Mate Na Ulumatua mai Ijipita.

Ia na TURAGA (Yahweh) a qai tukuna vei Mosese, “Au na kauta vei Fero kei Ijipita e dua tale na leqa levu. Ni oti oya, sa na qai sereki kemuni moni lako, ia ni sa cakava oqori o koya, e na cemuri kemuni kecekece sara ga vakadua. Tukuna vei ira na tamata, me ra kere iyau siliva kei na koula vei ira na dui wekana vakaitikotiko.
Na TURAGA (Yahweh) a qai vakayalovinakataki ira na kai Ijipita, me ra lomani ira na tamata. O Mosese mada ga vakataki koya, a sa rokovi sara tu ga e Ijipita raraba mai vei ira na vakailesilesi nei Fero, vata kei ira na lewenivanua.
Sa kaya sara o Mosese, “Qo na ka e kaya na TURAGA (Yahweh), ’Ni rauta na bogilevu tutu, Au sa na curumi Ijipita. O ira kece na ulumatua tagane e na vanua o Ijipita era sa na mate, me tekivu mai vua na ulumatua tagane nei Fero, o koya e toka e na nona idabedabe vakatui, me yaco sara vua na luvena ulumatua tagane na yalewa vada, o koya e toka e na nona iqaqi ni sila, ka vaka kina vei ira na manumanu yavaiva.’
E na yaco na tagi yaso vakaitamera e na loma i Ijipita taucoko; e se sega ni bau yaco vakadua e dua me tautauvata kaya, ka na sega talega ni yaco tale mai muri. E na sega mada ga ni saqata e dua vei ira luve i Isireli, e dua na koli, oya me yavalata na yamena vua e duabulu na tamata se manumanu yavaiva; Oya o na qai kila kina na Nona vakaduiduitaki ira na kai Isireli mai vei ira na kai Ijipita na TURAGA (Yahweh). O ira kece sara ga na nomu vakailesilesi era na lako mai vei au mera mai cuva vei au, era qai kaya, “Ni lako, o iko vata kei ira na tamata era dau vakamuri i iko. Ni oti oqori au sa na qai lako.“ Oti sa qai biuti Fero tu yani o Mosese, e na yalokatakata levu.
E kaya na TURAGA (Yahweh) vei Mosese, “E na sega ni via rogoci iko o Fero – me rawa ni vakarabailevutaka na Noqu cakacaka mana e Ijipita raraba.“ Rau a cakava na cakacaka mana kece oqo e na mata i Fero, o Mosese vata kei Eroni, ia na TURAGA (Yahweh) a vakaukauataka tiko ga na loma i Fero, a qai sega kina ni solia vei ira na kai Isireli me ra biuta na nona vanua.
-Lako Yani 11: 1-10.


Wilika Talega Ke Rawa
Lako Yani 4:22-23, Roma 9:14-21, Iperiu 11:28, Same 105:23-38,
Same 135:8-9, Same 136:10-12

Sotava na Leqa Lelevu O Ira Mai Ijipita.

Vakatudaliga mai kemuni na noqu tamata, i na noqu lawa,
vakatudaliga mai i na vosa ni gusuqu,
Au na dolava na gusuqu e na vosa vakatautauvata,
Au na vakamacalataka na veika vuni, na veika mai na gauna makawa,
na veika eda sa rogoca oti ka kila,
na veika era sa tukuna oti vei keda o ira na tamada.
Keitou na sega ni vunitaka mai vei ira na nodra lalai,
Keitou na vakaraitaka vei ira na itabatamata tarava,
Na kena dodonu me vakacaucautaki na cakacaka ni TURAGA (Yahweh),
na Nona kaukaua, kei na veika veivakurabuitaki
sa cakava oti o Koya.
-Same 78:1-4

Na siga a vakaraitaka kina na Nona ivakatakilakila mai Ijipita,
na Nona cakacaka a veivakurabuitaki e na yasayasa vakaSoani
Ni a vukica o Koya me dra na nodra uciwai,
kei na nodra soniwai, me ra kakua ni gunu rawa mai kina,
E a tala yani vei ira o Koya na veimataqali lago e vuqa me tilomi ira,
kei na boto me vakararawataki ira.
E a solia o Koya na nodra iteitei vei ira na katapila.
kei na nodra vuata vei ira na vodre.
E a vakacacana o Koya na nodra vaini e na uca cevata qereqere,
kei na nodra vunilolo e na wai cevata,
E a solia laivi o Koya na nodra bulumakau i na uca cevata qereqere,
kei na qeleni nodra manumanu me lidiki ira na yaseyase katakata.
Oti sa qai tala yani e na kedra maliwa na cecekia ni Nona leva rerevaki,
na Nona cudru, na Nona yalokatakata kei na Nona rarawa -
e dua na ilala agilosi dau ni veivakarusai,
Era a carata me dua na sala ni Nona cudru bibi;
e a sega tale ni tarova na nodra vakamatei, o Koya,
ia e a solia laivi na nodra bula i na matedewa vakadomobula,
Era sa qai moku mate o ira kece na ulumatua mai Ijipita,
Na yavu ni nodra kaukaua e loma ni valelaca nei Ame.
-Same 78:43-51


Wilika TalegaKe Rawa
Lako Yani 4:22-23, Same 105: 23-38, 135:8-9, 136:10-12,
Roma 9:14-21, Iperiu 11:28

Vakaukauataka Na Yalo i Fero Na Kalou.

Sa qai vosa na TURAGA (Yahweh) vei Mosese, “Raica, Au sa qisi i iko mo tautauvata kei na Kalou (Elohim) vei Fero, ia o Eroni na tuakamu sa na nomu parofita.
Mo na tukuna kece na veika Au sa vakarota vei iko, ia na tuakamu o Eroni me na qai tukuna vei Fero, me sereki ira na luvei Isireli me ra biuta na nona vanua. Ia Au na vakaukauataka na loma i Fero, kau na vakalevutaka na noqu ivakatakilakila kei na noqu cakacaka mana e lomai Ijipita.
Ia o Fero e na sega ni vakarorogo vei kemudrau. Au na qai tabaka na ligaqu e Ijipita, kau na kauti ira tani mai na noqu matasotia kei ira na noqu tamata o ira na luvei Isireli, mai na vanua vaka Ijipita e na cakacaka levu ni veilewai. O ira na kai Ijipita era sa na qai kila ni o Au na TURAGA (Yahweh), niu sa dodoka oti yani na ligaqu i Ijipita, meu kauti ira tani mai na luvei Isireli mai na kedra maliwa.
-Lako Yani 7:1-5

Sa qai vosa na TURAGA (Yahweh) vei rau o Mosese kei Eroni,
“Ni sa tukuna vei kemudrau o Fero, ’Vakaraitaka e dua na cakacaka mana’, ekeri mo qai tukuna kina vei Eroni, “Taura na nomu ititoko, kolo yani i mata i Fero’ e na qai vuki me dua na gata.“
Rau sa mani lako o Mosese vata kei Eroni vei Fero, rau qai lai cakava na ka kece a vakarota vei rau na TURAGA (Yahweh). A qai kolotaka na nona ititoko e mata i Fero, kei ira na nona vakalesilesi, qai vuki me gata.
Sa kacivi ira sara na nona vuku kei ira na nona daucakaisausau o Fero; ia o ira na daucaka mana e Ijipita qo, era a qai cakava tale ga vaka kina e na nodra cakacaka mana. Era a viritaka yadudua na nodra ititoko, era qai vuki kece me ra gata. Ia na ititoko nei Eroni, a qai tilomi ira qaqa na nodra ititoko. Sa qai vakaukauataka cake tale na loma i Fero o Koya, a qai sega kina ni vakarorogo vei rau, me vaka a kaya na TURAGA (Yahweh).
- Lako Yani 7:8-13


Wilika talega
Lako Yani 1:8-13, 9:13-16; Vakaibalebale 29:1-2; Joni 10:33-38

Talai Mosese i Ijipita Na TURAGA.

Sa qai kaya na TURAGA (Yahweh) vei Mosese, “Ni o sa lako mo lesu tale i Ijipita, raica mo lai cakava na cakacaka mana kece sara e mata i Fero, Au sa solia vei iko na kena kaukaua mo lai cakava. Ia au na qai vakaukauataka na lomana, e na qai sega kina ni sereki ira na tamata me ra lako. Oti mo qai kaya vei Fero, ’Qo na ka e kaya na TURAGA (Yahweh); O Isireli na luvequ tagane ulumatua, ia Au sa na tukuna qo vei iko, “Sereka mai na luvequ tagane me lako mai me mai sokalou vei au.“ Kevaka o bureitaka na nona lako mai, raica au sa na samuta na luvemu tagane, io na nomu ulumatua.“
- Lako Yani 4:21-23

E kaya na TURAGA (Yahweh) vei Eroni, “Lako i na vanua dravuisiga, mo lai tavaki Mosese. Sa mani lako qai lai sotavi koya e na ulunivanua ni Kalou (Elohim) qai reguci koya. Oti sa qai vakamacalataka vei Eroni o Mosese na vosa ni Kalou (Yahweh) o Koya e a talai koya mai, vata kei na ivakatakilakila kece sara a vakarota mai vua o Koya me na mai cakava.
Rau sa qai lako o Mosese vata kei Eroni me rau lai vakasoqoni ira vata na nodra matua na Isireli.
O Eroni a qai vakamacalataka na vosa kece a kaya na TURAGA (Yahweh) vei Mosese qai vakayacora na ivakatakilakila e matadra na tamata.
Era sa qai vakaubauta na tamata. Ia ni ra qai rocoga tale ni a mai sikovi ira na luvei Isireli o Koya qai raica na nodra vakararawataki tiko, era qai cuvara sobu na uludra me ra sokalou.
-Lako Yani 4:27-31

Ni oti oya rau sa qai curu me rau lai raici Fero o Mosese vata kei Eroni, rau qai kaya, “Oqo na ka e kaya na TURAGA (Yahweh) na Kalou (Elohim) i Isireli,“Laivi ira na noqu tamata me ra lako mai, me ra mai vakayacora e dua na solevu e na vukuqu, e na vanua dravuisiga.
Ia qai kaya o Fero, “O cei sara mada na TURAGA (Yahweh), e dodonu kina meu rogoca na domona, meu qai sereki Isireli me lako? Au sega ni kila na TURAGA (Yahweh), kau na sega talega ni sereki Isireli me lako.“
-Lako Yani 5:1-2




Wilika Talega Ke Rawa
Lako Yani 1:8-13, 9:13-16, Vakaibalebale 29:1-2,
Joni 10:33-38

Vakauti Mosese i Ijipita Na TURAGA.

Me tekivu nikua me yacova ni mate na vula o Maji, sa na toso na iulutaga mai na “Vuani Yalo Tabu” ki “Na Veivakatovolei Mai Ijipita”.


E kaya talega vei Mosese na Kalou (Elohim), “Oqo na ka mo kaya vei ira na luvei Isireli, “Na TURAGA (Yahweh) na nodra Kalou (Elohim) na tamamuni, na Kalou (Elohim) i Eparayama, na Kalou (Elohim) i Aisake kei na Kalou (Elohim) i Jekope e talai au mai vei kemuni.
“Oqo na yacaqu me tawamudu, na yaca meu na nanumi tiko kina mai na dua na itabatamata ki na dua tale na itabatamata“ .
“Lako lai vakasoqoni ira vata na qase ni Isireli qai kaya vei ira, “Na TURAGA (Yahweh) na nodra Kalou (Elohim) na nomuni qase, na Kalou (Elohim) i Eparayama, i Aisake kei Jekope, sa rairai vei au qai kaya, “Au sa lai sikovi kemuni dina yani, Kau qai raica na veika sa caka tiko vei kemuni mai Ijipita. Au qai bubuluitaka Niu na kauti kemuni laivi mai na veivakararawataki oni sa sotava tiko mai Ijipita, ki na vanua vaka Kenanaiti, vaka Hitaiti, vaka Amoraiti, vaka Perisaiti, vaka Haivaiti, kei na vanua vaka Jepusaiti, ki na dua na vanua e dave kina na wai ni sucu kei na oni.
Ia o ira era na rogoca na domomu; oti moni na qai lai raica na tui kei Ijipita, o iko kei ira na matua ni Isireli, moni kaya vua, “Na TURAGA (Yahweh) na nodra Kalou (Elohim) na Iperiu, sa mai sotavi keimami: Moni sereki keimami, keimami kerea vei kemuni, me keimami lako bogi tolu, i na vanua dravuisiga, me keimami lai vakacabo isoro kina vua na TURAGA (Yahweh) na neimami Kalou (Elohim).
Ia au sa kila tu ni na sega ni sereki kemuni na tui Ijipita moni lako vakavo, ga ke vakasaurarataki e na dua na liga kaukaua.
Au na qai dodoka yani na ligaqu, Meu samuti ira kina na kai Ijipita, e na noqu cakacaka veivakurabuitaki Au sa na cakava e na kedra maliwa; ni oti oya e na qai sereki kemuni moni lako.
Ia au na vakamatavinakataki ira na tamata oqo e matadra na kai Ijipita; e na qai yaco kina, ni oni sa lako, ni oni na sega ni liga lala.
O ira kece na yalewa me ra na dui kerea vei ira na dui wekadra vakaitikotiko kei ira era vakaicili tiko vei ira, na nodra iyau siliva, na iyau koula, kei na isulu; moni vakaisulutaki ira kina na luvemuni tagane kei ira na luvemuni yalewa. Qori oni na qai tokitaka kina na nodra iyau na kai Ijipita“
- Lako Yani 3:15:22



Wilika Talega Ke Rawa
Isikeli 1; 3; 8-11; Sakaraia 14; Vakatakila 21:1-4.

Na TURAGA E Berabera Ni Vakacudrui

Na TURAGA (Yahweh) e dauloloma ka daulomasoli
e berabera na Nona vakacudrui, qai vuabale e na loloma,
E na sega ni dau veidusimaki wale vakaveitalia;
se katona tiko na nona cudru me tawamudu,
E se sega ni bau vakayacora vei keda,
na ka e veiraurau kei na noda ivalavala ca,
se sauma vinaka vei keda na noda caka ca.
Me vaka na kena cere na lomalagi mai na dela ni vuravura,
e vaka kina na Nona dau lomani ira era rerevaki koya,
Me vaka na yawa ni icadracadra ni siga mai na idromudromu ni siga,
e yawa vaka kina na Nona kauta laivi na noda ivalavala ca
mai vei keda.
- Same 103:8-12

Na TURAGA (Yahweh) e dauloloma ka daulomasoli
e berabera na Nona vakacudrui, qai vuabale e na loloma,
Na TURAGA (Yahweh) e dau vinaka vei keda kecekece,
e dau kauwaitaka vakalevu na ka kece a bulia.
- Same 145:8-9

Na TURAGA na Kalou (El) e dauvuvu,
na TURAGA (Yahweh) e na veisausaumitaka na ca
Na TURAGA (Yahweh) e na veisausaumitaka na ca, ni sa cudru,
Na TURAGA (Yahweh) e na veisausaumitaka na nodra ca
o ira era kena meca,
ka na maroroya tiko na nona leva vei ira era cati Koya,
Ia na TURAGA (Yahweh) e berabera sara na Nona vakacudrui,
ka vakaitamera sara na Nona kaukaua,
ka na sega ni vakalaiva na kedra itotogi o ira era caka cala,
E nona gaunisala o Koya, na covulaca kei na cagilaba,
ia na o era kuvu-ni-soso e Yavana.
-Neumi 1:2-3


Wilika Talega Ke Rawa
Lako Yani 34:5-7, Same 86:15-17, Joeli 2: 12-14, Jona 3-4,
II Pita 3:8-15

Na Vuani Yalo Tabu: Na Lewa-e-Loma.

E vaka na koro sa qeqera na kena lalaga,
na tamata e lailai na nona lewa-e-loma.
-Vakaibalebale 25:28

E dodonu mo vakatavulica ga na ivakavuvuli e dina ka vinaka vakaoti. Dau vakauqeti ira na kena turaga me ra dau vakabibitaki ira vakataki ira, me rawa ni ra dokai, me maucokona na nodra lewa-e-loma, ka kaukaua vinaka na nodra vakabauta, na nodra loloma vata kei na nodra dau vosota.
Vakauqeti ira talega na kena marama me ra dau vakarautaka ga na ivakarau e kilikili ka rakorako e na nodra bula, me ra kakua ni dau kakase, kakua ni dau manamana waini, ia me ra dau vakatavulica ga na ivakarau vinaka. Qori e na qai rawa kina vei ira me ra tuberi ira na goneyalewa me ra na dau lomani ira na dui watidra kei ira na dui luvedra, me ra kaukaua e na nodra lewa-e-loma, loma savasava, me ra dau qarava vinaka na nodra itikotiko vakamatavuvale, dau yaloyalovinaka, dau tokoni ira vinaka na watidra, me kua kina ni vakacacani rawa na vosa ni Kalou.
Mo vakauqeti ira talega na cauravou, me maucokona na nodra lewa-e-loma.
-Taito 2:1-6

Qo na vuna e dodonu kina moni segata vakaukaua moni tokona na nomuni vakabauta e na yalovinaka, qai tokona na nomuni yalovinaka e na kilaka, moni tokona na nomuni kilaka e na lewa matua, na lewa matua e na yalovosota, qai tokana na nomuni yalovosota e na yalo vaKalou; tokona na nomuni itovo vaKalou e na yalololoma vakaveitacini, qai tokona na nomuni yalololoma vakaveitacini e na loloma. Kevaka e tiko dei vei kemuni na veika kece oqo, qai toso cake tiko ga na kedra ivakatagedegede, era na taqomaki iko, me kakua ni maumau wale se tawayaga na nomuni kila na noda Turaga (Master) o Jisu Karisito (Yahshua the Messiah).
- II Pita 1:5-8





Wilika Talega Ke Rawa
Vakaibalebale 1:1-7, Taito 2:11-14, I Pita 1:5-8

Na Kalou Yalomalumu.

Raica, na TURAGA (Sovereign) na Kalou (Yahweh),
e na lako mai e na liga qaqa,
me mai veiliutaki ka vakavulewa e na ligana kaukaua,
Raica, na Nona icovi me mai veisoliyaka sa tiko Vua,
na isau talega ni cakacaka.
E na vakani ira na Nona tamata, me vaka na ivakatawa
ni sipi:
E na keveti ira na luve ni sipi e ligana,
ka mokoti ira vakaukaua e lomaserena;
ka tuberi ira vakamalua, o ira e tiko na nodra lalai.
-Aisea 40:10-11.

Mo mamarau sara vakalevu, o iko na luvei Saioni yalewa,
kaila o iko na luvei Jerusalemi yalewa,
Raica na nomu Tui sa lako tiko mai vei iko,
e yalododonu, ka tiko Vua na itini ni veivakabulai,
e yalomalumu ka vodoka tiko e dua na asa,
e dua na asa tagane, na luveni asa gone.
-Sakaraia 9:9

Lako mai vei au o kemuni kece oni sa oca ka vakacolati e na icolacola bibi, au na qai solia vei kemuni na vakacegu. Colata na noqu ivua me nomu, qai vuli mai vei au, baleta au yalomaloku ka yalomalumalumu mai vuniyaloqu, oni na qai kunea na vakacegu, e na nomuni bula. Baleta na noqu ivua e rawarawa kei na noqu icolacola e mamada.
- Maciu 11: 28-30.



Wilika Talega Ke Rawa
I Tui 19:9-12, II Korinica 10:1, Maciu 21:1-12

Ni Yalomaloku na Tamata.

Qo e dua na vosa e a dau vakayagataki ga vakawasoma vei ira na manumanu, e sa tukuni oti vakavica vei au.

E na vica na yabaki sa oti, au a vaqara tiko kina e dua na vosa vakaviti e rawa ni vakayagataki me vakadewataki kina na vosa vakaPeritania na ‘meekness’ e na kena a vakayagataki vei Jisu (Yahshua) kei Mosese. Au a kunea ni rogorogo cala na vosa “yalomalua” se “yalomalumalumu” sa dau vakayagataki vakawasoma tiko me ivakadewa ni vosa oqo meek se meekness.

Au a mani dolava na noqu “Strong Concordance” au qai kunea kina ni vosa na meek se meekness e vakadewataki mai na vosa vaKirisi na praus se praos (4239) se prautes se praotes (4240), ia na vosa vaKirisi oqori e kena ibalebale “kaukaua, qaqa, lewa matau se maqosa kei na so tale. Ia na vosa na meek se meekness e vakaraitaka na veibasai ni veivosa vaKirisi au sa cavuta oti, oya e kena ibalebale, na malumalumu kei na yalomalua.

Oti au mani vaqaqa na vosa oqo na “prautes”, au qai kunea ni vosa oqo e dau vakayagataki me vakamacalataki kina na nodra ivakarau tudei na manumanu ni siviyara me vaka na ose se bulumakau adru. Me vaka sara ga na vosa na "maloku" se vakaevei?

Na vakasama e kauta mai, ni vakaitamera dina na kaukaua e tiko vei ira na manumanu ni siviyara oqo, ia era solia ka vakayagataka vakatabakidua na kaukaua oqori, e na nona lewa o koya na daunisiviyara. Sa taura rawa beka?

Eda dau kaya ni maloku na manumanu ni siviyara baleta era cakava galugalu ga na ka e gadreva vei ira mera cakava, o koya e vakayagataki ira tiko e na nona iteitei, me cukita na nona qele.

Qori na yavu au vakayagataka tiko kina na vosa oqo na yalomaloku.

O Karisito e kainaki ni yalomaloku baleta ni vakaitamera na nona kaukaua ia e vakayagataka vakatabakidua tiko ga na kaukaua oya e na gagadre ni Kalou (Elohim) e duabau. O Mosese e vaka kina, e tukuni ni Turaga yalomaloku, e na veika a vakayacora ni sa talai koya i Ijipita na Kalou (Yahweh).

Na Vuani Yalo Tabu: Na Yalomalumu.

Na vosa malumu e vakaseavutaka na leva,
ia na vosa kaukaua e vakatubura na cudru
-Vakaibalebale 15:1

Na yalovosota e rawa ni vakauqeta na ravouvou,
Ia na yame malumu e rawa ni musuka na sui
-Vakaibalebale 25:15

E na yalomalumu kei na yalomaloku vata kei na yalo ni veivosovosoti, dou dau veitokoni e na yalololoma. Dou dau segata vakaukaua mo dou maroroya na yalo ni duavata e na Yalo Tabu me ivau ni bula veisaututaki.
-Efeso 4:2-3

Ni dau marautaka na TURAGA (Yahweh) e veiveigauna kece: meu tokoruataka, Marau. Laiva na nomu yalovinaka me kilai raraba. Na TURAGA (Sovereign) sa voleka. Kakua ni taqayataka e dua na ka; ia e na veika kecega, dau vakaraitaka na nomu gagadre vua na Kalou (Elohim), e na vakatamamasu kei na vakatakekere, e na yalo ni vakavinavinaka. Na vakacegu ni Kalou (Elohim), na vakacegu e uasivita na kilaka kece, e na qai taqomaka na vuniyalomuni kei na vu ni nomuni vakasama e na vuku i Jisu Karisito (Yahshua Messiah).
-Filipai 4:4-7

O cei e na vakamavoataki kemuni kevaka oni gumatua ga e na nomuni vakamuria na caka vinaka? Ia kevaka mada ga moni vakararawataki e na vuku ni dodonu, e na nomuni ga na marau; kakua sara ni rerevaka na nodra veivakarerei se lomaleqaleqa. Ia mai vuniyalomuni dau rerevaki Jisu (Messiah) ni o Koya na Turaga (Sovereign). Dau vakarau tu e veigauna kece moni solia na isau ni nodra taro o ira kece era via kila na vu ni inuinui e tu vei kemuni. Ia dau vakamacala ga e na yalomalumu kei na yalo ni veidokai, ka qarauna me savasava tiko na nomuni lewa e loma, me rawa ni qai nodra ga na madua, o ira era vosa vakacacana na nomuni ivakarau vinaka e na vukui Karisito (Messiah).
-I Pita 3:13-16


Wilika Talega Ke Rawa
Aisea 8:12-15, I Timoci 6:3-11, II Timoci 2:24-25; I Pita 3:1-6

E Yalodina na Kalou.

Moni kila tiko ni Kalou (Yahweh) dina, na nomuni TURAGA na Kalou (Elohim); o Koya e Kalou (El) yalodina, ka ni se taura matua tikoga na Nona veiyalayalati ni loloma vata kei ira na udolu na matatamata era lomani Koya, o ira era se taura matua tiko ga na Nona ivakaro. Ia o ira era cati Koya, e na sauma vakadodonu i matadra e na Nona vakarusai ira. E na sega ni vakawaletaka o Koya na Nona na sauma lesu i matadra, o ira era cati Koya.
-Vakarua 7:9-10

Au na seretaka na loloma levu ni TURAGA (Yahweh) me kua ni mudu;
e na gusuqu au na tusanaka na Nomuni yalodina
vei ira na itabatamata kece sara.
Au na tusanaka na tudei na Nomuni loloma me tawamudu,
ni Oni sa vakataudeitaka tu na Nomuni yalololoma
mai lomalagi sara ga.
-Same 89:1-2

Ia na ka oqo au sa vakasamataka e lomaqu,
o koya oya e levu kina na noqu nuinui;
Baleta ga na loloma levu ni TURAGA (Yahweh)
eda sega ni muduki koso kina,
ka ni sega ni cala rawa na Nona yalololoma,
E na vakavoutaki e na veimataka
e vakaitamera dina ga na Nomuni yalodina.
- Lele i Jeremaia 3:21-23

O koya oqori, laivi koya e nanuma ni sa tudei toka, me qaqarauni de qai sikalutu! E sebera ni yaco vei kemuni na veivakatovolei, vakavo na kena sa yaco tiko vakawasoma vei ira na tamata. Baleta na Kalou (Elohim) e yalododonu, ka na sega ni vakatara moni na vakatovolei e na mataqali vere oni na sega ni vorata rawa. Ia ni oni sa vakatovolei, e na vakaraitaka tale ga mai o Koya na sala oni na colata vinaka kina.
- I Korinica 10:12-13

Kevaka eda vakatusa na noda ivalavala ca, o Koya e yalodina ka yalololoma, e na vosota kina e na vukuda na noda ivalavala ca ka na vakasavasavataki keda mai na noda dukadukali kecekekece.
-I Joni 1:9


Wilika Talega Ke Rawa
Vakarua 31:30-32:4, II Cesalonaika 3:3, II Timoci 2: 11-13, Vakatakila 19:11-16

Na Vuani Yalo Tabu: Na Yalodina.

Na TURAGA (Yahweh) duadua ga moni rerevaka, ka qaravi Koya vakayalodina e na vuniyalomuni taucoko; ka moni vakasamataka na veika lelevu sa cakava vei kemuni o Koya.
-I Samuela 12:24

Vei ira era yalodina, o na vakaraitaki iko ni o yalodina,
ia vua na tamata yalododonu, o na vakaraitaki iko ni o yalododonu, vei koya e yalosavasava, o na vakaraitaki iko ni o yalosavasava,
vei koya e yalotakelo, o na vakaraitaki iko ni o yalomatua,
O na vakabulai ira na yalomaloku,
Ia na matamu e na toka ga vei ira na viavialevu
mo vakalolovirataki ira.
-II Samuela 22: 26-28

Oilei, lomana na TURAGA (Yahweh), o kemuni kece oni Nona digitaki,
Baleta na TURAGA (Yahweh) e dau taqomaki ira na yalodina
Ka saumi ira vakalevu o ira era vakayacora na itovo dokadoka,
Moni dau tu kaukaua tu, moni vakaukautaka na vuniyalomuni,
o kemuni kece oni vakanuinui tu Vua na TURAGA (Yahweh).
- Same 31:23-24

Oqo e dua na ivosavosa dina; baleta
Kevaka eda mate vata kei Koya, eda na bula tale vata kei Koya,
Kevaka eda vakararawataki, eda na veiliutaki vakatui vata kei Koya,
Kevaka eda cakitaki Koya, o koya talega e na cakitaki keda,
Kevaka eda sega ni vakabauta, e na yalodina tikoga o Koya,
baleta e sega ni rawa Vua me cakitaki Koya ga vakataki Koya
-II Timoci 2:11-13.


Wilika talega ke Rawa
Same 101, Vakaibalebale 3:1-4, Maciu 24:45-51; Maciu 25: 14-30.

Na Kalou (Yahweh/Elohim) e Vinaka.

Tovolea, mo qai raica ni vinaka na TURAGA (Yahweh),
e kalougata na tamata e vakararavi Vua.
- Same 34:8

Au na vakacaucautaki Kemuni me tawamudu,
e na vukuni ka Oni a cakava;
au na vakanuinui i na Yacamuni
baleta ni vinaka e matadra na Nomuni digitaki.
- Same 52:9

E ka dina ni Kalou (Elohim) e dau vinaka vei Isireli,
vei ira mada ga e savasava na vuniyalodra.
- Same 73:1

Baleta na TURAGA (Yahweh) e vinaka, na Nona loloma e tawamudu.
Kei na Nona dina e kovuta na veitabatamata kece sara.
- Same 100:5

Vakacabora na vakavinavinaka Vua na TURAGA (Yahweh),
baleta e vinaka o Koya;
Na Nona yalololoma e na tu me tawamudu
- Same 118:1

Vakacaucautaka na TURAGA (Yah), baleta na TURAGA (Yahweh) e vinaka;
Lagata na sere ni veivakacaucautaki e na vuku ni Yacana,
Baleta qori e kamikamica.
- Same 135:3

Na TURAGA (Yahweh) e vinaka vei keda kecekece,
E dau kauwaitaka vakalevu o Koya na ka kece a bulia.
-Same 145:9


Wilika Talega ke Rawa
II Veigauna 6:41, Same 84:9-12, Marika 10: 17-18, Roma 8:18-28, III Joni 11.

Na Vuani Yalo Tabu: Na Yalovinaka .

Na tamata vinaka e na rawata na Nona yalovinaka na TURAGA (Yahweh),
ia na tamata dauveivakaisini e na totogimate.
-Vakaibalebale 12:2

Au kila ni sega ga ni dua na ka e vinaka cake e rawa ni cakava e dua na tamata, vakavo ga me mamarau ka caka vinaka tiko ni se bula tiko. Ni rawa mera kana ka gunu taucoko, ka kunea na vakacegu ni lomadra e na veika kece era dau cakava – oqori na iloloma soliwale ni Kalou (Elohim).
-Dauvunau 3:12-13

E sega ni dua na vunikau vinaka e na vuataka na vuanikau ca, ka sega talega ni dua na vunikau ca, me na vuataka na vuanikau vinaka. Na vunikau kece sara e na kilai ga mai na dui vuadra. Na tamata e na sega ni betia na vuanilolo mai na vunikau vakavotona se betia na vuanivaini mai na vunisoni. Na tamata vinaka e na vakarautaka ga na ivakarau vinaka, baleta sa sinai vutuvutu tu na vinaka e vuniyalona, ia na tamata ca e na vakarautaka ga na ivakarau ca, baleta sa sinai vutuvutu tu na ca e vuniyalona. Mai na vuabale ga ni veika sa sinai vutuvutu tu e na vuniyaloni tamata, na gusuna e na vosataka.
-Luke 6:43-45

Meda kakua sara ni vakacauoca e na caka vinaka baleta e na kena gauna dodonu eda na tamusuka na vuana, kevaka eda sega ni guce koso. O koya oya, e na veigauna kece e se rawa kina vei keda, e dodonu meda dau caka vinaka tiko, vei ira na tamata kece, vakabibi vei ira era lewe ni noda mataveiwekani e na vakabauta.
-Kalatia 6:9-10

O keda sara ga oqo, na ibulibuli ni liga ni Kalou (Elohim), buli e na vuku i Jisu Karisito (Messiah Yahshua), meda mai vakayagataki e na cakacaka vinaka, me vaka a navuca na Kalou (Elohim) mai liu, meda na mai vakaitavi kina.
-Efeso 2:10

Kemuni na noqu daulomani, kakua ni vakatotomuria na ka ca, vakamuria ga na ka vinaka. O koya e caka vinaka e vu mai Vua na Kalou (Elohim) ia o koya e dau cakava na veika ca, e sebera ni raica na Kalou (Elohim).
-3 Joni 11




Wilika talega ke rawa
Same 34:8-14, Vakaibalebale 3:27, 11:27;
I Pita 2:12-15.

Na Kalou e Dauyalololoma.

Au na tusanaka na yalololoma ni TURAGA (Yahweh),
na veika e dau vakayacora e dodonu me vakacaucautaki kina o Koya ,
ka vaka kina na veika sa vakayacora na TURAGA (Yahweh) e na vukuda –
Io, kei na veika vivinaka sa vakayacora oti
vei ira na Yavusa Isireli,
na ivakaraitaki ni Nona dau veinanumi,
kei na ilevu ni Nona yalololoma
-Aisea 63:7

Oqo na veika e kaya na TURAGA (Yahweh):
me kakua ni dokadokataka na nona vuku na tamata vuku,
me kakua ni dokadokataka na nona kaukaua na tamata kaukaua, kei na tamata vutuniyau, me kakua ni dokadokataka na nona iyau.
Laivi koya e via dokadoka me dokadokataka ga na ka oqo,
ni vakabauti Au ka kilai Au,
ni o Au na TURAGA (Yahweh), o koya e dau vakarautaka na yalololoma,
na lewa dodonu, kei na cakacaka dina e vuavura,
baleta oqori na veika au dau taleitaka e kaya na Kalou (Yahweh)
-Jeremaia 9: 23-24

E na dua na gauna o keda talega eda a dau sesewa tu, dautalatalai dredre, vakacalai, ka a dau vakabobulataki tu e na veimataqali gagano kei na gagadre ca eso, ka dau bula tu e na yaloca, na yalovuvu, kei na yalo ni veisevaki vata kei ira na tani.
Ia ni sa basika na Nona yalololoma kei na Nona yalovinaka na Kalou (Yahweh), na noda ivakabula, sa qai vakabulai keda o Koya, ia e sega ga ni baleta e dua na ka dodonu eda cakava, ia baleta ga na ilevu ni yalololoma e tu Vua........
-Taito 3: 3-5a

Na Vuani Yalo Tabu: Na Yalololoma

Na yalewa yalovinaka e na rawata na dokai
Ia na tagane tawaloloma e na rawata na iyau,
Na tagane yalovinaka e na yaga i na nona bula ga o koya vakataki koya
Ia na tamata dau veivakararawataki e na kauta ga mai na leqa,
i yagona o koya vakataki koya
-Vakaibalebale 11;16-17

O koya e sevaki ira na wekana vakaitikotiko, e valavala ca,
Ia o koya e dau lomani ira na dravudravua, e nona na kalougata.
-Vakaibalebale 14:21

O koya e dau vakararawataki ira na dravudravua
e beci Koya e a buli i koya,
Ia o koya e dau vakarokorokotaki Koya,
e na lomani ira na dravudravua.
-Vakaibalebale 14:31

O koya e lomani ira na dravudravua e soli dinau vua na Kalou (Yahweh),
Ia na veika kece sa solia, e na sauma lesu tale vua o Koya,
-Vakaibalebale 19:17

Moni dau veilomalomani, dauyalololoma ka dauveivosovosoti vakataki kemuni, me vaka ga ni a vosoti kemuni na Kalou (Elohim) e na vukui Jisu Karisito (Messiah).
-Efeso 4:32

Sa dodonu kina, me vaka ni oni tamata digitaki ni Kalou (Elohim), vakatabui ka dau lomani, moni daramaka na itovo e kune kina na loloma, na veinanumi, na yalomaloku, na yalomalumu kei na yalo ni veivosovosoti. Moni dau veivosovosotitaka na ca cava ga e tiko e na kemuni maliwa. Moni dauveivosoti me vaka sa vosoti kemuni o Karisito (Master). E na dela ni veika kece oqori, moni qai daramaka talega na loloma, oya na ivau ni yalovata e vinaka vakaoti.
-Kolosa 3:12-14


Wilika Talega Ke Rawa
Ruci 1:1-3, Vakaibalebale 14:21, I Cesalonaika 5:15

Na Kalou e Dauvosota

Oqo e dua na vosa dina e dodonu sara ga me ciqomi: o Karisito Jisu (Messiah Yahshua) e a lako mai i vuravura me mai vueti ira na tamata ivalavala ca, ia o au qo na tamata ivalavala ca levu duadua.
Qori au qai vosoti kina o au na tamata ivalavala ca duadua, me rawa ni vakaraitaka kina o Jisu Karisito (Yahshua the Messiah), na titobu ni nona dauveivosoti, meu qai rawa kina ni idusidusi vei ira kece, era sa mai solia na nodra vakabauta Vua, me ra rawata na bula tawamudu.
-I Timoci 1: 15-16

Na TURAGA (Yahweh) e sega ni vakayabeyabetaka tiko na nona yalayala, ke tauri na balebale ni vakayabeyabe era kila tiko eso. O koya e vosoti kemuni tikoga ga vakadede, baleta na nona gadreva me kua sara ni dua e vakarusai, ia meda yacova kece na veivutuni,
Ia na siga ni TURAGA (Yahweh) e na qai yaco ga mai, me vaka e dua na daubutako e na bogi. Na lomalagi e na vivigi laivi e na domo rogorogo vakadomobula; na vu ni veika kece era na waicala e na bukawaqa, na vuravura kei na veika kece era tawana tu era na kama yavu vakadua.
Ia kevaka eda sa raica ni na vakawaicalataki na veika kece e na sala oqo, na mataqali ivakarau cava sara mada e dodonu moni vakarautaka e na nomuni dui bula? E dodonu moni yalosavasava ka yalovakalou e na nomuni dui bula, moni qai namaka tiko na kena yaco vakusakusa mai na siga ni Kalou (Elohim). Na siga oqori e na kauta mai na kena vakarusai na lomalagi e na bukawaqa, kei na veika kece e na waicala e na kena katakata waromisa. Ia me vaka ga na nona yalayala, eda sa namaka kece tiko e dua na lomalagi vou kei na dua na vuravura vou, me na nodra itkotiko na yalododonu.
O koya oya kemuni na taciqu, e na nomuni namaka tiko na veika oqo, ni segata e na nomuni igu taucoko, moni na kune ni oni savasava vinaka, sega ni cala ka bula tiko e na bula vakacegu. Moni kila tiko ni Nona dau vosota na noda Turaga (Master) e yavu ni bula vei kemuni, me vaka a vola yani vei kemuni o Paula, e na kilaka kei na vuku sa soli tu vua.
- II Pita 3: 9-15


Wilika talega ke rawa.
Aisea 7:13, 65:17-25, Roma 2:1-4, 3:21-28, I Pita 3:18-20, Vakatakila 21:1-8

Na Kalou ni Bula Sautu

Na TURAGA (Yahweh) e solia na kaukaua vei ira na Nona tamata,
na TURAGA (Yahweh) e vakalougatataki ira na Nona tamata
e na bula sautu.
-Same 29:11

E na vukuda, sa sucu kina e dua na gone,
vei keda sa soli mai e dua na gone tagane
Na matanitu e na tava e na usouso ni tabana.
Ia e na vakatokai me yacana,
o Veivakurabuitaki, o Daunivakasala, na Kalou (El) kaukaua,
Tamada tawamudu, na Ravouvou ni Sautu
Na tubu ni Nona matanitu kei na Nona sautu,
e na sega ni oti rawa,
E na vakavulewa toka mai na idabedabe vakatui nei Tevita,
ka liutaka na nona matanitu,
me vakataudeitaka ka laveta cake tiko,
e na lewa dodonu kei na ivalavala dodonu,
mai na gauna oya me tawamudu.
Na Nona gumatua na TURAGA cecere (Yahweh of host),
e na rawa kina na veika oqo.
- Aisea 9:6-7

O koya oya, mai na gauna eda sa vakadonui kina e na vuku ni noda vakabauta, eda sa rawata na bula sautu vata kei na Kalou (Elohim), e na vuku ni noda Turaga (Master) o Jisu Karisito (Yahshua the Messiah), o Koya e vu ni noda vakabauta, qai dolavi rawa kina, me da rawata na loloma e da sa rawata tu edaidai. Eda na marautaka na noda inuinui e na lagilagi ni Kalou (Elohim).
- Roma 5:1-2

Me vakalougataki kemuni mada ga vakaoti, na Kalou (Elohim) sara ga ni bula sautu. Me taqomaki mada ga na yalomuni, na nomuni bula kei na yagomuni, moni savasava ka tabucala, tiko me yacova na Nona lako mai na noda Turaga (Master) o Jisu Karisito (Yahshua the Messiah).
- I Cesalonaika 5:23

Me qai solia mada ga vei kemuni na sautu e na veigauna kei na veisala kece, o Koya sara ga na Turaga (Sovereign) ni bula sautu. Me tiko kei kemuni kece na Turaga (Master).
- II Cesalonaika 3:16

Na Vuani Yalo Tabu: Na Vakacegu

Na TURAGA (Yahweh) me vakalougatataki kemuni,
ka maroroi kemuni.
Na TURAGA (Yahweh) me serauna na Matana vei kemuni,
ka dau yalololoma vei kemuni.
Na TURAGA (Yahweh) me vakanamata vei kemuni,
ka solia vei kemuni na vakacegu.
-Lekutu 6: 24-26

Na vakacegu vakaitamera e tiko vei ira era taleitaka
na Nomuni lawa,
e sega ni dua na ka e rawa ni vakatarabetaki ira.
- Same 119:165

Oni na solia na vakacegu vinaka vakaoti
vua e lomadei tu na vuniyalona
baleta e dau vakararavi vei Kemuni.
Vakararavi Vua na TURAGA (Yahweh) me kua ni mudu,
baleta vua na TURAGA (Yah) na TURAGA (Yahweh) e uluvatu tawamudu.
- Aisea 26:3-4

Na vakacegu au na biuta tiko mai vei kemudou; na Noqu vakacegu au na solia vei Kemudou. Au sega ni solia vei kemudou, me vaka e solia o vuravura. Dou kakua ni vakatara me yaco vei kemudou na lomaleqaleqa, dou kakua talega ni rere.
- Joni 14:27

Kakua ni taqayataka e dua na ka, ia e na veika kecega, dau vakaraitaka na nomu gagadre vua na Kalou (Elohim), e na vakatamamasu kei na vakatakekere e na yalo ni vakavinavinaka. Na vakacegu ni Kalou (Elohim), na vakacegu e uasivita na kilaka kece, e na qai taqomaka na noda vakasama kei na vuniyaloda vei Jisu Karisito (Messiah Yahshua).
- Filipai 4:6-7

Laiva na vakacegu nei Karisito (Messiah) me mai vakatulewa e na vuniyalomuni, baleta oni a kacivi ki na vakacegu, ni oni sa lewe ni Yagona e duabau. Moni dau vakasinaiti e na vakavinavinaka. -Kolosa 3:15


Cavuta e dua na qaqani nomu masu lo,kevaka o gadreva.

Me qai nomuni na veivakalougatataki ni Nona Vosa na Kalou (Yahweh)

Na Vuani Yalo Tabu, Na Dauvosota

Tiko vakamalua e na matani TURAGA (Yahweh), vosota na nomu waraki Koya tiko,
kua ni lomacataki ira na tani, ke toso vinaka na nodra bula,
ni ra vakayaora na nodra inakinaki tawakilikili.
Tarova na nomu leva, ka vuki laivi mai na nomu cudru,
kua sara ni lomaca - qori na vu ni ivalavala ca.
Baleta o ira na tamata ivalavala ca kece era na muduki laivi,
ia o ira era vakanuinui vua na TURAGA (Yahweh), era na taukena na vanua.
- Same 37:7-9

Au dau vosota vakadede, niu waraka tiko na TURAGA (Yahweh);
sa qai vuki mai vei au, me rogoca na noqu tagi,
E laveti au tani mai na qara dravidravia,
mai na veidabibi kei na soso lolobo talega,
Qai vakatura na yavaqu e na dela ni uluvatu,
ka solia vei au e dua na vanua kaukaua meu tu kina.
E vakacuruma i gusuqu e dua na sere vou, o Koya,
io na sere ni vakavinavinaka vua na noda Kalou (Elohim),
E levu era na raica era qai rere, era na qai biuta na nodra inuinui vua na TURAGA (Yahweh).
- Same 40:1-3

Na tamata dau vosota vakadede, e levu vua na yalomatua,
ia o koya e dau yalototolo, e vakaraitaka na ivalavala lialia.
- Vakaibalebale 14:29

Na loloma e dauvosota vakadede, na loloma e dauyalovinaka, e sega ni dauvuvu,
e sega ni dau vukivuki vakarairai, e sega talega ni daudokadoka.
- I Korinica 13:4

Moni dauvosota, kemuni na taciqu, me yacova ni lako mai na Turaga (Master)
Raica mada na nodra dau waraka na qele, o ira na dauteitei, me matua mai na vua ni qele talei,
kei na ilevu ni nodra dau vosota, ni ra waraka tiko me tau mai na imatai kei na iotioti ni uca. O kemuni talega moni dauvosota ka tudei tiko, baleta na Nona lako mai na Turaga (Master), sa roro voleka mai.
- Jemesa 5:7-8