko e na loma ni nomu bai. Baleta e na loma ni ono na siga, e a bulia kina na lomalagi, na vuravura, na wasawasa kei na veika era sinai tu kina na TURAGA (Yahweh), ia a qai vakacegu e na ikavitu ni siga. Qori a qai vakalougatataka kina na siga ni vakacecegu na TURAGA (Yahweh), qai vakatabuya.
-Lako Yani 20:8-11

Ni biubiu mai keya, e a lako sara i na Valenisoro, ia raica ni a tiko voli mai keya e dua na turaga sa paralasi tu na ligana. Era tarogi Koya sara ni ra kaya, “E vakatarai beka vakalawa na veivakabulai e na Siga ni Vakacecegu?” Qo me rawa ga ni ra beitaki Koya.
E kaya yani vei ira o Koya “Ke dua vei kemudou e vakasipi, ia qai lutu i na ikelimusu na nona sipi e na siga ni vakacecegu, e na sega beka ni lai laveta cake mai me vueta? E sega beka ni levu cake sara na vakamareqeti ni dua na tamata mai na dua na sipi! O koya oqori e dodonu kina vakalawa na veivakabulai e na siga ni vakacecegu.”
Oti qai kaya vua na turaga oya o Koya, “Dodoka cake na ligamu.“Sa dodoka sara na ligana, ka sa vakabulai vakadua tu na ligana paralasi, me tautauvata kei na ligana kadua.
-Maciu 12:9-13


Wilika Talega Ke Rawa
Vakatekivu 4:1-16; Lekutu 35:9-34; Maciu 15:10-20;
Joni 8:42-44; Roma 1:28-32

NA IVUNAU E TINI: Na Yaca Ni Kalou

Mo kakua ni vakayagataka cala na yaca ni TURAGA (Yahweh)
na nomu Kalou (Elohim); na TURAGA (Yahweh) e na sega ni taura ni sega ni cala o koya e vakayagataka cala na Yacana.
-Lako Yani 20:7

E dua na luvedrau tagane e dua na yalewa ni Isireli vata kei na dua na tagane ni Ijipita, a lako i na kedra maliwa na kai Isireli; a qai tubu e dua na veivala e na keba, ni rau a veivala o koya, vata kei na dua na tagane ni Isireli. A qai mani vosavakacacataka na YACA (1), e na dua na iru, na luvena tagane na yalewa ni Isireli oya. Era sa mani kauti koya vei Mosese. (Na yaca i tinana o Selomeci, na luvei Tipiri, e na mataqali i Tani.) Era sa mani tauri koya tiko vakavesu me yacova ni sa vakamatatataki vei ira na lewa ni TURAGA (Yahweh)
Oti sa qai vosa na TURAGA (Yahweh) vei Mosese ni kaya, “Kauta na dauvosa veivakacacani i na taudaku ni keba. O ira kece era a rogoci koya, me ra tabaka na uluna e na ligadra, qai laivi ira me ra virilaki koya e na vatu o ira kece na lewe ni isoqosoqo taucoko. Mo kaya talega vei ira na kai Isireli, “Ke dua e rukaka na nona Kalou (Elohim), me na taura o koya na kena itotogi. Ia o koya e vakaucacataka na YACA (1), me vakamatei. Me ra virilaki koya e na vatu o ira na lewe ni iSoqosoqo taucoko. Veitalia ke vulagi se itaukei, ni sa vosavakacacataka ga na Yaca ni TURAGA (Yahweh), e sa na tau vua na itotogi me vakamatei
((1) - E sega ni kune e na iVola Tabu Vakaiperiu na vosa “ni TURAGA” e na tikina oqo.)
-Vunau ni Soro 24:10-16

Na yaca ni TURAGA (Yahweh), e dua na vale cecere ka kaukaua,
Era dau dro kina na yalododonu, me ra kunea kina na veitaqomaki.
-Vakaibalebale 18:10.



Wilika Talega Ke Rawa
Lako Yani 3:13-15; Same 20; 86:5-12; Cakacaka 4:5-12

NA IVUNAU E TINI: Me Kua Na Qaravi Matakau Ceuceu

Mo kakua ni bulia e na vukumu, e dua na matakau ceuceu se na ivakatakarakara ni dua ga na ka mai lomalagi e cake, se mai vuravura e ra, se mai loma ni wai e ruku ni vuravura.
Mo kakua ni cuva vei ira o iko se sokalou vei ira; baleta o Au, na TURAGA (Yahweh) na nomu Kalou (Elohim), au Kalou (El) dauvuvu, au na totogitaki ira na gone, e na vuku ni nodra ivalavala ca na tamadra, me yacova na ikatolu ni itabatamata kei na kena ikava vei ira era cati au;
Ia au na vakarautaka na yalololoma vei ira na udolu (na itabatamata) era lomani au, ka maroroya na Noqu ivunau.

Me kakua ni caka vei keimami, kemuni na TURAGA (Yahweh),
me kakua ni caka vei keimami,
ia na Yacamuni ga me vakalagilagitaki,
e na vukuni Nomuni dauyalololoma kei na Nomuni dauyalodina.
Na cava mera kaya tiko kina na kai veimatanitu tani,
“Evei sara mada na nodra Kalou (Elohim)?”
Ia na noda Kalou (Elohim) e tiko mai lomalagi,
o Koya e dau cakava ga na ka e gadreva
Ia na nodra matakau e buli mai na siliva kei na koula
na cakacaka ni ligadra na tamata.
Era vagusudra, ia era sega ni vosa rawa,
vakamatadra, ia era sega ni rai rawa;
Era vakadaligadra ia era sega ni rogo rawa,
vakaucudra ia era sega ni boiboi rawa,
Era vakaligadra, ia era sega ni vakayayamo rawa,
vakayavadra ia era sega ni veilakoyaki rawa:
ka sega ni vosa rawa, mai na nodra itagitagi.
O ira era a buli ira era tautauvata ga kei ira,
vata kei ira kece talega era vakararavi vei ira.
- Same 115:1-8.



Wilika Talega Ke Rawa
Vakarua 7; Aisea 44:6-19; Jeremaia 10:1-16; 16:19-21;
Maciu 6:19-24; I Joni 5:21

NA IVUNAU E TINI: Me Kua Ni Dua Tale Na Kalou

O Au na TURAGA (Yahweh) na nomuni Kalou (Elohim), o Koya e a kauti kemuni tani mai Ijipita, mai na vanua ni veivakabobulataki. Me kakua ni so tale tiko na nomuni kalou (elohim) e mataqu.
-Lako Yani 20:2-3

Me laga sere vua na TURAGA (Yahweh), o vuravura taucoko;
me tusanaka na Nona dauveivakabulai
mai na dua na siga ki na dua tale na siga.
Tukuna na Nona dokai e kedra maliwa na veimatanitu;
kei na nona cakacaka veivakurabuitaki e kedra maliwa na tamata.
baleta e cecere na TURAGA (Yahweh), ka dodonu me vakacaucautaki;
e dodonu me rerevaki vakalevu cake mai vei ira na veikalou (elohim),
Baleta na nodra veikalou (elohim) na tamata era matakau ga:
ia na TURAGA (Yahweh) e a bulia na veilomalagi.
Na Lagilagi kei na Serau e tu vata kei Koya
Na kaukaua kei na mamarau e kune e na Nona itikotiko
Solia Vua na TURAGA (Yahweh); o kemuni na mataveiwekani vakavanua,
Solia Vua na TURAGA (Yahweh); na vei vakarokorokotaki kei na kaukaua,
Vakarautaka Vua na TURAGA (Yahweh) na veivakacerecerei
e veiraurau kei na Yacana;
Kauta mai e dua na isolisoli, qai lako mai Vua i Matana;
Sokalou Vua na TURAGA (Yahweh) e na lagilagi ni Nona yalosavasava,
Me sautaninini e matana, o vuravura taucoko;
Me qai vakayavutaki vinaka kina o vuravura;
ka me kakua ni qai vakayavalati rawa,
Laiva na lomalagi me marau, laiva na vuravura me reki;
Ka laivi ira na tamata me ra tusanaka tiko,
“Na TURAGA (Yahweh) e Nona na veiliutaki.”
-I Veigauna 16: 23-31.


Wilika Talega Ke Rawa
Lako Yani 18:8-10; Vakarua 4:32-39; 5:1-21; 13:1-16; Aisea 37:15-20; Efeso 4:4-6.

Na Veiyalayalati Ni Kalou Vata Kei Ira Na Isireli.

Ni sa oti e vula tolu vinaka, na nodra a biuti Ijipita mai na Isireli – oya mai na siga era a biubiu mai kina – era sa qai yaco i na vanua dravuisiga o Saineai. Ni ra biubiu ga mai Rifitimi, era sa curuma sara ga yani na vanua dravuisiga o Saineai, era qai mani lai keba toka na Isireli, e na vanua dravuisiga taudonuya ulunivanua.
Sa lako cake sara Vua na Kalou (Elohim) o Mosese, qai kacivi koya mai e na ulunivanua na TURAGA (Yahweh) ni kaya, “Qo na ka mo na kaya vei ira na Yavusa i Jekope kei na ka mo na tukuna vei ira na luvei Isireli: ‘O kemuni qo, oni a raica na ka au a cakava vei Ijipita, kei na noqu a keveti kemuni voli mai e na tabani ikeli, Meu kauti kemuni sara mai vei Au. Ia qo, kevaka oni talairawarawa vakatabakidua, ka vakabauta na Noqu vosa ni veiyalayalati, oni na yaco moni Noqu iyau talei duadua e na kedra maliwa na veimatanitu kecekece sara. E dina ga ni Noqu ga na vuravura, o kemuni oni na yaco moni dua na matanitu ni bete vei au, ka vanua vakatabui.’ Oqo na vosa mo tukuna vei ira na kai Isireli.”
Sa mani lesu tale o Mosese, qai kacivi ira vata kece na nodra qase na lewenivanua, oti qai tauca vei ira na vosa kecekece a vakarota vua na TURAGA (Yahweh) me mai tukuna. Era sauma vata kece na tamata, “Na ka kecekece e tukuna mai na TURAGA (Yahweh), keimami na cakava.” Sa qai kauta lesu tale o Mosese na nodra vosa na tamata vua na TURAGA (Yahweh).
E kaya na TURAGA (Yahweh) vei Mosese, “Raica Au na lako mai vei iko e na dua na o vavaku, me rawa ni ra rogoci Au talega na tamata Niu vosa tiko vei iko, me rawarawa kina na nodra biuta tiko na nodra inuinui vei iko.” Oti sa qai tukuna o Mosese, Vua na TURAGA (Yahweh), na vosa era a kaya na tamata.
-Lako Yani 19:1-9




Wilika Talega Ke Rawa
Vakarua 4:1-20; Jeremaia 31:31-34; Iperiu 8

Na Veiqaravi E Na Vanua Dravuisiga.

Solia na vakavinavinaka vua na TURAGA (Yahweh), dau kaciva na Yacana;
tusanaka na veika sa vakayacora vei ira na tamata,
Laga sere Vua, lagata na Same totoka (Psalm) ni veivakacaucautaki;
tukuna na Nona cakacaka veivakurabuitaki kecekece.
Bula mamarau tiko e na Yacana tabu;
laiva na vuniyalodra o ira era dau vaqara na TURAGA (Yahweh)
me mamarau tiko.
Vaqara na TURAGA, vata kei na Nona kaukaua;
vaqara mo vakanamata tikoga Vua.
Nanuma na Nona cakacaka veivakurabuitaki sa cakava oti o Koya,
na Nona cakacaka mana kei na vakataulewa e rogo mai gusuna;
O kemuni na kawa i Eparayama, na Nona dauniveiqaravi,
O kemuni talega na luvei Jekope, na Nona digitaki.
-Same 105:1-6

E kauti Isireli tani mai o Koya, era qai yauta mai na siliva kei na koula;
E na kedra maliwa na nodra veimataqali, e sega ni bau dua a bera
O Ijipita e mamarau ni ra sa biubiu;
baleta na nodra domobulataki Isireli, e a bikai ira;
E a tevuka o Koya e dua na o me vakarurugi ira,
kei na bukawaqa me vakararamataki ira e na bogi.
Era kerea, qai solia vei ira o Koya na toa ni veikau (quails)
ka vakamamautaki ira e na madrai ni lomalagi.
E dolava na vatu o Koya, qai coka mai kina na wai,
me vaka na uciwai e drodrova yani na vanua dravuisiga,
Baleta e nanuma tiko o Koya na Nona veiyalayalati tabu,
a solia vei Eparayama na Nona dauniveiqaravi,
A kauti ira tani mai kina na Nona tamata e na marau,
o ira na Nona digitaki e na reki;
e solia vei ira na nodra vanua na kai veimatanitu tani,
era qai taukena kina me nodra ivotavota
na veika era a bunotaka na tamata –
Me ra rawa ni maroroya na Nona ivakaro,
Ka vakamuria na Nona ivunau.
ALELUYA!
-Same 105:37-45


Wilika Talega Ke Rawa
15; Lako Yani 15:19-18:27; Joni 6;
Cakacaka 7:36-38; I Korinica 10:1-4

Na TURAGA (Yahweh); Na Qaqa Ni iValu.

E na siga oya e a vakabulai ira kina na kai Isireli na TURAGA (Yahweh), mai ligadra na kai Ijipita, era qai raici ira na kai Ijipita, o ira na kai Isireli, ni ra sa davo matemate tu e matasawa. Ia ni ra sa raica na kai Isireli, na kaukaua vakaitamera ni TURAGA (Yahweh) e na ka a vakayacora vei ira na kai Ijipita, era sa qai rerevaka na TURAGA (Yahweh) o ira na tamata, ka ra biuta na nodra vakabauta vua na TURAGA (Yahweh) vata kei Mosese na Nona italatala.
-Lako Yani 14: 30-31

Era sa qai lagata, o Mosese kei ira na kai Isireli, na sere oqo Vua na TURAGA (Yahweh):
“Au na lagasere vua na TURAGA (Yahweh),
baleta sa cecere dina o Koya.
Na ose kei koya e vodoka e kolotaki ira o Koya,
i loma ni waitui.
Na TURAGA (Yahweh) e noqu kaukaua ka noqu sere;
o koya sa yaco me noqu ivakabula.
O koya na noqu Kalou (El), au na vakarautaka Vua
e dua na Nona itikotiko,
na Kalou (Elohim) nei tamaqu, au na vakacerecerei koya.
Na TURAGA (Yahweh) e dua na qaqa ni ivalu;
O koya, e vakatokai na TURAGA (Yahweh).
Na qiqi ni ivalu nei Fero kei na nona mataivalu
e kolotaki ira o Koya, i loma ni waitui.
O ira na turaganivalu vivinaka nei Fero
era sa luvu yani e na butoni Wasa Damu.
- Lako Yani 15:1-4

“O cei e na kedra maliwa na qaqa,
me tautauvata kei kemuni, TURAGA (Yahweh)?
O cei e tautauvata kei Kemuni –
cecere vakaoti e na savasava,
vakaitamera e na lagilagi,
dau ni cakacaka veivakurabuitaki?
- Lako Yani 15:11

“E na nomuni loloma tawayalani, oni liutaki
ira kina na tamata oni sa vueta.
E na nomuni kaukaua oni sa tuberi ira
i na nomuni tikotiko tabu.
-Lako Yani 15:13

Na TURAGA (Yahweh) e na vakavulewa tiko,
me tawamudu ka tawamudu.
-Lako Yani 15:18.

Wilika Talega Ke Rawa
Same 136; Efeso 5:19-20; Vakatakila 15:2-4

Takosovi Na Wasa Damu.

Oti, sa qai dodoka na ligana o Mosese me dusia na wasawasa, sa qai yaco ni a sea rua na wasawasa e na bogi taucoko oya na TURAGA (Yahweh), e na dua na cagi kaukaua mai na tokalau, qai vukica me qele mamaca. O ira na luvei Isireli era qai sirova ka taubale kosova na wasawasa, e na dela ni qele mamaca, ia na wai a qai la laga tu mai e na yasadra imatau kei na yasadra imawi. Era cemuri ira tikoga na kai Ijipita, ni ra muri i ira i loma ni wasawasa o ira kece na mataivalu nei Fero, na ose, na nona qiqi ni ivalu, kei ira na mataivalu daunivodo ose.
E na iotioti ni matayadra e na bogi, a qai rai sobu mai na duru bukawaqa kei na o na TURAGA (Yahweh) me raici ira na mataivalu ni Ijipita, oti qai vakadredretaka na nodra itosotoso. E a vakavuna me ra lulutu laivi na yava ni nodra qiqi ni ivalu, me vakadredretaka na nodra itosotoso. Era mani kaya na kai Ijipita, “Mai meda dro laivi mai matadra na kai Isireli. Na TURAGA (Yahweh) sa valuti keda tiko na kai Ijipita e na vukudra.”
Sa qai kaya na TURAGA (Yahweh) vei Mosese, “Dodoka na ligamu mo dusia na waitui, me rawa ni suka lesu na wai me lomoci ira na kai Ijipita, na nodra qiqi ni valu, kei ira na mataivalu daunivodo ose.
Sa mani dodoka na ligana o Mosese me dusia na waitui, sa qai tekivu suka lesu na waitui, ia ni qai kida na mataka sa lesu kece tale na wai i na kena itutu makawa. Era a drovaka mai na kai Ijipita, ia a qai kuitaki ira lesu i loma ni wasawasa na TURAGA (Yahweh). E a kui lesu na wai qai lomoci ira na qiqi ni ivalu, kei ira na daunivodo ose – na mataivalu kece nei Fero era a cemuri ira i loma ni wasawasa. E sega ni dua vei ira e vo bula.
-Lako Yani 14: 21-28.


Wilika Talega Ke Rawa
Same 114; 136:13-15; Vakarua 11:1-4; Josua 24:5-7;
Iperiu 11:23-29

Cici Muri I Ira Na Isireli, O Fero.

O ira na kai Ijipita – oya o ira kece na ose kei na qiqi ni ivalu nei Fero, kei ira na daunivodo ose, kei ira na nona mataivalu – era qai cici muri i ira na kai Isireli, ka ra toboki ira ni ra se keba toka ga e matasawa mai Pi-Eiroce, veibasai kei Peali-Sifoni.
Ni sa toro voleka tiko yani o Fero, era qai rai cake na kai Isireli, era sa raici ira na kai Ijipita ni ra sa tayabe tiko yani vei ira. E a curumi ira na domobula, era mani tagi cake vua na TURAGA (Yahweh). Era kaya vei Mosese, “Baleta beka ni sega na ibulubulu mai Ijipita o kauti keimami tu mai kina i ke me keimami mai mate tu e na vanua dravuisiga qo? A cava o sa cakava qo vei keimami, mo kauti keimami laivi tu kina mai Ijipita? Keimami a sega beka ni kaya vei iko mai Ijipita ‘Laivi keimami tu ga, me keimami veiqaravi tikoga vei ira na kai Ijipita’? E a vinaka cake me keimami a veiqaravi tikoga vei ira mai Ijipita, sa qai ca ga qo me keimami mai mate tu e na vanua dravuisiga!”
E sauma vei ira na tamata o Mosese, “Ni kakua mada ni domobula. Ni tudei tu mada, moni raica na veivueti e na kauta mai vei kemuni edaidai na TURAGA (Yahweh). Baleta o ira na kai Ijipita oni sa na raici ira edai, oni na sega ni raici ira tale vakadua me tawamudu.
Na TURAGA (Yahweh) e na vala e na vukumuni; e vinakati ga vei kemuni moni tu vakarorogo.”
Sa qai kaya na TURAGA (Yahweh) vei Mosese, “Na cava o tagici Au tiko mai kina? Tukuna vei ira na Isireli me ra toso tiko ga i liu. Laveta na nomu ititoko, qai dodoka na ligamu vaka i na wasawasa, mo tawasea rua na waitui, me rawa ni ra taubale takosova na wasawasa e na dela ni qele mamaca, o ira na kai Isireli. Ia o Au, au na vakayalokaukauataka na lomadra na kai Ijipita, me ra takoso muri ira talega yani. E na qai noqu na lagilagi mai vei Fero, mai na nona mataivalu, mai na nona qiqi ni ivalu, kei na nona mataivalu daunivodo ose.
O ira na kai Ijipita era sa na qai kila ni o au na TURAGA (Yahweh), Niu sa rawata na qaqa mai vei Fero, na nona qiqi ni ivalu kei ira na nona daunivodo ose.
-Lako Yani 14:9-18.


Wilika Talega Ke Rawa
Same 37:7; 46:10; Aisea 59:1; Roma 9:14-24;
Iperiu 11:1-2

Biuti Ijipita O Ira Na Isireli.

A qai yaco, e na bogilevu tutu, ni a mokuti ira mate na ulumatua ni Ijipita, na TURAGA (Yahweh), mai vua na ulumatua nei Fero, o koya e toka e na idabedabe vakatui, ki vua na nona ulumatua na kaivesu e tiko e loma ni valeniveivesu butobuto, vata ira kece na ulumatua ni manumanu yavaiva (cattle). A yadra cake o Fero e na bogi oya, o koya vata kei ira na nona ivakalesilesi, vata kei ira kecekece na kai Ijipita; ni sa yaco na tagitagi yaso e loma i Ijipita taucoko, baleta e sega ni bau duabulu na vale me sega ni dua e mate kina.
E na bogi tiko ga oya, e a kacivi Mosese kina vata kei Eroni o Fero qai kaya vei rau, “Tu! Biuti ira na noqu tamata, o kemudrau vata kei ira na kai Isireli! Lako, lai sokalou vua na TURAGA (Yahweh) me vaka na nomudrau kerekere. Kauta talega yani na nomuni sipi kei na nomuni bulumakau me vaka nomudrau vosa, ia ni lako ga, qai vosa vakalougatataki au talega.”
Ia o ira na kai Ijipita era a vakusakusataki ira na tamata me ra vakatotolo, me ra biuta na vanua. “Baleta ke sega” era kaya, “keimami na mate kece vakadua.”
Era sa mani soqona vata na kedra ibuli falawa o ira na tamata, ni ra sebera ni wakia vata kei na leveni, era sa mani dreketa ga yani e na loma ni sedre ni natunatu sa ologi vinaka tu e na isulu. O ira talega na Isireli era a cakava na ka a vakarota vei ira o Mosese, e na nodra kerea mai vei ira na kai Ijipita, na iyau siliva, na iyau koula kei na isulu. Na TURAGA (Yahweh) a sa vakamalumutaki ira oti na kai Ijipita me ra na yalovinaka vei ira na tamata, era qai solia kina vei ira na ka kece era kerea; qori era a tokitaka kina na nodra iyau na kai Ijipita.
-Lako Yani 12:29-36

E na siga, e a liutaki ira na TURAGA (Yahweh) e na loma ni dua na duru o, me tuberi ira e na nodra ilakolako; ia e na bogi e na loma ni dua na duru bukawaqa me solia vei ira na rarama, me rawa kina ni toso tikoga na nodra ilakolako e na siga kei na bogi. E a sega vakadua ni kauta laivi o Koya, na duru o e na siga se na duru bukawaqa e na bogi, mai na matadra na tamata, e na mua e liu ni ilakolako.
-Lako Yani 13:21-22.

Wilika Talega Ke Rawa.
Vakarua 16:1-8; Same 78:41-52; a05: 26-38;
II Cesalonaika 1:5-10.

O Karisito, Na Noda Lami ni Lakosivia.

E sega ni vinaka na nomuni dokadoka. Oni sega beka ni kila, ni taura e dua ga na tikini leveni lailai, me vakalevenitaka vakadua e dua na ibuli falawa levu?
Vakasavasavataka laivi na leveni makawa, me rawa ni oni vuki moni dua na ibuli vou, e sega na kena leveni, baleta oni sega dina ga ni vakaleveni. Baleta o Karisito (Messiah), na noda lami ni lakosivia, sa mate oti vakaimadrali. Sa dodonu kina meda marautaka vata na solevu, sega e na leveni makawa; na leveni ni yaloca kei na ivalavala vakasisila, ia e na madrai e sega ni vakaleveni ni yalosavasava kei na dina.
-I Korinica 5:6-8

Me vaka oni sa kaciva tiko na Tamada (Father), o koya e dau vakatulewa vakadodonu e na cakacaka ni tamata yadudua, vakaraitaka e na nomuni bula tiko vakawawa eke, ni oni rerevaki Koya.
Baleta oni sa kila vinaka tiko ni oni a sega ni vueti, e na iyau rusarusa rawarawa me vaka na siliva kei na koula, mai na bula lala era a solia sobu mai vei kemuni o ira na tukamuni, ia, e na dra talei ga nei Karisito (Messiah), me vaka e dua na lami e sega na nona dukadukali se itovo ca. O koya e se digitaki sara ni se bera ni tauyavu na vuravura, ia sa qai mai vakaraitaki e na ivakataotioti ni gauna, e na vukumuni. E na vukuna, oni vakabauta rawa kina na Kalou (Yahweh), o Koya e a vakaturi Koya mai na mate, qai vakalagilagitaki Koya, o koya oya, e vagolei tiko kina na nomuni vakabauta kei na nomuni inuinui Vua na Kalou (Yahweh).
Ia oqo ni oni sa vakasavasavataki kemuni vakataki kemuni oti e na nomuni sa dau talairawarawa tiko i na dina, me rawa ni kune vei kemuni ni oni dau lomani ira na nomuni mataveitacini, ni veilomalomani sara vakatitobu mai vuniyalomuni.
-I Pita 1:17:22.


Wilika Talega Ke Rawa
Lako Yani 12-13; Joni 1:19-36; Iperiu 2:11-18; Vakatakila 13: 8

Na Bibi Ni Veivakaturi Mai Na Mate.

Ia, kevaka sa vunautaki ni a vakaturi mai na mate na Karisito (Messiah), e rawa vakacava me so vei kemuni e kaya ni ra na sega ni vakaturi na mate? Ia ke sega ni vakaturi na mate, e kena ibalebale beka oya ni sebera ni vakaturi mai na mate na Karisito (Messiah). Ia ke sebera ni vakaturi mai na mate na Karisito (Messiah), e sa na maumau wale na neitou ivunau, ka maumau talega vakakina na nomuni vakabauta.
Kena ikuri, ni keitou sa na wili kina ni keitou ivakadinadina lasulasu ni Kalou (Elohim), baleta keitou sa tusanaka tiko ni a vakaturi Karisito (Messiah) mai na mate na Kalou (Elohim), oya baleta ni a sega ga ni vakaturi koya – ke dina ni sega ni rawa ni vakaturi i na bula, na mate.
Baleta ke sega ni vakaturi rawa me ra bula tale na mate, sa na dina talega ni a sega ni vakaturi mai na mate na Karisito (Messiah).
Ia kevaka a sega ni vakaturi mai na mate na Karisito (Messiah), sa na maumau wale na nomuni vakabauta, baleta oni se bula tikoga e na nomuni i valavala ca.
Qai kena ikuri oqori, ni o ira era sa moce lutu oti e na vuku i Karisito (Messiah), era sa yali vakadua. Ia ke yaga ga e vuravura oqo na noda vakanuinui vei Karisito, eda sa na wili meda dua na iwiliwili ni tamata vakaloloma, e na kedra maliwa na tamata.
Ia o Karisito (Messiah) sa vakaturi oti mai na mate, ka sa yaco me kedra isevu o ira era sa moce lutu oti. Me vaka ni a vu mai vua e dua na tamata na mate, e na vu talega mai vua e dua tale na tamata na veivakaturi mai na mate.
E na vuku i Atama na ka kece e na mate, ia e na vuku i Karisito (Messiah), na ka kece era na vakabulai
-I Korinica 15: 12-22.



Wilika Talega Ke Rawa
Jope 19: 23-27; I Korinica 15: 23-58;
Roma 6:1-11; Cakacaka 2: 22-36

Bula Tale O Jisu

Ni sa sivi na Siga ni Vakacecegu, me sa kida mai na imatai ni siga ni macawa, rau a sou o Meri (Miriam) Makitalina vata kei Meri (Miriam) kadua, me rau lai siko ibulubulu.
Ia raica, ni a yaco e dua na uneune waromisa, baleta e dua na agilosi ni Turaga (Yahweh), a siro mai lomalagi, lako i na ibulubulu, vaqiqica laivi na vatu, oti qai dabeca toka. Na kena irairai o koya, e ramase, me vaka na rarama ni lidi na yaseyase, qai sekavula na nona isulu me vaka na roka ni uca cevata. O ira na matayadra era a domobulataki koya dina, era sa lai sautanini ga kina, me yacova ni ra sa dui cibati ira, me vaka era sa mate.
E kaya na agilosi vei rau na yalewa, “Kua ni rere, baleta au kila ni drau vaqarai Jisu (Yahshua) tiko mai, o koya e a rube e na kauveilatai. Sa sega ni tiko eke o koya; e sa bula tale, me vaka e a kaya o Koya. Lako mai, drau mai raica na vanua a davo tu kina o Koya. Oti drau qai lako yani vakusakusa, drau lai tukuna vei ira na Nona tisaipeli, ‘E sa vakaturi mai na mate o Koya, ka sa liu sara i Kaleli. E keya oni na raici koya.’ Qori, au sa tukuna vei kemudrau.”
Rau sa mani biubiu vakatotolo mai na ibulubulu, e na rere vata kei na reki vakaitamera, rau qai tabaka na cici me rau kauta na itukutuku vei ira na tisaipeli
Ia ni rau sa lako tiko me rau lai tukutuku vei ira na tisaipeli raica ni a sotavi rau vakasauri o Jisu (Yahshua) qai kaya. “Drau Bula”. Rau lako sara yani Vua, rau qai tara na yavana, ka vakarokoroko Vua.
Sa qai kaya vei rau o Jisu (Yahshua), “Drau kakua ni rere. Drau lako, drau lai tukuna vei ira na mataveitacini, me ra lako i Kaleli. E keya era na qai raici au”
- Maciu 28:1-10.


Wilika TalegaKe Rawa
Same 16:8-11; Marika 16:1-8; Luke 24:1-10;
Joni 20: 1-18, I Korinica 15.

Rube E Na Kauveilatai O Jisu

Era qai kauti Jisu (Yahshua) i na vanua e vakatokai o Kolikoca, (na kena ibalebale “Na vanua ni Qavokavoka). E keya era qai via vagunuva vua na waini sa waki tu kei na mura, ia a sega ni gunuva o Koya. Ia ni ra sa rubeci Koya e na kauveilatai, era qai wasea na nona isulu; era a vakawirimadigitaka, me kilai na nodra dui iwasewase.
Era a qai vakoti koya tiko e na ikatolu ni aua (rauta na ciwa e na mataka). Na ka a beitaki kina, e a toqai toka e na dua na papa: “NA NODRA TUI NA JIU.” Rau rube talega vata kei koya e rua na daubutako, me dua e na yasana imatau ka dua e na yasana imawi. Sa qai yaco na vosa ni iVola Tabu e kaya, “E a wili o Koya vata kei ira era dau vakadrecike.” O ira era lako siviti Koya, era vakalialiai Koya, ni ra kurekure tu, era qai kaya, “Sa dina! O iko o na basuraka na Valenisoro, mo qai tara tale e na tolu na siga. Vakacava mo vueti iko vakataki iko mo siro mai na kauveilatai oqori?”
O ira talega na bete levu vata kei ira na ivakavuvuli ni lawa, era a bau veiwalitaki Koya e na nodra veivosaki vakataki ira, “Sa vakabulai ira sara na tani,” era kaya, “ia e sega mada ga ni vakabulai Koya vakataki Koya rawa. Biu sara mada na Karisito (Messiah), na nodra Tui na Isireli, me kevu sobu mai na duru kau (stake), meda raica, meda qai vakabauta.” O ira talega era rube tu vata kei koya, era bau vakalialiai koya talega.
-Marika 15:22-32.

E a kaila e na domo levu o Jisu (Yahshua), sa qai cagutu na nona icegu. Na ilati ni Valenisoro e a qai kasei rua, mai cake vakadua i ra. Ia, na turaganivalu-ni-yadrau e a duri basai Jisu tu, ni rogoca na domona ka raica ni sa cagutu na nona icegu, a qai kaya, “Sa dina ga, na tamata qo e Luve ni Kalou (Yahweh)!”
- Marika 15:37-39.


Wilika Talega Ke Rawa
Same 22; Aisea 53; Maciu 27:33-56;
Luke 23:26-48; Joni 3:13-16; 19:16-37

Totogi mate o Jisu

O ira na bete levu kei ira na lewe ni matabose na Senihedirini, era a vaqara tiko e dua na ivakadinadina-lasu me beitaki Jisu (Yahshua), me rawa kina ni ra tauca vua na itotogi mate. Ia era sega ni kunea e dua, e dina ga ni levu sara na ivakadinadina-lasu era lako mai.
Sa dede toka, rau sa qai lako mai e rua, rau qai kaya, “Na tamata qo e kaya, ‘E rawa vei au meu vakarusa na Vale ni Soro ni Kalou (Elohim), Au qai tara tale e na tolu na siga.’”
Sa tucake sara na betelevu-liu qai kaya Vua, “E vakacava, o na sega beka ni sauma oya? Na cava sara mada na ibalebale ni ka rau beitaki iko tiko kina o rau qo?” Ia o Jisu (Yahshua) e galu tu ga.
E kaya tale na bete levu-liu, “Au vakaroti iko e na yaca ni Kalou (Elohim) bula: tukuna mai vei keimami se o iko dina na Karisito (Messiah), na Luve ni Kalou (Elohim) tagane?”
“Io, me vaka ga o kaya mai,” e sauma o Jisu (Yahshua), “Ia au kaya talega vei kemuni kece, mai muri oni na qai raica na Luve ni tamata ni dabe toka e na ligana imatau o Koya sa cecere sara, vata kei na nona lako mai e na dela ni o kei lomalagi!”
E keri a qai basuraka kina na nona i sulu na bete levu-liu qai kaya, “Sa vosa veivakacacani o koya qo! Na cava me vinakati kina eso tale na ivakadinadina? Oni sa rogoca na nona vosa ni veivakacacani! Na cava oni nanuma?”
“E dodonu me vakamatei!” era sauma mai.
Era qai kasivita na Matana, ka vaculaki Koya. Na kena vo era sabalaki Koya e na qeteqete ni ligadra, era qai kaya Vua, “Parofisai mai vei keimami Karisito (Messiah). O cei beka a mokuti Kemuni?”
- Maciu 26: 59-68.


Wilika Talega Ke Rawa
Vunau ni Soro 24:13-16; Taniela 7:13-14; Marika 14:55-65; Luke 23: 63-71

Soli Laivi O Jisu E Na Dua Na iRegu

Ni oti na nona masumasu, sa biubiu sara mai o Jisu (Yahshua) vata kei iratou na tisaipeli me ratou takosova na Buca o Kitironi. E tai kadua e tiko kina e dua na iteitei, eratou a qai lako kina, o Koya kei iratou na tisaipeli.
Ia o Jiutasa, o koya a qai soli i Koya laivi, e kila na vanua oya, baleta sa vakawasoma na nona dau lai sotavi ratou e keya o Jisu (Yashua). Sa mani lako i na loga ni veiolive oya o Jiutasa, ka kauti ira tiko yani na sotia kei ira na vakailesilesi mai vei ira na Bete kei ira na Farisi. Era a kauta tu yani na icina tabucagi, na icina barawa kei na iyaragi.
O Jisu (Yashua) baleta ni kila na ka sa na vakarau yaco Vua, e a tavaki ira mai qai taro, “O cei beka oni vaqara?”“O Jisu (Yahshua) na Kai Nasareci,” era sauma“O au qo o Koya!” e kaya o Jisu (Yahshua). (O Jiutasa talega, o koya e a mai soli i Koya laivi, a duri tu mai vata kei ira.) E na gauna e kaya kina o Jisu (Yashua) “O au qo o Koya”, era a qai vakasukasuka kece i muri, era mani lutu i dela ni qele.
E baci tarogi ira tale o koya, “O cei oni vaqara?”Era sauma, “O Jisu (Yahshua) na kai Nasareci!”“Au sa kaya oti vei kemuni, O au ga qo o Koya,” e kaya o Jisu (Yahshua).“Kevaka oni vaqarai au tiko, ia laivi ira na tamata qo me ra dui lako!” Qo a yaco me dina kina na vosa a tauca, “Au a sega ni vakayalia e duabulu vei ira oni a solia mai vei au.”
-Joni 18:1-9

O koya e mai soli i Jisu (Yahshua) tiko a sa tukuna rawa vei ira, na ivakatakilakila e na vakayagataka; “O koya ga Au na reguca, o Koya oya moni vesuki Koya ka kauta laivi.
-Marika 14:44

Ia ni yaco ga yani sa lako vakadodonu sara vei Jisu (Yahshua) qai kaya Vua, “Ni bula, Rapai“; oti qai reguci Koya.
-Maciu 26:49

Ia qai kaya vua o Jisu (Yahshua), “Jiutasa, o mai solia na Luve ni Tamata e na dua na iregu?”
-Luke 22: 48


Wilika Talega Ke Rawa
Vakatekivu 37; Maciu 26:46-56; Marika 14:43-50; Luke 22:47-54;
Joni 6:35-40; 17:1-12

Na i Otioti Ni Kanavata Ni Lakosivia Nei Jisu

Sa qai yaco mai na siga ni madrai sega ni vakaleveni, na siga e dodonu me vakamatei kina na lami ni lakosivia. Sa talai rau sara o Pita kei Joni o Koya ni kaya, “Lako, lai vakarautaka na kedatou lakosivia me tou na kania vata.”
-Luke 22:7-8

Ni sa yaco mai na kena gauna, eratou sa dabe sobu e na teveli, o Koya vata kei ratou na Apositolo le tinikarua. Sa kaya sara vei iratou o Koya, “E ka vakaitamera na Noqu a gadreva tiko, Meu na kania vata kei kemudou na lakosivia oqo, niu sebera ni sotava na rarawa. Baleta meu kaya vei kemudou, Au na sega ni kania tale vakadua, me yacova ni sa yaco na vatukana e na matanitu ni Kalou (Elohim).”
A qai taura cake na bilo, cavuta na kena vakavinavinaka qai kaya, “Taura qo, vota yani e na kemudou maliwa. Baleta au kaya vei kemudou, niu na sega ni gunu tale mai na vuani vaini, me yacova ni sa yaco mai na matanitu ni Kalou (Elohim).”
Oti sa qai taura na madrai, cavuta na kena vakavinavinaka, dovidovia, solia vei iratou qai kaya, “Oqo na Yagoqu e sa soli tiko e na vukumudou: oqo mo dou dau vakayacora me kequ ivakananumi.”
E na sala vata oqori, ni oti na ivakayakavi, e a taura cake na bilo, qai kaya, “Na bilo qo, na Veiyalayalati Vou ni Noqu dra, sa na vakadavei tiko e na vukumuni. Ia raica na ligana o koya e na soli i Au laivi, e tiko qo vata kei Au e dela ni teveli. Na Luve ni tamata e na lako dina ga me vaka sa nakiti oti tu; ia e na nona na leqa levu o koya e soli i Koya laivi.”
- Luke 22:14-22.


Wilika Talega Ke Rawa
Jeremaia 31:31-36; Maciu 26:17-30; Marika 14:12-26; Vakatakila 19:4-9

E Luvei Cei Beka Na Mesaia?

Ia ni ra se soqo vata tiko na Farisi, a qai tarogi ira o Jisu (Yahshua), “Na cava beka oni nanuma me baleta na Karisito (Messiah)? E luvei cei beka o koya?”
“E luvei Tevita tagane!” era sauma Vua.
E kaya sara vei ira o koya, “Ia qai rawa vakacava vei Tevita, ni vosa tiko e na Yalo me kacivi koya, ‘TURAGA’ (Soveregn)? Baleta e a kaya,
‘“E kaya na TURAGA (Yahweh) vua na noqu Turaga (Sovereign); “Dabe toka e yasaqu imatau, me yacova niu sa vukici ira na kemu meca me ra itavatava ni yavamu’”.
Ke sa kacivi koya o Tevita, “Turaga” (Sovereign) e na qai rawa vakacava ni luvena? E a sega tale ni dua e kaya rawa e dua na ka me sauma kina na taro oya, ka tekivu mai na siga oya sa sega tale ni dua e doudou me taroga vua e dua tale na taro.
-Maciu 22:41-46

Ni oti e ono na siga, sa kauti ratou sara o Pita, o Jemesa (Yacob) kei Joni o Jisu (Yahshua), a qai kauti ratou i na dua na ulunivanua cere, me ratou lai tu kina vakataki ratou. E keya a qai vakamataliataka na kena irairai, e matadratou.
Oti a qai basika e dua na o, vakarurugi ratou, qai rogo e dua na domo mai na o, ni kaya, “O koya oqo na Luvequ tagane, au dau lomana. Rogoci Koya!”
-Marika 9:2,7

Keitou a sega ni vakamuria tiko mai e dua na itukutuku buli vakalawaki, ni keitou vunautaka tiko vei kemuni na Nona kaukaua kei na Nona lako mai na noda Turaga (Master) o Jisu Karisito (Yahshua the Messiah), baleta keitou sa vakadinadinataka oti na nona itutu vakatui. Baleta a taura o Koya na itutu cecere kei na lagilagi maivua na Kalou (Elaha) na Tamada, ni rogo vua na domo Cecere ka Lagilagi Vakatui ni kacivaka, “Oqo na Luvequ tagane, o Koya au daulomana; o Koya, Au sa marautaka sara vakalevu.”
-II Pita 1:16-17


Wilika Talega Ke Rawa
Same 110; Maciu: 45-54; Marika 1:9-11; Luke 9:28-36;
Cakacaka 2.

Vakasavasavataka na Valenisoro o Jisu

Ni sa toso volekati Jerusalemi yani o Jisu (Yahshua), me sa raica na korolevu, sa qai tuburi Koya na yaloluluvu, qai tagi lagalaga ni kaya “Isa, kevaka walega mo a kila o iko, o iko sara ga e na nomu gauna nikua, na sala e na kauta mai na bula vakacegu -- ia e na gauna oqo, era se vunitaki tu mai matamu. E na yaco mai vei iko na siga, era na viribaiti iko kina o ira na kemu meca, me ra toso vakavolivoliti iko, me ra sogolati iko mai na veiyasana kece ga. Era na vaqeavutaki iko, o iko vata kei ira na lalai era tiko e na loma ni nomu bai. Era na sega ni vakavotaka me taqa toka e dua na vatu e na dela ni dua tale, baleta walega ni o a sega ni kilakasamataka na gauna o a mai sikovi kina.”
-Luke 19:41-44

A qai curu o Jisu (Yahshua) e na loma ni vale ni Kalou (Yahweh), qai lai cemuri ira na volivolitaki kei ira era volivoli tiko e loma ni Valenisoro, ka vukica vakatobuicu na nodra teveli na dauveisau ilavo, kei na nodra idabedabe o ira era volitaki ruve. “E volai tu,” e kaya vei ira o koya, “‘Na noqu vale e na vakatokai me vale ni masumasu,’ ia oni sa vukica me ‘nodra qara na daubutako.’”
Era qai kau mai vua e loma ni Valenisoro o ira na mataboko kei ira na lokiloki, qai vakabulai ira o koya. Ia ni ra sa raica o ira na bete levu kei ira na daunilawa, na veika talei sa cakava tiko, ka rogoca ni ra kailavaka tiko na gone lalai, “Osana vua na luvei Tevita tagane,” e a qai curumi ira na yalokatakata levu.
“O rogoca tiko beka na ka era kaya tiko o ira na gone lalai oqo?” era taroga Vua,
“Io” e sauma o Jisu (Yahshua), “oni sebera beka ni wilika,
“’Mai na tebe ni gusudra na gone lalai kei ira na gone dramidrami
e na rogo mai kina na vosa ni veivakacaucautaki e vinaka vakaoti’?”
- Maciu 21:12-16





Wilika Talega Ke Rawa
Same 8; Aisea 56; Jeremaia 7:9-11; Marika 11:15-18;
Joni 2:13-17

Curu Vakatui I Jerusalemi O Jisu.

Ni ratou sa toso volekati Jerusalemi yani, e ratou sa yaco sara i Pecivaiqi, e na Dela ni Veiolive, sa tala sara e rua vei iratou na tisaipeli o Jisu (Yahshua) ni kaya vei rau, “Drau lako i na koro e toka oqori mai liu, drau na raica ni vesu tu mai kina, e dua na asa, rau na vesu vata tu kei na luvena. Sereki rau, qai tuiyi rau mai vei au. Ke dua e tarogi kemudrau kina, drau qai kaya ga ni via vakayagataki rau na Turaga (Sovereign), e na qai solia mai vakarawarawa vei kemudrau.
A yaco na ka oqo, me dina kina na veika a vakasavui mai vua na parofita ni kaya; “Kaya vei ira na luvei Saioni yalewa, ‘Raica, na nomuni tui sa lako yani vei kemuni, e yalomalumu, ka vodoka tiko e dua na asa, e dua na asa gone, na luve ni asa.’”
Rau sa lako sara na tisaipeli, rau lai cakava na ka kece a vakarota vei rau o Jisu (Yahshua). Rau tuiya sara mai na asa vata kei na luvena, rau qai tevuka na nodrau kote e na dakudrau na manumanu, sa qai vodo kina o Jisu (Yahshua). E dua na ibinibini tamata vakaitamera era a tevuka na nodra dui kote e na salatu, ka so era ta tabataba ni kaudraudrau mai veikau, me ra mai conia kina na dela ni gaunisala e muria tiko na ilakolako.
O ira era toso tiko kei Koya, o ira era liu tiko Vua kei ira era muri tiko, era kailavaka kece tiko,
“Osana Vua na Luvei Tevita tagane!”
E kalougata o Koya e lako mai e na yaca ni TURAGA (Yahweh)!”
Osana Vua sa cecere sara!”
Ia ni sa curu i Jerusalemi o Koya, era qai vakayavalati na lewe ni korolevu, ka vakataroga, “O cei na tamata qo?” Era sauma yani na le vuqa, “Oqo o Jisu (Yahshua), na parofita ni Nasareci mai Kaleli.”
- Maciu 21:1-11



Wilika Talega Ke Rawa
Same 118; Sakaraia 9:9; Marika 11:1-11;
Luke 19:28-40; Joni 12:12-16.

Kaya O Jisu Ni Na Vakaturi Mai Na Mate.

E a kacivi ratou vata yani vua o Jisu (Yahshua), qai vakamacala ni kaya, “Dou sa kila vinaka ni o ira era digitaki me ra vakavulewa vei ira na kai veimatanitu tani, era dau wili me ra nodra turaga, ia o ira na nodra ivakalesilesi lelevu, era dau vakacolasau vei ira. Qori me kua ni yaco vei kemudou. O koya e via cecere duadua vei kemudou, me taura na itutu vakadauniveiqaravi kei koya e via liu duadua, e dodonu me bobula ni le vuqa. O koya mada ga na Luve ni Tamata, a sega ni lako mai me mai qaravi, ia me mai veiqaravi ga, ka solia na Nona bula, me kedra ivoli na le vuqa.
-Marika 10:42-45

A qai yaco e na dua na gauna, ni a masu duadua tiko o koya, ni ratou a tiko kei koya o ratou na nona tisaipeli, a mani tarogi ratou o koya, “E na nodra rai na le vuqa, o cei beka o Au?”
Eratou sauma, “O Joni na Dauveipapitaisotaki; ia eso era kaya o Ilaija, ia eso tale era kaya ni o kemuni e dua na parofita mai na gauna makawa sa bula tale.”
“Ia vakacava o kemudou?” e taro tale o koya, “O cei beka o Au?”
Sauma o Pita, “Na Karisito (Messiah) ni Kalou (Elohim).”
Sa qai vakaroti ratou vakabibi o Koya, me ratou kakua ni tukuna vua e dua na ka oqo. Oti qai kaya, “Na Luve ni Tamata e vinakati me sotava e levu sara na ka rarawa, qai cakitaki mai vei ira na qase ni lotu, na betelevu, kei ira na ivakavuvuli ni lawa, oti e na qai vinakati me vakamatei, ia me na qai vakaturi mai na mate e na ikatolu ni siga.”
-Luke 9:18-22



Wilika Talega Ke Rawa
Same 16; Maciu 38:41; Marika 10:32-34;
Luke 24:13-32; Cakacaka 2:14-40.

Jisu Na Lami ni Kalou.

E na siga ka tarava, e a raici Jisu (Yahshua) o Joni ni lako tiko mai vua, qai kaya “Raica, na Lami ni Kalou (Elohim), o koya e kauta laivi na ivalavala ca mai vuravura! O Koya oqo, au a vakasamataka tiko niu kaya, “E dua na tamata e na muri i au mai, e na cecere cake vei au, baleta o Koya e liu ga vei au.’ O au vakataki au, au a sega ni kilai koya, ia me rawa ni mai vakatakilai o Koya vei Isireli, qori na vuna au mai veipapitaisotaki tiko kina e na wai.”
Oti sa qai solia na nona ivakadinadina o Joni, “Au a raica na Yalo ni sobu mai lomalagi me vaka e dua na ruve, qai mai ro Vua. Au a sega ni kilai Koya taumada; ia o koya e a talai au mai meu mai veipapitaisotaki e na wai, e a kaya mai vei au, ‘Na tamata o raica ni sobuti koya, qai lai ro toka vua na Yalo, qori o koya e na mai vei papitaisotaki e na Yalo Tabu.’
Au sa raica, kau sa vakadinadinataka ni o koya oqo, na Luve ni Kalou (Elohim).
-Joni 1:29-34

Oti, au qai rai yani, au qai rogoca na domodra e dua na ibinibini agilosi vakaitamera, ni ra duri vakavolivolita tu na idabedabe vakatui, na ibulibuli bula vata kei ira na kena turaga. Ia na kedra iwiliwili e udolu vaka udolu ka tininaudolu vaka tininaudolu. E na domolevu, era lagata tiko,
“Sa kilikili ga vua na Lami, a vakamatei,
me ciqoma na kaukaua, na iyau, na vuku, kei na qaqa,
kei na vakarokoroko, kei na lagilagi kei na veivakacaucautaki!”
-Vakatakila 5:11-12




Wilika Talega Ke Rawa
Vakatekivu 22:1-19; Iperiu 9:11-28;
I Pita 1:18-20; Vakatekivu 5-7; 2: 9 - 22:4

Parofisaitaki na Dauniveiqaravi Daurarawa

Raica, na noqu dauniveiqaravi, e na cakacaka vakavuku,
e na vakacerecerei, e na laveti cake ka vakalevulevui vakalevu sara.
-Aisea 52:13

E a sevaki ka besetaki vei ira na tamata,
e a tamata dau lomabibi, ka sa matau tu vua na bula rarawa.
E vaka e dua, era dau sega ni via raica na matana na tamata;
e dau sesevaki, ka sega ni dau dokai o koya.
E dina ni a colata o koya na noda malumalumu
ka colata na noda rarawa,
ia a noda vakasama ga ni a mokuti koya na Kalou (Elohim),
mokulaki koya qai vakamavoataki koya.
Ia e a laucoka o koya e na vukuni noda ivalavala ca,
e a bikai o koya e na vukuni noda daucakaca;
na itotogi e kauta mai na sautu, a tau vua;
na nona mavoa eda vakabulai kina.
O keda kece, me vaka na sipi, eda sa lako sese,
eda sa muria tu ga na noda dui mua;
ia na TURAGA (Yahweh) sa qai vakataqara vua,
na noda ivalavala ca kecekece sara.
E a vakasaurarataki ka vakararawataki o koya,
ia a sega ni bau dolava na gusuna;
e a tuiraki me vaka na lami e kau tiko me lai vakamatei
ia me vaka ni dau galu tu ga na sipi e matana na dauniveitasi,
o koya tale ga e a sega ni bau dolava na gusuna.
- Aisea 53:3-7

Ia e a inaki ga ni TURAGA (Yahweh) me bikai o koya,
ka me vakararawataki,
e dina ga ni a lesia na nona bula na TURAGA (Yahweh)
me isoro ni cala,
ia e na raica o koya na nona kawa ka vakadedetaka na nona veisiga,
na inaki ni TURAGA (Yahweh) e vuavuai vinaka e ligana.
-Aisea 53:10



Wilika Talega Ke Rawa
Same 22; Marika 10:45; Cakacaka 8: 26-39;
I Pita 2:21-25

Na iMatai Ni Kanavata Ni Lakosivia

Sa qai kacivi ira vata na matua ni Isireli o Mosese, qai kaya vei ira, “Ni oti ga qo, moni dui lako sara moni lai digitaka e dua na lami me veirauti kei ira na lewe ni nomuni dui matavuvale, ka moni vakamatea sara na lami ni lakosivia (passover). Taura e dua na tabani isopi, tonia e na dra sa tu e loma ni beseni, qai boroya kina na ulu kei na duru ruarua ni katuba; ia me kakua tale ni dua vei kemuni e curu i tuba mai na katuba oya me yacova na mataka lalai. Ni sa lako mai na TURAGA (Yahweh) me mai mokuti ira mate na kai Ijipita, e na qai raica o Koya na dra e na ulu kei na duru ruarua ni katuba, e na qai lako sivia na katuba na TURAGA (Yahweh), ka sega ni vakatara na dau ni veivakarusai me curuma na nomuni vale, me lai mokuti kemuni mate.
“Mo ni vakamuria vinaka na ivakasala oqo, ka me dua na ivakaro tawamudu vei iko kei ira na nomuni kawa. E na qai yaco ni oni sa curu i na vanua e na solia vei kemuni na TURAGA (Yahweh) me vaka sa yalataka oti tu, moni na dau vakayacora tiko na qaravi ni solevu oqo.
Ia ni sa yaco me ra tarogi kemuni o ira na luvemuni, ‘Na cava beka na ibalebale ni solevu oqo vei kemuni?’ moni qai tukuna vei ira, ‘Oqo na isoro ni Nona lakosivia na TURAGA (Yahweh), o Koya e a lako sivia na nodra veivale na Isireli mai Ijipita, e na gauna e mokuti ira mate kina na kai Ijipita ia qai taqomaka na noda veivale’” Era sa qai cuvara sobu na uludra o ira na tamata me ra sokalou. Era sa qai lako yani na luve i Isireli mera cakava na ka kece a vakarota na TURAGA (Yahweh) vei Mosese kei Eroni, oqori era a vakayacora.
- Lako Yani 12: 21-28


Wilika Talega Ke Rawa
Lekutu (1-14; Vakarua 16:1-8; II Veigauna 30;
I Korinica 5: 6-8